ନୂଆଦିଲ୍ଲୀ, ୩୧/୦୧: ଅଷ୍ଟ୍ରେଲିଆ ବିପକ୍ଷରେ ଐତିହାସିକ ବିଜୟ ହାସଲ କରିବା ପରେ ଭାରତୀୟ କ୍ରିକେଟର ଆଜିଙ୍କ୍ୟ ରାହାଣେଙ୍କୁ ଖୁବ୍ ପ୍ରଶଂସା କରାଯାଉଛି । କୋହଲିଙ୍କ ଅନୁପସ୍ଥିତିରେ ରାହାଣେଙ୍କ ନେତୃତ୍ୱରେ ଭାରତ ୨-୧ରେ ସିରିଜ କବଜା କରିଥିଲା । ସେ ଯେବେ ଭାରତ ଫେରିଲେ କଙ୍ଗାରୁ ଫଟୋ ଥିବା ଏକ କେକ୍ ନକାଟି ଚର୍ଚ୍ଚାରେ ରହିଛନ୍ତି । ସେ କଣ ପାଇଁ ଏପରି କେକ୍ କାଟିନଥିଲେ ସେନେଇ ମତ ଦେଇଛନ୍ତି ।
ରାହାଣେ କହିଛନ୍ତି ଯେ, କଙ୍ଗାରୁ ଅଷ୍ଟ୍ରେଲିଆର ଜାତୀୟ ପଶୁ । ସେ ଏପରି କରିପାରିବେ ନାହିଁ । ବିପକ୍ଷ ଦଳକୁ ସମ୍ମାନ ଦେବା ଆବଶ୍ୟକ । ଜିତିବା ପରେ ବି ବିପକ୍ଷ ଦଳ ସହ ଭଲ ବ୍ୟବହାର ପ୍ରଦର୍ଶନ କରିବା ଉଚିତ । ନିଜର ପ୍ରତିଦ୍ୱନ୍ଦ୍ୱୀ ଓ ଅନ୍ୟ ଦେଶ ପ୍ରତି ସମ୍ମାନ ପ୍ରଦର୍ଶନ କରିବା ଆବଶ୍ୟକ । ତେଣୁ ସେ କେକ୍ ନକାଟିବାକୁ ନିଷ୍ପତ୍ତି ନେଇଛନ୍ତି ।
ସୂଚନାଯୋଗ୍ୟ, ଅଷ୍ଟ୍ରେଲିଆ ବିପକ୍ଷରେ ଟେଷ୍ଟ ସିରିଜ ଜିତିବା ପରେ ରାହାଣେ ଦାଦର ସ୍ଥିତ ନିଜ ଘରକୁ ଫେରିଥିଲେ । ତାଙ୍କ ପଡୋଶୀମାନେ ଏକ ପାର୍ଟିର ଆୟୋଜନ କରିଥିଲେ । ଏହାସହ କେକ୍ ଆଣିଥିଲେ । କେକରେ କଙ୍ଗାରୁ ତିଆରି ହୋଇଥିଲା । ରାହାଣେ ଏହାକୁ ଦେଖି କାଟିବାକୁ ମନା କରିଦେଇଥିଲେ । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ସମସ୍ତେ ରାହାଣେଙ୍କ ଏପରି ବ୍ୟବହାରକୁ ପ୍ରଶଂସା କରିଛନ୍ତି ।
ରାହାଣେ ଆହୁରି ମଧ୍ୟ କହିଛନ୍ତି ଯେ, ଅଷ୍ଟ୍ରେଲିଆ ଗସ୍ତ ଶେଷ ହୋଇଯାଇଛି । ସେ ଆଉ ଅଧିନାୟକ ନୁହଁନ୍ତି । ସେ ଏବେ ଇଂଲଣ୍ଡ ବିପକ୍ଷ ସିରିଜ ଉପରେ ନଜର ରଖିଛନ୍ତି । ଏବେ ଆଗାମୀ ଲକ୍ଷ୍ୟ ଉପରେ ସେ ଅଧିକ ଧ୍ୟାନ ଦେଉଥିବା କହିଛନ୍ତି ।
