କଟକ: ସାରା ଦେଶରେ ଡାକ୍ତରୀ ନାମ ଲେଖା ପାଇଁ ହୋଇଥିବା କେଳେଙ୍କାରୀ ଘଟଣାରେ କ୍ରାଇମବ୍ରାଞ୍ଚକୁ ଚାଞ୍ଚଲ୍ୟକର ତଥ୍ୟ ହସ୍ତଗତ ହୋଇଛି। ଠକେଇ ଗ୍ୟାଙ୍ଗର ଜଣେ ସଦସ୍ୟ ଜଗତପୁର ରେସମା ସାଇନ୍ସ କଲେଜ ମାଲିକ ତଥା ସଭାପତି ରଘୁନାଥ ବେହେରା ନିଜକୁ କଟକ ବଡ଼ ଡାକ୍ତରଖାନା ମେଡିସିନ୍ ବିଭାଗର ଡାକ୍ତର ପରିଚୟ ଦେଉଥିଲା। ଏହି ପରିଚୟ ଆଧାରରେ ଏହି ଗ୍ୟାଙ୍ଗର ୯ ଜଣ ସଦସ୍ୟ ସାରା ଦେଶରେ ୧୦ କୋଟିରୁ ଅଧିକ ଟଙ୍କା ଠକେଇ କରିଛନ୍ତି। କମିସନରେଟ୍ ପୁଲିସ ସମେତ ସାରା ଦେଶରେ ଏହି ଗ୍ୟାଙ୍ଗ ବିରୋଧରେ ବର୍ତ୍ତମାନ ସୁଦ୍ଧା ୨୩ ଠକେଇ ମାମଲା ରୁଜୁ ହୋଇଥିବା କ୍ରାଇମବ୍ରାଞ୍ଚ ଜାଣିବାକୁ ପାଇଛି। ଶୁଭାଶିଷ ପତିକୁ ଗିରଫ ପରେ ଏଭଳି ଅନେକ ହୋସ୍ ଉଡ଼ାଇଲା ଭଳି ତଥ୍ୟ ସାମନାକୁ ଆସିଛି।
ପୁରୀ ଜିଲ୍ଲା ନିମାପଡ଼ାର ମେକାନିକାଲ୍ ଇଞ୍ଜିନିୟର ସୌମ୍ୟକାନ୍ତ ସମେତ ୭ ଜଣ ସଦସ୍ୟ ନିଜକୁ କଟକ ଜଗତପୁର ରେସମା ସାଇନ୍ସ କଲେଜର କର୍ମଚାରୀ ପରିଚୟ ଦେଉଥିଲା। ଏହି ଗ୍ୟାଙ୍ଗ ସଦସ୍ୟ ଶୁଭାଶିଷ ପତି, ଇଲୟାଜ ଖାନ୍, ଆଶିଷ, ଅନିଲ କୁମାର, ଶୈଳେନ୍ଦ୍ର ଚକ୍ରବର୍ତ୍ତୀ, ଦୁଷ୍ମନ୍ତ ପଣ୍ତା, ମଳୟ ପଟ୍ଟନାୟକ କଟକ ସିଡିଏ ସେକ୍ଟର ୯ରେ ଏକାଠି ରହୁଥିଲେ। ଗ୍ୟାଙ୍ଗରେ ଜଗତପୁର ରେସମା ସାଇନ୍ସ କଲେଜ ମାଲିକ ତଥା ସଭାପତି ରଘୁନାଥ ବେହେରା ହାତ ମିଳାଇଥିଲା। ସୌମ୍ୟକାନ୍ତର ଭୁବନେଶ୍ବର ରସୁଲଗଡ଼ ଛକରେ ଥିବା ଏସପ୍ଲାନେଡରେ ଏକ କୋଚିଂ ସେଣ୍ଟରରୁ ଛାତ୍ରଛାତ୍ରୀଙ୍କୁ ଏକାଠି କରାଯାଉଥିଲା। ମେଧା ଛାତ୍ରଛାତ୍ରୀଙ୍କ ଅଭିଭାବକଙ୍କୁ ଇଲ୍ୟାଜ ଫୋନ୍ କରି ଜଗତପୁରରେ ଥିବା ରେସମା ସାଇନ୍ସ କଲେଜ ନିକଟରେ ଥିବା ଏକ ଅଫିସକୁ ଡାକୁଥିଲା। ୨୦୧୫ରୁ ଏହି ଗ୍ୟାଙ୍ଗ ଏଭଳି କେଳେଙ୍କାରୀ ଆରମ୍ଭ କରିଥିଲେ। ରଘୁନାଥ ଅଭିଭାବକଙ୍କୁ କାଉନସେଲି˚ ବେଳେ ନିଜକୁ ଡାକ୍ତର ବୋଲି ପରିଚୟ ଦେବାକୁ ଯାଇ ଷ୍ଟେଥା ବ୍ୟବହାର କରୁଥିଲା। କଟକ ବଡ଼ ଡାକ୍ତରଖାନା ମେଡିସିନ୍ ବିଭାଗର ଡାକ୍ତର ବୋଲି ପରିଚୟ ଦେଉଥିଲା। ଅଭିଭାବକଙ୍କୁ କାଉନସେଲି˚ କରିବା ପରେ ମର୍କତନଗର ଥାନା ସିଡିଏ ସେକ୍ଟର ୬ରେ ଥିବା ସୌମ୍ୟକାନ୍ତର ଅଫିସକୁ ନେଇ ଆର୍ଥିକ କାରବାର ହେଉଥିଲା।
ସିଡିଏରେ ଥିବା ଅଫିସ୍ରେ ଟଙ୍କା କାରବାର; କଟକରୁ କର୍ଣ୍ଣାଟକ ଯାଏ ମାମଲା
ଠାବ ହେଲାଣି ୨୩ ମାମଲା, ୮ ମେଡିକାଲ୍ କଲେଜ ନାଁରେ ଠକେଇ
ଛାତ୍ରଛାତ୍ରୀଙ୍କୁ କଟକ ବଡ଼ ମେଡିକାଲ୍ ସମେତ ବେଙ୍ଗାଲୁରୁ ଓ ମହାରାଷ୍ଟ୍ରରେ ଥିବା ସରକାରୀ ଓ ଘରୋଇ ମେଡିକାଲ୍ କଲେଜରେ ନାମ ଲେଖାଇବାର ଲୋଭନୀୟ ପ୍ରତିଶ୍ରୁତି ଦିଆଯାଉଥିଲା। ଏହି ମେଡିକାଲ୍ କଲେଜର ତାଲିକା କ୍ରାଇମବ୍ରାଞ୍ଚ ହାତରେ ଲାଗିଛି। ଯେଉଁ ୮ଟି ମେଡିକାଲ୍ କଲେଜ ନାଁ ଏହି ଠକ ବ୍ୟବହାର କରୁଛନ୍ତି ଏଥିରେ କଟକ ବଡ଼ ମେଡିକାଲ କଲେଜ, ହସ୍ପିଟାଲ୍ ଓ ଭୁବନେଶ୍ବରର କିମସ୍ ସମେତ ବେଙ୍ଗାଲୁରୁର ଏମଏସ୍ ରାମେୟା ମେଡିକାଲ୍ କଲେଜ, ଏମଭିଜେ ମେଡିକାଲ୍ କଲେଜ ଆଣ୍ତ ରିସର୍ଚ୍ଚ, ବୈଦେହି ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ଆଣ୍ତ ରିସର୍ଚ୍ଚ ସେଣ୍ଟର, ବି.ଆର୍ ଆମ୍ବେଦକର ମେଡିକାଲ୍ କଲେଜ, ବିଜିଏସ୍ ଗ୍ଲୋବାଲ ଇନଷ୍ଟିଚ୍ୟୁଟ ଅଫ୍ ମେଡିକାଲ୍ ସାଇନ୍ସ ଓ ବିଏମଏସ୍ ମେଡିକାଲ୍ କଲେଜ। ଏହି କଲେଜରେ ନାଁ ଲେଖାଇବା ପୂର୍ବରୁ ଅଭିଭାବକମାନେ ସେମାନଙ୍କୁ ଟଙ୍କା ଦେବା ପରେ ସେମାନଙ୍କ ମୋବାଇଲକୁ ଏକ କନଫରମେସନ୍ ମ୍ୟାସେଜ୍ ଯାଉଥିଲା। ଅନ୍ୟପଟେ ରଘୁନାଥ ତା ନାଁ ପୂର୍ବରୁ ‘ଡାକ୍ତର ଲେଖୁଥିବା ବେଳେ କଟକ ବଡ଼ ମେଡିକାଲ୍ର ଜଣେ ଡାକ୍ତର ପରିଚୟ ଦେଉଥିଲା। କଟକ ବଡ଼ ଡାକ୍ତରଖାନାର ଷ୍ଟାମ୍ପ ବ୍ୟବହାର କରୁଥିଲା। ତେବେ ବଡ଼ ଡାକ୍ତରଖାନା ମେଡିସିନ୍ ବିଭାଗକୁ କ୍ରାଇମବ୍ରାଞ୍ଚ ସ୍କାନରକୁ ଆଣିଛି।
ଡାକ୍ତରୀ ପଢ଼ିବାକୁ ଇଚ୍ଛୁକ ଛାତ୍ରଛାତ୍ରୀଙ୍କ ଟଙ୍କା ଲୁଟ୍ ଘଟଣାରେ କ୍ରାଇମବ୍ରାଞ୍ଚ ଏମାନଙ୍କ ଠକେଇ ପଞ୍ଜିକା ଖୋଲିଛି। ଏହି ଠକ ଗ୍ୟାଙ୍ଗ ବିରୋଧରେ କମିସନରେଟ୍ ପୁଲିସରେ ମୋଟ ୫ଟି ମାମଲା ରୁଜୁ ହୋଇଛି। ମଞ୍ଚେଶ୍ବର ଥାନାରେ ସୌମ୍ୟକାନ୍ତ ମହାନ୍ତିଙ୍କ ସମେତ ୭ ଜଣ ସହଯୋଗୀଙ୍କ ବିରୋଧରେ ୨୦୧୭ରେ ୨୨ ଲକ୍ଷ ଟଙ୍କା ଠକେଇ ମାମଲା ରୁଜୁ ହୋଇଥିଲା। ୨୦୧୮ ଅକ୍ଟୋବର ୧୨ରେ ମର୍କତନଗର ଥାନାରେ ୧୭ ଲକ୍ଷ ୭୨ ହଜାର ଟଙ୍କା ଠକେଇ ମାମଲା ରୁଜୁ ହୋଇଥିଲା। ସେହିଭଳି ୨୦୧୮ ଅକ୍ଟୋବର ୧୨ ତାରିଖରେ ମର୍କତନଗର ଥାନାରେ ୧୭ ଲକ୍ଷ ୨୨ ହଜାର ଟଙ୍କା ଠକିଥିବା ମାମଲା ହୋଇଛି। ୨୦୧୯ ମାର୍ଚ୍ଚ ୨୭ରେ ମର୍କତନଗର ଥାନାରେ ତୃତୀୟ ମାମଲାରେ ୧୭ ଲକ୍ଷ ୨୦ ହଜାର ଟଙ୍କା ଲୁଟିଥିବା ମାମଲା ହୋଇଛି। ୨୦୧୯ରେ ଇନଫୋସିଟି ଥାନାରେ ୧୮ ଲକ୍ଷ ଟଙ୍କା ଠକେଇ ମାମଲା ରୁଜୁ କରିଥିଲା। ଅନ୍ୟପଟେ ଓଡ଼ିଶା କ୍ରାଇମ୍ବ୍ରାଞ୍ଚରେ ୨୦୧୯ ଜୁନ ୨୪ରେ ଏହି ୭ ଜଣଙ୍କ ବିରୋଧର ୬୯ ଲକ୍ଷ ଟଙ୍କାର ଠକେଇ ମାମଲା ହୋଇଥିଲା। ସେହିଭଳି ୧୮ ଲକ୍ଷ ୫୦ ହଜାର ଟଙ୍କା ଠକେଇ ହୋଇଥିବା କ୍ରାଇମବ୍ରାଞ୍ଚରେ ୨୦୧୯ ଡିସେମ୍ବର ୧୬ରେ ଦ୍ବିତୀୟ ମାମଲା ରୁଜୁ ହୋଇଥିଲା। କର୍ଣ୍ଣାଟକ ବେଙ୍ଗାଲୁରୁର କ୍ୟୁବନ୍ ପାର୍କ ପୁଲିସ ଷ୍ଟେସନ୍ରେ ସୌମ୍ୟକାନ୍ତ ସମେତ ୧୦ ଜଣଙ୍କ ବିରୋଧରେ ୬ଟି ମାମଲା ଏବଂ ହାଇ ଗ୍ରାଉଣ୍ତସ୍ ଥାନାରେ ୩ଟି ମାମଲା ରୁଜୁ ହୋଇଛି। ସେହିପରି ଝାରସୁଗୁଡ଼ାରେ ୧୨ ଲକ୍ଷ ଟଙ୍କାର ଠକେଇ ନେଇ ଗୋଟିଏ ମାମଲା ହୋଇଥିଲା। ଛତିଶଗଡ଼ରେ ୩ଟି ଓ ହିମାଚଳ ପ୍ରଦେଶ, ମଧ୍ୟପ୍ରଦେଶ, ଉତ୍ତର ପ୍ରଦେଶରେ ଗୋଟିଏ ଲେଖାଏ ମାମଲା ରୁଜୁ ହୋଇଥିଲା।
