ନୂଆଦିଲ୍ଲୀ,୧୦/୦୧: ଉତ୍ତର ପ୍ରଦେଶରେ ବାର୍ଡ-ଫ୍ଲୁ ବା ଏବିୟନ ଇଂଫ୍ଲୁଏଞ୍ଜାର ପ୍ରକୋପ ଜାରି ରହିଥିବା ବେଳେ ଏହାର ନମୂନା ସାତୋଟି ରାଜ୍ୟରେ ମିଳିଛି । ଏ ନେଇ ଗତ ଶନିବାର କେନ୍ଦ୍ର ସ୍ପଷ୍ଟ କରିଛି। ଦିଲ୍ଲୀ, ଚଣ୍ଡିଗଡ଼ ଏବଂ ମହାରାଷ୍ଟ୍ରରେ ବାର୍ଡ ଫ୍ଲୁ ହେବାର ଆଶଙ୍କା କରାଯାଉଛି । କାରଣ ଏହିସବୁ ସ୍ଥାନ ଗୁଡ଼ିକରୁ ସଂଗ୍ରହ କରାଯାଇଥିବା ନମୂନା ପରୀକ୍ଷା ହେବାକୁ ଯାଇଥିବା କେନ୍ଦ୍ର କହିଛି ।
ଉତ୍ତର ପ୍ରଦେଶ ଛଡ଼ା ଅନ୍ୟ ୬ଟି ରାଜ୍ୟରେ ବାର୍ଡ ଫ୍ଲୁର ନମୂନା ପଜିଟିଭ୍ ଆସିଛି । ସେଗୁଡ଼ିକ ମଧ୍ୟରେ କେରଳ, ରାଜସ୍ଥାନ, ହିମାଚଳ ପ୍ରଦେଶ, ହରିୟାଣା ଏବଂ ଗୁଜୁରାଟ ରହିଛନ୍ତି। ମତ୍ସ୍ୟପାଳନ, ପଶୁପାଳନ ଏବଂ ଡାଏରି ଫାର୍ମିଂ ମନ୍ତ୍ରଣାଳୟ ଏକ ବୟାନ ଜାରି କରି କହିଛି ଯେ, ବର୍ତ୍ତମାନ ୭ଟି ରାଜ୍ୟରେ ବାର୍ଡ ଫ୍ଲୁ ସ୍ପଷ୍ଟ ହୋଇଛି। ବିଭାଗ ଏ ନେଇ ପ୍ରଭାବିତ ରାଜ୍ୟ ଗୁଡ଼ିକ ସହ ପରାମର୍ଶ ଜାରି ରଖିଛି। ଆଗକୁ ଏହି ରୋଗ କିପରି ନ ବ୍ୟାପିବ ସେଥିପ୍ରତି ଧ୍ୟାନ ଦିଆଯାଉଛି।
ଛତିଶଗଡ଼ରେ କୁକୁଡ଼ା ଏବଂ ବଲୋଦ ଜିଲ୍ଲାରେ ବନ୍ୟ ପକ୍ଷୀଙ୍କର ଶୁକ୍ରବାର ରାତି ଓ ଶନିବାର ସକାଳୁ ଅସ୍ୱାଭାବିକ ମୃତ୍ୟୁ ହୋଇଥିବା ଖବର ସାମ୍ନାକୁ ଆସିଛି। ଏହାର ନମୂନା ପରୀକ୍ଷା ପାଇଁ ପ୍ରୟୋଗଶାଳାକୁ ପଠାଯାଇଛି। ଏହାଛଡ଼ା ଦିଲ୍ଲୀର ସଞ୍ଜୟ ହ୍ରଦରେ ବତକଗୁଡ଼ିକଙ୍କର ଅସ୍ୱାଭାବିକ ମୃତ୍ୟୁ ହୋଇଛି। ସେମାନଙ୍କ ନମୂନା ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି। ମନ୍ତ୍ରଣାଳୟ ଏ ନେଇ କହିଛି ଯେ ମହାରାଷ୍ଟ୍ରର ମୁମ୍ୱାଇ, ଠାଣେ, ଡପୋଲି, ପରଭାନି ଏବଂ ବିଡ୍ ଜିଲ୍ଲାରେ ଶହ ଶହ ସଂଖ୍ୟାରେ କାଉଙ୍କର ମୃତ୍ୟୁ ହୋଇଛି। ସେମାନଙ୍କ ନମୂନା ଭୋପାଳ ସ୍ଥିତ ରାଷ୍ଟ୍ରିୟ ଉଚ୍ଚ ସୁରକ୍ଷା ପଶୁରୋଗ ସଂସ୍ଥାନ ବା ଆସିଏଆରକୁ ପଠାଯାଇଛି।
