ଭୁବନେଶ୍ୱର ୧୬/୦୩: ହିନ୍ଦୁ ଧର୍ମରେ ବୃକ୍ଷ-ଲତା ପୂଜାର ବିଶେଷ ଗୁରୁତ୍ୱପୂର୍ଣ୍ଣ ରହିଛି । କିଛି ବିଶେଷ ଗଛକୁ ପୂଜା କରିବା ଦ୍ୱାରା ନବଗ୍ରହ ଶାନ୍ତ ହେବା ସହିତ ଜୀବନର ସମସ୍ୟା ମଧ୍ୟ ଦୂର ହୋଇଥାଏ । ଏଥିମଧ୍ୟରୁ ତୁଳସୀ ଗଛକୁ ବିଶେଷ ଭାବରେ ପୂଜନୀୟ ବୋଲି ବିବେଚନା କରାଯାଏ । ତୁଳସୀ ଗଛକୁ ଦେବା-ଦେବୀଙ୍କ ବାସସ୍ଥାନ ଭାବରେ ଜଣାଯାଏ । ପ୍ରତିଦିନ ତୁଳସୀ ଗଛରେ ଜଳ ଅର୍ପଣ ତଥା ପୂଜା କରିବା ଦ୍ୱାରା ସୁଖ-ସମୃଦ୍ଧି ବୃଦ୍ଧି ହୋଇଥାଏ । କିନ୍ତୁ ତୁଳସୀ ଗଛ ଶୁଖିବା ଅଶୁଭ ବୋଲି ବିବେଚନା କରାଯାଏ । ଏହାଦ୍ୱାରା ଜୀବନରେ ଅସୁବିଧାର ସମ୍ମୁଖୀନ ହେବାକୁ ପଡିଥାଏ । ବାସ୍ତୁ ଏବଂ ଜ୍ୟୋତିଷ ଶାସ୍ତ୍ର ଅନୁଯାୟୀ ତୁଳସୀ ସହିତ ଅନ୍ୟ ଗଛ ମଧ୍ୟ ଅଛି, ଯାହାର ଶୁଖିବା ଅଶୁଭ ବୋଲି କୁହାଯାଏ । ତେବେ ଚାଲନ୍ତୁ ଜାଣିବା ତୁଳସୀ ବ୍ୟତୀତ କେଉଁ ଗଛ ଝାଉଁଳିବା ଦ୍ୱାରା ଅଶୁଭ ହୋଇଥାଏ ।
ତୁଳସୀ ଗଛ :
ଭଗବାନ ବିଷ୍ଣୁଙ୍କର ତୁଳସୀ ଗଛ ଅତି ପ୍ରିୟ । ତେଣୁ ଏହାକୁ ଶ୍ରୀହରିଙ୍କ ପୂଜାରେ ସ୍ୱତନ୍ତ୍ର ଭାବେ ରଖାଯାଇଥାଏ । ବିଶ୍ୱାସ କରାଯାଏ, ତୁଳସୀ ଗଛ ଝାଉଁଳିବା ଦ୍ୱାରା ଦେବୀ ଲକ୍ଷ୍ମୀଙ୍କ ଅସନ୍ତୋଷର ସମ୍ମୁଖୀନ ହେବାକୁ ପଡିଥାଏ । ଘରେ ଆର୍ଥିକ ସମସ୍ୟା ଦେଖାଦେଇଥାଏ । ତେଣୁ ଏହା ଶୁଖିବା ମାତ୍ରେ ତୁରନ୍ତ ଏହାକୁ ବଦଳାନ୍ତୁ । ଏଥିସହ ରବିବାର ଦିନ ଛାଡି ଅନ୍ୟଦିନ ମାନଙ୍କରେ ତୁଳସୀ ଗଛରେ ପାଣି ଦେଇ ଦୀପ ଜାଳନ୍ତୁ । ଏହିଦ୍ୱାରା ଘରେ ଅନ୍ନ ଏବଂ ଧନର ଆଭାବ ଦୂର ହୋଇଥାଏ ।
ମନିପ୍ଲାଣ୍ଟ୍ :
ବାସ୍ତୁରେ ମନିପ୍ଲାଣ୍ଟକୁ ଅତ୍ୟନ୍ତ ଶୁଭ ବୋଲି ବିବେଚନା କରାଯାଏ । ଏହା ଘରେ ରହିବା ଦ୍ୱାରା ସକରାତ୍ମକତା ସଞ୍ଚାର ହୋଇଥାଏ । ଘରେ ଅସନ୍ତୋଷ ଦୂର ହୋଇ ସୁଖ, ଶାନ୍ତି ଏବଂ ସମୃଦ୍ଧି ବୃଦ୍ଧି ପାଇଥାଏ । ଆୟ ସହିତ ଜଡିତ ସମସ୍ୟାରୁ ମୁକ୍ତି ମିଳିଥାଏ । କିନ୍ତୁ ଏହାର ଶୁଖିବା ଦାରିଦ୍ର୍ୟତାର ସଂକେତ ଦେଇଥାଏ । ଏପରି ପରିସ୍ଥିତିରେ ତୁରନ୍ତ ଏହାକୁ ପରିବର୍ତ୍ତନ କରନ୍ତୁ । ଅନ୍ୟଥା, ବ୍ୟବସାୟ ଏବଂ ଚାକିରି ସମ୍ବନ୍ଧୀୟ ସମସ୍ୟାର ସମ୍ମୁଖୀନ ହେବାକୁ ପଡିପାରେ ।
ଅଶୋକ ଗଛ :
ଘରର ପ୍ରାଙ୍ଗଣ କିମ୍ବା ମୁଖ୍ୟ ଫାଟକରେ ଅଶୋକା ଗଛ ଲଗାଇବା ଅତ୍ୟନ୍ତ ଶୁଭ ବୋଲି ଜଣାଯାଇଥାଏ । ଏହାଦ୍ୱାରା ଘରେ ସକରାତ୍ମକ ଶକ୍ତି ସଞ୍ଚାର ହେବା ସହିତ ସୁଖ, ଶାନ୍ତି ଏବଂ ସମୃଦ୍ଧକୁ ବଜାୟ ରଖିଥାଏ । କିନ୍ତୁ ଏହି ଗଛ ଶୁଖିଯିବା ଘରର ଶାନ୍ତି ଭଙ୍ଗ କରିବାକୁ ସୂଚାଇଥାଏ । ତେଣୁ ଏହା ଶୁଖିବା ମାତ୍ରେ ତୁରନ୍ତ ଏହାକୁ ବଦଳାନ୍ତୁ ।
ଆମ୍ବ ଗଛ :
ଘର ବାହାରେ ଆମ୍ବ ଗଛ ଲଗାଇବା ଶୁଭ ଅଟେ । ଏହାଦ୍ୱାରା ପ୍ରଭୁ ଶ୍ରୀ ହନୁମାନ ବାସ କରିବା ସହିତ ଜୀବନର ଅସୁବିଧା ଦୂର ହୋଇ ଘରେ ସୁଖ ଆଣିଥାଏ । ଏଥିସହିତ ଏହାର ପତ୍ରକୁ ତୋରଣ ଭାବରେ ଘରର ମୁଖ୍ୟ ପ୍ରବେଶ ପଥରେ ଲଗାଇବା ଦ୍ୱାରା ଶୁଭ ବୋଲି ଜଣାଯାଇଥାଏ । ଏହା ସହିତ ଏହାର କାଠ ମଧ୍ୟ ପୂଜାରେ ବିଶେଷ ଭାବରେ ବ୍ୟବହୃତ ହୋଇଥାଏ । କିନ୍ତୁ ଏହି ଗଛ ଶୁଖିବା ଆସୁଥିବା ସଙ୍କଟକୁ ସୂଚାଇଥାଏ । ତେଣୁ ଏହାକୁ କେବେ ହେଲେ ଶୁଖିବାକୁ ଦିଅନ୍ତୁ ନାହିଁ ।
ଲାଜକୁଳି ଲତା :
ଲାଜକୁଳି ଲତା ଶନି ଦେବ ଏବଂ ଭଗବାନ ମହାଦେବଙ୍କ ଅତି ପ୍ରିୟ । ଏହା ଶୁଖିଯିବା ଶନିଙ୍କ କ୍ରୋଧ ଏବଂ ଶିବଙ୍କ ଅସାନ୍ତିର ସମ୍ମୁଖୀନ ହେବାକୁ ପଡିପାରେ । ତେଣୁ ଯଦି ଆପଣଙ୍କ ଘରେ ଲାଜକୁଳି ଲତା ଅଛି, ତେବେ ଏହାର ଯତ୍ନ ନିଅନ୍ତୁ । ଏଥିସହିତ ଶନିବାର ଦିନ ସୋରିଷ ତେଲ ଦୀପ ଜାଳି ପୂଜା କରନ୍ତୁ । ଏହା ଦ୍ୱାରା ଶନିଙ୍କ ଅଶୁଭ ପ୍ରଭାବ ଦୂର ହୋଇ ଘରେ ସୁଖ, ସମୃଦ୍ଧି ବୃଦ୍ଧି ପାଇଥାଏ ।
