ଭୁବନେଶ୍ବର: ସାର୍ବଜନୀନ ଚକ୍ଷୁ ସ୍ବାସ୍ଥ୍ୟ କାର୍ଯ୍ୟକ୍ରମ ‘ସୁନେତ୍ର’ ଯୋଜନାର କାର୍ଯ୍ୟକାଳ ଆଉ ବର୍ଷେ ବଢ଼ିଛି। ୨୦୧୭ ମସିହା ଅକ୍ଟୋବର ୧୨ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସାର୍ବଜନୀନ ଚକ୍ଷୁ ସ୍ବାସ୍ଥ୍ୟ କାର୍ଯ୍ୟକ୍ରମ ‘ସୁନେତ୍ର’ ଯୋଜନା ଆରମ୍ଭ କରିଥିଲେ। ୫ବର୍ଷ ପାଇଁ ୬ଶହ କୋଟି ଟଙ୍କାର ବ୍ୟୟବରାଦ କରାଯାଇଥିଲା। ରାଜ୍ୟରେ ୨୫ ପ୍ରତିଶତ ଅନ୍ଧତ୍ବ ଦୂରୀକରଣ ଲକ୍ଷ୍ୟ ରଖିଥିଲେ ସରକାର। ତେବେ କୋଭିଡ୍ ପାଇଁ ଅନ୍ଧତ୍ବ ଦୂରୀକରଣ କାର୍ଯ୍ୟକ୍ରମ ବାଧାପ୍ରାପ୍ତ ହୋଇଥିଲା।
ଅନ୍ୟପକ୍ଷରେ ସରକାର ଗତବର୍ଷ କେନ୍ଦ୍ର ସରକାରଙ୍କ ପକ୍ଷରୁ ଆସନ୍ତା ୩ବର୍ଷ ପାଇଁ ୧୨ଲକ୍ଷ ମୋତିଆବିନ୍ଦୁ ଅସ୍ତ୍ରୋପଚାର ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଫଳରେ ଏହି ଯୋଜନାର ଗୁରୁତ୍ବ ବଢ଼ିଯାଇଥିଲା। ଉଦ୍ବେଗର ବିଷୟ ହେଉଛି ଯେ ରାଜ୍ୟରେ ଚକ୍ଷୁ ଅସ୍ତ୍ରୋପଚାର ପାଇଁ ଅପ୍ଥାଲମିକ୍ ବା ଚକ୍ଷୁରୋଗ ବିଶେଷଜ୍ଞ ସହିତ ଅପଥାଲମିକ୍ ସହାୟକ ନାହାନ୍ତି। ୭୦ରୁ ଅଧିକ ପଦବି ଖାଲି ପଡ଼ିଛି। ସେମାନଙ୍କ କ୍ୟାଡର ପୁନର୍ଗଠନ ହୋଇନାହିଁ ଏବଂ କେବେସୁଦ୍ଧା କରାଯିବ ତାହାର ନିର୍ଦ୍ଦିଷ୍ଟ ସୂଚନା ମଧ୍ୟ ନାହିଁ। ପରିଣାମ ହେଲା, ପ୍ରତିବର୍ଷ ମୋତିଆବିନ୍ଦୁ ଅସ୍ତ୍ରୋପଚାର ପାଇଁ ଯେତିକି ଲକ୍ଷ୍ୟ ଧାର୍ଯ୍ୟ କରାଯାଉଛି ତାହା ପୂରଣ ହୋଇପାରୁନାହିଁ।
ରାଜ୍ୟ ସ୍ବାସ୍ଥ୍ୟ ବିଭାଗର ଜଣେ ଅଧିକାରୀ କହିଛନ୍ତି, ‘ସୁନେତ୍ର’ ଯୋଜନାକୁ ଆଉ କିଛି ବର୍ଷ ବଢ଼ାଇବା ପାଇଁ ପ୍ରସ୍ତାବ ଦିଆଯାଇଛି। ଯାହାଫଳରେ ରାଜ୍ୟ ସରକାର ସମସ୍ତଙ୍କୁ ଚକ୍ଷୁ ସେବା ପ୍ରଦାନ ପାଇଁ ଯେଉଁ ଲକ୍ଷ୍ୟ ରଖିଛନ୍ତି ତାହା ପୂରଣ ହୋଇପାରିବ। କୋଭିଡ୍ ପରେ ମୋତିଆବିନ୍ଦୁ ଅସ୍ତ୍ରୋପଚାରରେ ବୃଦ୍ଧି ଘଟିଛି। ୨୦୨୨-୨୩ ବର୍ଷରେ ରାଜ୍ୟରେ ୧୦୧ ପ୍ରତିଶତ ବା ୩.୨ଲକ୍ଷ ମୋତିଆବିନ୍ଦୁ ଅସ୍ତ୍ରୋପଚାର ସମ୍ଭବ ହୋଇପାରିଛି। ୨୦୨୩-୨୪ବର୍ଷ ପାଇଁ ୩.୮ଲକ୍ଷ ମୋତିଆବିନ୍ଦୁ ଅସ୍ତ୍ରୋପଚାର ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ରାଜ୍ୟ ସମସ୍ତ ସରକାରୀ ଓ ସହକାରୀ ଅନୁଦାନପ୍ରାପ୍ତ ସ୍କୁଲରେ ପିଲାମାନଙ୍କ ଚକ୍ଷୁ ପରୀକ୍ଷା କରାଯାଇ ସେମାନଙ୍କୁ ଚଷମା ପ୍ରଦାନ କରାଯିବାର ବ୍ୟବସ୍ଥା କରାଯାଇଛି।
ଏହାସହ ବଳକା ଥିବା ୧୦୨ଟି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର(ସିଏଚ୍ସି)ରେ ଭିଜନ୍ ସେଣ୍ଟର ଖୋଲାଯିବ। ଜିଲ୍ଲା ମୁଖ୍ୟ ଚିକିତ୍ସାଳୟର ଚକ୍ଷୁ ବିଭାଗକୁ ଅପଗ୍ରେଡ୍ କରାଯିବ। ତେବେ ଡାଇବେଟିକ୍ ରେଟିନୋପ୍ୟାଥିର ଶିକାର ରୋଗୀଙ୍କ ପାଇଁ ରାଜ୍ୟ ସରକାରଙ୍କ ପକ୍ଷରୁ ଦାମୀ ରାନିବିଜୁମା ଇଞ୍ଜେକସନ୍ ପ୍ରଦାନ କରାଯାଉଛି। ହେଲେ ଏହାକୁ ପ୍ରଦାନ କରିବାକୁ ହେଲେ ଚକ୍ଷୁରୋଗ ବିଶେଷଜ୍ଞଙ୍କୁ ସ୍ବତନ୍ତ୍ର ତାଲିମର ଆବଶ୍ୟକତା ରହିଛି। ତେଣୁ ୨ମାସ ପାଇଁ ଚକ୍ଷୁ ରୋଗ ବିଶେଷଜ୍ଞଙ୍କୁ ତାଲିମ୍ ଦିଆଯିବ ଓ ପ୍ରଥମ ପର୍ଯ୍ୟାୟରେ ୪ଜଣ ନେଇ ସାରିଲେଣି। ପ୍ରତି ଜିଲ୍ଲା ମୁଖ୍ୟ ଚିକିତ୍ସାଳୟର ଜଣେ ଡାକ୍ତରଙ୍କୁ ଏହି ତାଲିମ୍ ପ୍ରଦାନ କରାଯିବ ବୋଲି ଅଧିକାରୀ ଜଣକ ସୂଚନା ଦେଇଛନ୍ତି।
