ନୂଆଦିଲ୍ଲୀ: ଜାତୀୟ ରାଜଧାନୀକୁ କୃଷକଙ୍କ ଟ୍ରାକ୍ଟର ଶୋଭାଯାତ୍ରା ପାଇଁ ସୋମବାର ଦିଲ୍ଲୀ-ଉତ୍ତରପ୍ରଦେଶ ସୀମାରେ ଯାତାୟାତ ପ୍ରଭାବିତ ହୋଇଛି। ସୋମବାର ଯମୁନା ଏକ୍ସପ୍ରେସ୍ୱେ, ଲୁହର୍ଲି ଟୋଲ ପ୍ଲାଜା ଏବଂ ମହାମାୟା ଫ୍ଲାଏଓଭର ଦେଇ ଟ୍ରାକ୍ଟରରେ ଚାଷୀମାନେ ପ୍ରତିବାଦ ଶୋଭାଯାତ୍ରା କରିବାକୁ ଯୋଜନା କରିଛନ୍ତି। ଦିଲ୍ଲୀ ପୁଲିସ ସୀମାରେ ବ୍ୟାରିକେଡ୍ ଲଗାଇ ଚେକିଂକୁ ଜୋରଦାର କରିଛି।
ଚେକିଂ ଯୋଗୁଁ ଦିଲ୍ଲୀରୁ ନଏଡା ଅଭିମୁଖେ ଚିଲ୍ଲା ସୀମାରେ ଆଜି ପ୍ରବଳ ଟ୍ରାଫିକ୍ ଭିଡ଼ ହୋଇଥିଲା। ଦିଲ୍ଲୀ-ନଏଡା ଏକ୍ସପ୍ରେସ୍ୱେରେ ମଧ୍ୟ ଭିଡ଼ ପ୍ରବଳ ଥିଲା। ଆଜି ସକାଳେ ଗୌତମବୁଦ୍ଧ ନଗର ପୁଲିସ କହିଛି ଯେ ଜାତୀୟ ରାଜଧାନୀ ଓ ନଏଡା ମଧ୍ୟରେ ଥିବା ସମସ୍ତ ସୀମାରେ ବାରିକେଡ୍ ଲଗାଇ ଦିଲ୍ଲୀ ପୁଲିସ ଓ ଜିଲ୍ଲା ପୁଲିସ ପକ୍ଷରୁ କଡ଼ା ଚେକିଂ କରାଯିବ। ପରିସ୍ଥିତିକୁ ଦୃଷ୍ଟିରେ ରଖି ଟ୍ରାଫିକ୍କୁ ଡାଇଭର୍ଟ କରାଯିବ ବୋଲି କୁହାଯାଇଛି। ଚାଲିଥିବା କୃଷକ ଆନ୍ଦୋଳନ ଯୋଗୁଁ ଦିଲ୍ଲୀ ଓ ହରିୟାଣା ମଧ୍ୟରେ ସିଂଘୁ ଏବଂ ଟିକ୍ରି ସୀମାରେ ଟ୍ରାଫିକ୍ ଚଳାଚଳ ମଧ୍ୟ ପ୍ରଭାବିତ ହୋଇଛି। କୃଷକମାନଙ୍କ ‘ଦିଲ୍ଲୀ ଚଲୋ’ ଶୋଭାଯାତ୍ରାକୁ ଦୃଷ୍ଟିରେ ରଖି ସିଲ୍ ହେବାର ପ୍ରାୟ ଦୁଇ ସପ୍ତାହ ପରେ ଶନିବାର କର୍ତ୍ତୃପକ୍ଷ ସିଂଘୁ ଓ ଟିକ୍ରି ସୀମା ପଏଣ୍ଟକୁ ଆଂଶିକ ଭାବେ ଖୋଲିଥିଲେ। ଫସଲର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ଏବଂ କୃଷି ଋଣ ଛାଡ଼ ସମେତ ସେମାନଙ୍କ ଦାବିକୁ ନେଇ ପଞ୍ଜାବର କୃଷକମାନେ ବିଜେପି ନେତୃତ୍ୱାଧୀନ କେନ୍ଦ୍ର ସରକାର ଉପରେ ଚାପ ପକାଇବା ପାଇଁ ପ୍ରତିବାଦ ଶୋଭାଯାତ୍ରା ଆରମ୍ଭ କରିବା ପରେ ଫେବ୍ରୁଆରି ୧୩ ତାରିଖରେ ଏହି ଦୁଇଟି ସୀମା ପଏଣ୍ଟକୁ ସିଲ୍ କରାଯାଇଥିଲା।
ଦିଲ୍ଲୀଠାରୁ ପ୍ରାୟ ୨୦୦ କିଲୋମିଟର ଦୂର ଅମ୍ବାଲା ନିକଟରେ ଥିବା ପଞ୍ଜାବ-ହରିୟାଣା ସୀମାରେ ହଜାର ହଜାର କୃଷକ ଡେରା ପକାଇଛନ୍ତି। ଏହାବ୍ୟତୀତ ରାଜଧାନୀର ଅନ୍ୟାନ୍ୟ ସ୍ଥାନରେ ମଧ୍ୟ ଟ୍ରାଫିକ୍ ପ୍ରବଳ ରହିଥିଲା। ଅପସରା ସୀମା ଓ ଆନନ୍ଦ ବିହାର ମଧ୍ୟରେ ଫ୍ଲାଏଓଭର ନିର୍ମାଣ ଯୋଗୁଁ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ସର୍ଦ୍ଦାର ପଟେଲ ମାର୍ଗ ଏବଂ ଜାତୀୟ ରାଜଧାନୀରୁ ଗୁରୁଗ୍ରାମ ରାସ୍ତାରେ ଟ୍ରାଫିକ୍ ଜାମ୍ ବିଷୟରେ ମଧ୍ୟ ଯାତ୍ରୀମାନେ ଅଭିଯୋଗ କରିଥିଲେ। ସଂଯୁକ୍ତ କୃଷକ ମୋର୍ଚ୍ଚାର ନିଷ୍ପତ୍ତିକ୍ରମେ କୃଷକ ସଂଗଠନଗୁଡ଼ିକ ଆଜି ଶ୍ରୀମୁକ୍ତସରସାହିବ ଗ୍ରାମର ଟୋଲପ୍ଲାଜାରେ ଟ୍ରାକ୍ଟର ଶୋଭାଯାତ୍ରା କରୁଛନ୍ତି ଏବଂ କୃଷକମାନେ ମୁଖ୍ୟ ରାସ୍ତାରେ ଟ୍ରାକ୍ଟର ପାର୍କିଂ କରି ଶାନ୍ତିପୂର୍ଣ୍ଣ ବିକ୍ଷୋଭ ପ୍ରଦର୍ଶନ କରୁଛନ୍ତି। ଶ୍ରୀମୁକ୍ତସରସାହିବରେ କୃଷକମାନେ ସେମାନଙ୍କ ଟ୍ରାକ୍ଟର ଉପରେ ପତାକା ଲଗାଇ କେନ୍ଦ୍ର ସରକାର ଏବଂ ହରିୟାଣା ସରକାରଙ୍କ ବିରୋଧରେ ପ୍ରତିବାଦ ଶୋଭାଯାତ୍ରା କରିଥିଲେ।
