କଙ୍କଡାହାଡ଼: ବିଦ୍ୟାଳୟରେ ପ୍ରାର୍ଥନା ଚାଲିଥିବା ବେଳେ ଶିକ୍ଷୟିତ୍ରୀଙ୍କ ମାଡ଼ରେ ଷଷ୍ଠ ଶ୍ରେଣୀ ଛାତ୍ର ଗୁରୁତର ହୋଇଛନ୍ତି। କଙ୍କାଡ଼ାହାଡ଼ ଉଚ୍ଚ ପ୍ରାଥମିକ ବିଦ୍ୟାଳୟରେ ଏଭଳି ଅଭାବନୀୟ ଘଟଣା ଘଟିଛି। ସୂଚନା ମୁତାବକ, ଆଜି ସକାଳେ ବିଦ୍ୟାଳୟରେ ପ୍ରାର୍ଥନା ଚାଲିଥିଲା। ଅନ୍ୟମାନଙ୍କ ଭଳି କେରଜୁଳି ପଞ୍ଚାୟତ ଗୋପପୁରର ଗଣପତି ମହାନ୍ତ ପ୍ରାର୍ଥନା କରୁଥିଲେ। କୌଣସି କାରଣ ନଥାଇ ଶିକ୍ଷୟିତ୍ରୀ କ୍ଷଣପ୍ରଭା ବେହେରା ପୁଅର ଛାତିକୁ ମୁଥ ମାରିଥିବା ଗଣପତିର ମା ଭାରତୀ କହିଛନ୍ତି। ତେବେ ମୁଥ ମାଡ଼ରେ ଛାତ୍ର ଜଣକ ଅସୁସ୍ଥ ହୋଇ ପଡ଼ିଥିବାବେଳେ ଛାତିରେ ଯନ୍ତ୍ରଣା ଅନୁଭବ କରିଥିଲେ। କିନ୍ତୁ ବିଦ୍ୟାଳୟ କର୍ତ୍ତୃପକ୍ଷ ଆହତ ଛାତ୍ରକୁ ଡାକ୍ତରଖାନା ନେଇ ନଥିବା ସେ ଅଭିଯୋଗ କରିଛନ୍ତି। ଖବର ପାଇ ସେ ନିଜେ ସ୍କୁଲକୁ ଆସି ପୁଅକୁ ନେଇ ପ୍ରଥମେ କଙ୍କଡ଼ାହାଡ଼ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ପରେ କାମାକ୍ଷାନଗର ଉପଖଣ୍ଡ ଡାକ୍ତରଖାନାରେ ଚିକିତ୍ସା କରାଇଥିଲେ। ଆହତ ଛାତ୍ର ସୁସ୍ଥ ଥିବା ଓ ଏ ସମ୍ପର୍କରେ ତଦନ୍ତ କରାଯାଉଥିବା ବ୍ଲକ୍ ଶିକ୍ଷାଧିକାରୀ ସାଗର ଟୁଡ଼ୁ କହିଛନ୍ତି।
ଶିକ୍ଷୟିତ୍ରୀଙ୍କ ମାଡ଼ରେ ଛାତ୍ର ଗୁରୁତର
