ନୂଆଦିଲ୍ଲୀ ୧୧/୧୨ : ଦୁନିଆକୁ ଜିନ୍ସ ଆମେରିକା ଆଣିଛି। ଜିନ୍ସ ଆମେରିକାରୁ ଆରମ୍ଭ ହୋଇ ଦୁନିଆର କୋଣ ଅନୁକୋଣରେ ପହଞ୍ଚିଛି। ଜିନ୍ସ ଆଜିକା ସମୟର ଫ୍ୟାଶନ ଷ୍ଟେଟମେଣ୍ଟ। ଆଜିର ଏହି ଟ୍ରେଣ୍ଡ ଜିନ୍ସ ଅସଲରେ ଶ୍ରମିକମାନଙ୍କ ପାଇଁ ତିଆରି କରାଯାଇଥିଲା। ଶ୍ରମିକଙ୍କ ପୋଷାକ ଅଧିକ ମଇଳା ହେବନି ଏବଂ ବାରମ୍ବାର ତାକୁ ସଫା କରିବାକୁ ପଡ଼ିବନି ବୋଲି ଜିନ୍ସ ତିଆରି କରାଯାଇଥିଲା। କିନ୍ତୁ ବର୍ତ୍ତମାନ ଯୁଗରେ ସମସ୍ତେ ଜିନ୍ସ ପିନ୍ଧୁଛନ୍ତି। ପୁରୁଷ ହେଉ କି ମହିଳା ସମସ୍ତଙ୍କୁ ଜିନ୍ସ ପିନ୍ଧିବା ପସନ୍ଦ। ତେବେ ଆମେ ସମସ୍ତେ ଜାଣିଛେ ଯେ ଜିନ୍ସର ଆଗପଟ ପକେଟରେ ଏକ ଛୋଟ ପକେଟ ଥାଏ। ଏହି ଛୋଟ ପକେଟରେ ଲୋକେ ସାଧାରଣତଃ ଚିଲର ଟଙ୍କା ରଖିଥାନ୍ତି। କିନ୍ତୁ ଏହି ଛୋଟ ପକେଟ ତିଆରି କରିବା ପଛରେ କାରଣ ଜାଣିଛନ୍ତି କି ?
ଜିନ୍ସର ଇତିହାସ ବହୁତ ପୁରୁଣା। ଜିନ୍ସର ପକେଟ ଭିତରେ ଆଉ ଆଉ ଛୋଟ ପକେଟ ତିଆରି କରାଯାଇଥାଏ। ଏଥିରେ ଲୋକେ ଖୁଚୁରା ଟଙ୍କା ରଖିଥାନ୍ତି। କିନ୍ତୁ ଏହା ଅନ୍ୟ କାରଣ ପାଇଁ ତିଆରି ହୋଇଥିଲା। ଏଥିରେ ଛୋଟ ଘଣ୍ଟା ରଖିବାକୁ ବ୍ୟବହାର କରାଯାଇଥାଏ। ୧୮ ଶତାବ୍ଦୀରେ ଛୋଟ ଚେନଯୁକ୍ତ ଘଣ୍ଟା ବ୍ୟବହୃତ ହେଉଥିଲା। ସେହି ଘଣ୍ଟା ରଖିବାକୁ ପକେଟରେ ସ୍ପେସ ତିଆରି କରାଯାଇଥିଲା। ଲେଭି ଷ୍ଟ୍ରାସ ନାମକ କମ୍ପାନୀ ଏହି ଛୋଟ ପକେଟ ତିଆରି କରିବା ଆରମ୍ଭ କରିଥିଲା। ଏହି କମ୍ପାନୀର ନାଁ ବର୍ତ୍ତମାନ ଲିଭାଇସ।
ଜିନ୍ସର ଡାହାଣ ପଟେ ଥିବା ଏହି ପକେଟକୁ ୱାଚ୍ ପକେଟ କୁହାଯାଏ। ପୁରାତନ ସମୟରେ କାଓବଏଜ ଏଥିରେ ଚେନଯୁକ୍ତ ଘଣ୍ଟା ରଖୁଥିଲେ। କିନ୍ତୁ ପରେ ଏହି ଘଣ୍ଟାର ଚଳନ କମିଗଲା। ଫଳରେ ଲୋକେ ଭାବିଲେ ଏହାକୁ ଖୁଚୁରା ରଖିବା ପାଇଁ ତିଆରି କରାଯାଇଛି। ପରେ ଲୋକେ ଏହି ୱାଚ୍ ପକେଟକୁ ଏତେ ପସନ୍ଦ କଲେ ଯେ ଏହି ଚଳନ ଏବେ ବି ଚାଲିଛି।
