ଭୁବନେଶ୍ବର : ୨୦୨୫ ଶେଷ ସୁଦ୍ଧା ରାଜ୍ୟରେ ଇ-ଯାନ ସଂଖ୍ୟା ମୋଟ୍ ଗାଡ଼ିର ୨୦%କୁ ବଢ଼ାଇବାକୁ ରାଜ୍ୟ ସରକାର ଯୋଜନା କରିଛନ୍ତି। ଏହାକୁ ହାସଲ କରିବାକୁ ଗାଡ଼ି କ୍ରେତାଙ୍କ ପାଇଁ ସବ୍ସିଡି ବି ଘୋଷଣା କରିଛନ୍ତି। ଏହାସହ ସରକାରୀ କର୍ମଚାରୀ ଇ-ଯାନ କିଣିଲେ ବିନା ସୁଧରେ ଅଗ୍ରିମ ଆକାରରେ ଟଙ୍କା ଦିଆଯାଉଛି। ହେଲେ ବିଭିନ୍ନ ବିଭାଗର କର୍ମଚାରୀମାନେ ଲକ୍ଷାଧିକ ଟଙ୍କା ଅଗ୍ରିମ ଆକାରରେ ନେଇ ଗାଡ଼ି କିଣିନାହାନ୍ତି। ବିନା ସୁଧରେ ଅଗ୍ରିମ ମିଳୁଥିବାରୁ ବହୁ କର୍ମଚାରୀ ଟଙ୍କା ନେଇ ଖର୍ଚ୍ଚ କରିଦେଇଛନ୍ତି। ହେଲେ ଗାଡ଼ି କିଣିନାହାନ୍ତି। ବିଭିନ୍ନ ବିଭାଗର ଶତାଧିକ କର୍ମଚାରୀ ଏହି ଜାଲିଆତି କରିଥିବା ଅର୍ଥ ବିଭାଗ ନଜରକୁ ଆସିଛି।
ଏହାସହ ଏବେ ନିୟମ କରାଯାଇଛି ଯେ ଯେଉଁମାନେ ଇ-ଯାନ କିଣିବାକୁ ଅଗ୍ରିମ ଟଙ୍କା ନେବେ ସେମାନେ ତିନି ମାସ ମଧ୍ୟରେ ଗାଡ଼ିର ରେଜିଷ୍ଟ୍ରେସନ ସାର୍ଟିଫିକେଟ୍, ଇନସ୍ୟୁରାନ୍ସ ଏବଂ ରସିଦ୍ ଦାଖଲ କରିବେ। ଯଦି ଏହା ନଦେବେ ତେବେ ସେମାନଙ୍କ ଠାରୁ ଅଗ୍ରିମ ଟଙ୍କା ନେବା ଦିନରୁ ହିସାବ କରି ୧୨.୫% ସୁଧ ହାରରେ ସମସ୍ତ ଟଙ୍କା ଆଦାୟ କରିବାକୁ କୁହାଯାଇଛି।
ସୂଚନାଯୋଗ୍ୟ ଯେ ଏବେ ରାଜ୍ୟ ସରକାର ଦୁଇ ଚକିଆ ଯାନ ପାଇଁ ପ୍ରତି କିଲୋୱାଟ୍ ପିଛା ୫ହଜାର ଟଙ୍କା ଏବଂ ସର୍ବାଧିକ ୨୦ହଜାର ଟଙ୍କା ସବ୍ସିଡି ଦେଉଥିବାବେଳେ ତିନିଚକିଆ ଯାନ ପାଇଁ ୩୦ହଜାର ଟଙ୍କା, ଚାରି ଚକିଆ ଯାନ ପାଇଁ ପ୍ରତି କିଲୋୱାଟ୍ ପିଛା ୧୦ହଜାର ଟଙ୍କା ହିସାବରେ ସର୍ବାଧିକ ଦେଢ଼ ଲକ୍ଷ ଟଙ୍କାର ସବ୍ସିଡି ପ୍ରଦାନ କରୁଛନ୍ତି।
