ପୁଲିସ ସହ ଧସ୍ତାଧସ୍ତି: ପାଣ୍ଡିଆନ୍‌ଙ୍କ ଗସ୍ତକୁ ବିଜେପିର ବିରୋଧ

କଣିହାଁ: ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି. କେ. ପାଣ୍ଡିଆନ୍‌ ଆଜି କଣିହାଁ ବ୍ଲକ୍‌ ପବିତ୍ରନଗରକୁ ଗସ୍ତ କରିଥିବାବେଳେ ବିଜେପି ପକ୍ଷରୁ ତାଙ୍କୁ ବିରୋଧ କରାଯାଇଥିଲା। ବିଜେପି ନେତା ଓ କର୍ମୀମାନେ କଳା ପୋଷାକ ପିନ୍ଧି ବଜାର ରାସ୍ତା କଡ଼ରେ ବସି ବିକ୍ଷୋଭ କରିଥିଲେ। ମଣ୍ଡଳ ବିଜେପି ସଭାପତି ପ୍ରହଲ୍ଲାଦ ସାମଲଙ୍କ ନେତୃତ୍ୱରେ କର୍ମୀମାନେ ସକାଳେ ପରାବିଲ ପଞ୍ଚାୟତ କାର୍ଯ୍ୟାଳୟଠାରୁ ଶୋଭଯାତ୍ରାରେ ବାହାରି ସଚିବଙ୍କ ସଭାକୁ ଆସିବାବେଳେ ରାସ୍ତାରେ ପୁଲିସ ସେମାନଙ୍କୁ ଅଟକାଇଥିଲା। ଏଥିଯୋଗୁଁ ପୁଲିସ ଓ କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏହାପରେ ସେମାନେ ରାସ୍ତାକଡ଼ରେ ବସି ଆନ୍ଦୋଳନ କରିଥିଲେ। ସେହିଭଳି କିଶୋରନଗର ହାଇସ୍କୁଲ ପଡ଼ିଆଠାରେ ମଧ୍ୟ ବିଜେପି ପକ୍ଷରୁ ତାଙ୍କୁ ବିରୋଧ ପ୍ରଦର୍ଶନ କରାଯାଇଥିଲେ। ବିଜେପି ନେତା ଓ କର୍ମୀମାନେ କଳାପୋଷାକ ପିନ୍ଧି ତାଙ୍କୁ ପ୍ରତିବାଦ ଜଣାଇଥିଲେ।