ଭୋପାଳ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଭୁଲ୍ ଆର୍ଥିକ ନୀତି ଯୋଗୁଁ ଦେଶରେ ବେକାରୀ ସମସ୍ୟା ଭୟାନକ ସ୍ଥିତିରେ ଅଛି ଏବଂ ଏହା ପାକିସ୍ତାନ ତୁଳନାରେ ଦୁଇଗୁଣ ବୋଲି କଂଗ୍ରେସ ନେତା ରାହୁଲ ଗାନ୍ଧି ମଧ୍ୟପ୍ରଦେଶରେ ଏକ ରୢାଲିରେ କହିଛନ୍ତି। ବିମୁଦ୍ରୀକରଣ ଏବଂ ସାମଗ୍ରୀ ଓ ସେବା ଟିକସ (ଜିଏସ୍ଟି) ଲାଗୁ କରିବା ଭଳି ବଡ଼ ନିଷ୍ପତ୍ତି ଦ୍ୱାରା ପ୍ରଧାନମନ୍ତ୍ରୀ କ୍ଷୁଦ୍ର ବ୍ୟବସାୟକୁ ଶେଷ କରିଦେଇଛନ୍ତି ବୋଲି ରାହୁଲ ରବିବାର ଦାବି କରିଛନ୍ତି। ଭାରତ ଯୋଡୋ ନ୍ୟାୟ ଯାତ୍ରା ଅବସରରେ ଗ୍ବାଲିୟରରେ ଏକ ସମାବେଶକୁ ସମ୍ବୋଧିତ କରି ସେ କହିଛନ୍ତି ଯେ ମୋଦୀଙ୍କ ନୀତି ଯୋଗୁଁ ବାଂଲାଦେଶ, ଭୁଟାନ ଏବଂ ପାକିସ୍ତାନ ତୁଳନାରେ ଭାରତରେ ବେକାରୀ ଅଧିକ ରହିଛି। ଏବେ ଦେଶରେ ଗତ ୪୦ ବର୍ଷ ମଧ୍ୟରେ ସର୍ବାଧିକ ବେକାରୀ ସମସ୍ୟା ଦେଖାଦେଇଛି। ପାକିସ୍ତାନ ତୁଳନାରେ ଭାରତରେ ବେକାରି ଦୁଇଗୁଣ ରହିବା ଆମ ପାଇଁ ଲଜ୍ଜାକର ବୋଲି ସେ କହିଛନ୍ତି।
ରାହୁଲ କହିଛନ୍ତି ଯେ ଆମର ପ୍ରଥମ ଭାରତ ଯୋଡ଼େ ଯାତ୍ରା ସମୟରେ ଲୋକମାନେ ଆମକୁ ବେକାରୀ ଓ ଦାରିଦ୍ରୢ ସଂପର୍କରେ ଅନେକ କଥା କହିଥିଲେ। ଉତ୍ତର-ପୂର୍ବ ରାଜ୍ୟଗୁଡ଼ିକର ସ୍ଥିତି ଅତି ଖରାପ ଏବଂ ଏଥିରେ ପରିବର୍ତ୍ତନ ଆଣିବାକୁ ଆମେ ନ୍ୟାୟ ଯାତ୍ରା ଆରମ୍ଭ କରିଛୁ ବୋଲି ସେ କହିଛନ୍ତି। ସରକାରଙ୍କ ରେଳବାଇ ନୀତିକୁ ମଧ୍ୟ ରାହୁଲ କଡ଼ା ସମାଲୋଚନା କରିଛନ୍ତି । ଧନୀ ଲୋକଙ୍କୁ ଦୃଷ୍ଟିରେ ରଖି କେନ୍ଦ୍ର ସରକାର ଭାରତୀୟ ରେଳବାଇର ନୀତି ପ୍ରସ୍ତୁତ କରୁଛନ୍ତି ବୋଲି ଦର୍ଶାଇ ସେ କହିଛନ୍ତି ଯେ ପ୍ରତିବର୍ଷ ଭଡ଼ାରେ ୧୦ ପ୍ରତିଶତ ବୃଦ୍ଧି ହେଉଛି। ଅତ୍ୟାଧୁନିକ ଟ୍ରେନ୍ ଚିତ୍ର ଦେଖାଇ ଲୋକଙ୍କୁ ପ୍ରଲୋଭିତ କରାଯାଉଛି ବୋଲି ପୂର୍ବତନ କଂଗ୍ରେସ ସଭାପତି କହିଛନ୍ତି। ଏସି କୋଚ୍ ସଂଖ୍ୟା ବଢ଼ାଇବା ପାଇଁ ଜେନେରାଲ କୋଚ୍ ସଂଖ୍ୟା ହ୍ରାସ କରାଯାଉଛି। ଏସି କୋଚ୍ର ଉତ୍ପାଦନ ମଧ୍ୟ ସାଧାରଣ କୋଚ୍ ତୁଳନାରେ ତିନି ଗୁଣ ବୃଦ୍ଧି କରାଯାଇଛି। ଏହା ସାଧାରଣ ଲୋକଙ୍କ ପ୍ରତି ଅନ୍ୟାୟ ବୋଲି ସେ କହିଛନ୍ତି।
