ବନ୍ଧୁ ଆପଣଙ୍କୁ ଆମ ନ୍ୟୁଜ ପୋର୍ଟାଲକୁ ସ୍ଵାଗତ ଆପଣଙ୍କ ପାଇଁ ଆମେ ସବୁବେଳେ କିଛି କିଛି ଖାସ ଖବର ନେଇ ଆସିବୁ ତେବେ ଚାଲନ୍ତୁ ଆଲୋଚନା କରିବା ଆଜି ର ବିଷୟ ବସ୍ତୁ ଉପରେ .
ସମ୍ବଲପୁର : ହୀରାକୁଦ ଜଳଭଣ୍ଡାର ଜଳ ପରିଚାଳନାକୁ ନେଇ ସବୁବେଳେ ବିଭିନ୍ନ ଅଭିଯୋଗ ହୋଇଆସୁଛି। ଅଣମୌସୁମୀ ସମୟରେ ହୀରାକୁଦ ଜଳଭଣ୍ଡାରର ଜଳ ପରିଚାଳନା ପାଇଁ ଶକ୍ତି ବିଭାଗ ଓ ଜଳ ସଂପଦ ବିଭାଗ ଦ୍ବାରା ମିଳିତ କାର୍ଯ୍ୟଖସଡ଼ା (ଜଏଣ୍ଟ ୱାର୍କିଂ ଟେବଲ୍) ପ୍ରସ୍ତୁତ ହୋଇଛି। ମାତ୍ର, ଏହି ମିଳିତ ଖସଡ଼ା କାର୍ଯ୍ୟକାରୀ ହେଉ ନାହିଁ। ଓଡ଼ିଶା ସରକାର ସବୁବେଳେ ଛତିଶଗଡ଼ ଉପରେ ଦୋଷ ଲଦୁଥିବା ବେଳେ ଏପଟେ ହୀରାକୁଦ ଜଳଭଣ୍ଡାରର ସଫଳ ଜଳ ପରିଚାଳନା କରିବାର ଫେଲ୍ ମାରିଛନ୍ତି। ତ୍ରୁଟିପୂର୍ଣ୍ଣ ଜଳ ପରିଚାଳନାକୁ ନେଇ ଖୋଦ୍ ରାଜ୍ୟ ଜଳ ସଂପଦ ବିଭାଗର ଅବସରପ୍ରାପ୍ତ ସର୍ବୋଚ୍ଚ ଯନ୍ତ୍ରୀ ରବୀନ୍ଦ୍ର କୁମାର ପଣ୍ଡା ପ୍ରଶ୍ନ ଉଠାଇଛନ୍ତି।
ପ୍ରାପ୍ତ ସୂଚନା ଅନୁସାରେ, ଗତ ମାର୍ଚ୍ଚ ୨୦ ତାରିଖରେ ହୀରାକୁଦ ଜଳଭଣ୍ଡାରର ଜଳସ୍ତର ୬୧୭.୨୩ ଫୁଟ୍ ଥିବା ବେଳେ ୨୭ ତାରିଖରେ ଜଳସ୍ତର ୬୧୬.୩୯ ଫୁଟ୍ରେ ପହଂଚି ଥିଲା। ଅର୍ଥାତ, ଗତ ୮ ଦିନର ଅବଧିରେ ଜଳସ୍ତର ମାତ୍ର ୦.୮୪ ଫୁଟ୍ ହ୍ରାସ ପାଇଛି।
ଜଳସେଚନ ପାଇଁ ଆବଶ୍ୟକ ମୁତାବକ କେନାଲ ମାଧ୍ୟମରେ ଜଳ ନିଆଯାଉଥିବା ବେଳେ ବୁର୍ଲା ଶକ୍ତି କେନ୍ଦ୍ର ଗତ କିଛିଦିନ ହେଲା ହାରାହାରି ଦୈନିକ ସେକେଣ୍ଡ ପ୍ରତି ୨୦୦୦ରୁ ୨୫୦୦ ଘନ ଫୁଟ୍ ଜଳ ବିଦ୍ୟୁତ ଉତ୍ପାଦନ ପାଇଁ ଟାଣୁଛି। ଜଳଭଣ୍ଡାରରେ ଯଥେଷ୍ଟ ଜଳ ଥିବା ସତ୍ତ୍ବେ ଏତେ କମ୍ ପରିମାଣ ଜଳ ବିଦ୍ୟୁତ୍ ଉତ୍ପାଦନ ପାଇଁ ବ୍ୟବହାର କରିବା ଯୋଗୁ ମହାନଦୀର ତଳମୁଣ୍ଡରେ ଜଳାଭାବର ଆଶଙ୍କା ସୃଷ୍ଟି ହୋଇଛି। ପୁଣି ତ୍ରିକୋଣଭୂମି(ଡେଲ୍ଟା) ଅଂଚଳରେ ରବି ଚାଷ ପ୍ରଭାବିତ ହେବାର ଆଶଙ୍କା ମଧ୍ୟ ଦେଖାଦେଇଛି।
ଅଣମୌସୁମୀ ସମୟରେ ମହାନଦୀର ତଳମୁଣ୍ଡରେ ଜଳ ପ୍ରବାହ ହାର ପ୍ରାୟତଃ ବୁର୍ଲା ଶକ୍ତି କେନ୍ଦ୍ରର ଦୈନିକ ବିଦ୍ୟୁତ ଉତ୍ପାଦନ ପାଇଁ ବ୍ୟବହୃତ ଜଳର ପରିମାଣ ଉପରେ ନିର୍ଭର କରେ। କିଛିଦିନ ହେବ ବୁର୍ଲା ଶକ୍ତି କେନ୍ଦ୍ରରୁ ବିଦ୍ୟୁତ ଉତ୍ପାଦନ ହାର କମ୍ ହେବା ଯୋଗୁ ମହାନଦୀର ତଳମୁଣ୍ଡରେ ଜଳ ପ୍ରବାହ ହାର ମଧ୍ୟ କମିଛି। ଏବେ ହୀରାକୁଦ ଜଳଭଣ୍ଡାର ଜଳସ୍ତର ୬୧୬ ଫୁଟ୍ ଉପରେ ଅଛି। ଯାହାକି ଜଳଭଣ୍ଡାରର ପୂର୍ଣ୍ଣ ଉପଯୋଗୀ ଜଳଧାରଣ କ୍ଷମତା(୬୩୦ ଫୁଟ୍)ର ୫୦ ପ୍ରତିଶତ(ପାଖାପାଖି ୨.୦ ନିୟୁତ ଏକର ଫୁଟ୍) ଗଚ୍ଛିତ ରହିଛି। ଆଉ ପ୍ରାୟ ୯୦ ଦିନ ପରେ ବର୍ଷା ଋତୁ ଆସିଯିବ। ତାହା ପୂର୍ବରୁ ଗଚ୍ଛିତ ଜଳକୁ ସଠିକ୍ ବ୍ୟବହାର କରିବା ନିତାନ୍ତ ଆବଶ୍ୟକ। ବର୍ତ୍ତମାନ ହୀରାକୁଦ ଜଳଭଣ୍ଡାରରେ ଗଚ୍ଛିତ ଜଳକୁ ଉପଯୁକ୍ତ ଭାବେ ପରିଚାଳନା କରାଗଲେ ମହାନଦୀର ତଳମୁଣ୍ଡର ଜଳସ୍ତର ସମସ୍ତ ଆବଶ୍ୟକତା ତଥା ଡେଲ୍ଟା ଅଂଚଳରେ ରବି ଜଳସେଚନ ଚାହିଦା ବି ମେଣ୍ଟି ପାରିବ।
ମେ ମାସ ପ୍ରଥମ ସପ୍ତାହ ପର୍ଯ୍ୟନ୍ତ ହୀରାକୁଦ ସେଚାଞ୍ଚଳର ରବି ଜଳସେଚନ ପାଇଁ ଆଉ ପାଖାପାଖି ୦.୫୦ ନିୟୁତ ଏକର ଫୁଟ୍ ଜଳ ଆବଶ୍ୟକ ଥିବା ବେଳେ ବଳକା ଜଳ (୧.୫୦ ନିୟୁତ ଏକର ଫୁଟ୍)କୁ ଦୈନିକ ହାରାହାରି ସେକେଣ୍ଡ ପ୍ରତି ୫୦୦୦ ଘନଫୁଟ୍ ଜଳ ବିଦ୍ୟୁତ ଉତ୍ପାଦନ ପାଇଁ ବ୍ୟବହାର କଲେ ଜୁନ୍ ୧୫ ବେଳକୁ ହୀରାକୁଦ ଜଳଭଣ୍ଡାରରେ ଜଳସ୍ତର ପାଖାପାଖି ୫୯୮ ଫୁଟ୍କୁ ଛୁଇଁବ। ମିଳିତ କାର୍ଯ୍ୟସାରିଣୀ ଅନୁସାରେ, ହୀରାକୁଦ ଜଳଭଣ୍ଡାରର ଅଚଳ କ୍ଷମତା(ଡେଡ୍ ଷ୍ଟୋରେଜ୍) ହେଉଛି ୫୯୦ ଫୁଟ୍। ତେବେ, ବର୍ଷା ବିଳମ୍ବ ଆଦିକୁ ଦୃଷ୍ଟିରେ ରଖି ଅନ୍ୟୁନ୍ ଜୁନ୍ ୧୫ ସୁଦ୍ଧା ଜଳସ୍ତର ୫୯୮ ଫୁଟ୍ ଜଳ ରଖାଯାଇଥାଏ। ହୀରାକୁଦ ଜଳଭଣ୍ଡାରରେ ବର୍ତ୍ତମାନ ଗଚ୍ଛିତ ଜଳକୁ ବର୍ଷାଋତୁ ପୂର୍ବରୁ ଉପଯୁକ୍ତ ବ୍ୟବହାର ନକରିପାରିଲେ ୨୦୨୦ ବର୍ଷ ଭଳି ସ୍ଥିତି ସୃଷ୍ଟି ହେବ। ସେହି ସମୟରେ ରହି ଯାଇଥିବା ଗଚ୍ଛିତ ବଳକା ଜଳ ବନ୍ୟାଜଳରେ ପରିଣତ ହେବାର ଯଥେଷ୍ଟ ସମ୍ଭାବନା ରହିଛି। ଉଲ୍ଲେଖଯୋଗ୍ୟ ଯେ, ଗତ ୧୪ ଜୁନ୍ ୨୦୨୦ରେ ହୀରାକୁଦ ଜଳସ୍ତର ୬୦୭. ୫୬ ଫୁଟ୍ ରହିଥିଲା। ସେତେବେଳେ ଜଳସ୍ତର ୫୯୮ ଫୁଟ୍ ଛୁଇଁପାରେ।
୨୫ ଜୁନ୍ ୨୦୨୦ରେ ବନ୍ୟା ଜଳ ନିଷ୍କାସନ ବେଳକୁ ଜଳସ୍ତର ବଢ଼ି ୬୧୮ ଫୁଟ୍ ହୋଇଯାଇଥିଲା। ପ୍ରାୟ ୯.୫ ଫୁଟ୍ (ଅର୍ଥାତ ୦.୬୯୫ ନିୟୁତ ଏକର ଫୁଟ୍) ଗଚ୍ଛିତ ଜଳ ସେତେବେଳେ ବନ୍ୟାଜଳର ରୂପ ନେଇଥିଲା। ଏହା ଦ୍ବାରା ବୁର୍ଲା ଶକ୍ତି କେନ୍ଦ୍ରରୁ କେବଳ ୫୩ ନିୟୁତ ୟୁନିଟ୍ ବିଦ୍ୟୁତ୍ ଉତ୍ପାଦନ ହୋଇପାରିଥାନ୍ତା। ଏ ସଂକ୍ରାନ୍ତରେ ଜଳ ସଂପଦ ବିଭାଗର ଅବସରପ୍ରାପ୍ତ ସର୍ବୋଚ୍ଚ ଯନ୍ତ୍ରୀ ରବୀନ୍ଦ୍ର କୁମାର ପଣ୍ଡା କହିଛନ୍ତି ଯେ ଅଣମୌସୁମୀ ସମୟରେ ହୀରାକୁଦ ଜଳଭଣ୍ଡାରର ଜଳ ପରିଚାଳନା ପାଇଁ ଶକ୍ତି ବିଭାଗ ଓ ଜଳ ସଂପଦ ବିଭାଗ ଦ୍ବାରା ପ୍ରସ୍ତୁତ ମିଳିତ କାର୍ଯ୍ୟଖସଡ଼ା ଅନୁସାରେ ଜଳ ପରିଚାଳନା କଲେ ମହାନଦୀରେ ଜଳ ପ୍ରବାହ ସନ୍ତୁଳିତ ହୋଇପାରିବ। ଏଥି ସହିତ ସମସ୍ତ ଚାହିଦା ମଧ୍ୟ ପୂରଣ କରାଯାଇପାରନ୍ତା ବୋଲି ଇଂ. ପଣ୍ଡା କହିଛନ୍ତି।
ଆପଣଙ୍କୁ ଆମେ ଏମିତି ସ୍ଵାସ୍ଥ୍ୟ ,ବାସ୍ତୁ,ସ୍ପେଶାଲଖବର, ଓଲିଉଡ,ବଲିଉଡ,ଦୈନନ୍ଦିନ ରାଶିଫଳ, ସାପ୍ତାହିକ,ମାସିକ,ରାଶିଫଳ ସମ୍ଵନ୍ଧୀୟ ଖବର ଆପଣଙ୍କ ପାଇଁ ନେଇ ଆସିବୁ l ଆମ ସହ ଯୋଡ଼ି ରହିବା ପାଇଁ ଆମ ପେଜକୁ ଲାଇକ କରନ୍ତୁ ।ଆମ ତଥ୍ୟ ଭଲ ଲାଗିଲେ ସେୟାର କରନ୍ତୁ ସାଙ୍ଗ ମାନଙ୍କ ସହ ଏବଂ ମତାମତ ଦେବାକୁ ଅନୁରୋଧ,ଜଗନ୍ନାଥଙ୍କ ପାଖରେ ଏତିକି ପାର୍ଥନା ଆପଣଙ୍କୁ ଭଲରେ ରଖନ୍ତୁ ଜୟ ଜଗନ୍ନାଥ ଖବରକୁ ପୁରା ପଢିଥିବାରୁ ଧନ୍ୟବାଦ ଭଲ ଲାଗିଲେ ନିଶ୍ଚୟ ତଳେ ଲାଇକ କରିବେ l
