ନୂଆଦିଲ୍ଲୀ: ମହାନଦୀ ଜଳ ବିବାଦ ଟ୍ରିବ୍ୟୁନାଲରେ ପଶ୍ଚିମାଂଚଳ କ୍ୟାଚ୍ମେଣ୍ଟ ଏରିଆର ସୀମା ନିର୍ଦ୍ଧାରଣକୁ ନେଇ ନୂଆ ବିବାଦ ଉପୁଜିଛି। ଆଜି ଟ୍ରିବ୍ୟୁନାଲଙ୍କ ଶୁଣାଣି ଅବସରରେ ଓଡ଼ିଶା ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ ମୋହନ କାଟର୍କି ପଶ୍ଚିମାଂଚଳ କ୍ୟାଚ୍ମେଣ୍ଟ ଏରିଆ ମହାନଦୀ ଅବବାହିକାର ଅଂଶ ନୁହେଁ ବୋଲି କହିବା ସହ ଏହାର ସୀମା ନିର୍ଦ୍ଧାରଣକୁ ନେଇ ପୂର୍ବରୁ ହୋଇଥିବା ଆଲୋଚନା ଓ ନିଷ୍ପତ୍ତି ଉପରେ ଆପତ୍ତି ଉଠାଇଥିଲେ। ସେ କହିଥିଲେ, ପଶ୍ଚିମାଂଚଳ କ୍ୟାଚ୍ମେଣ୍ଟ ଏରିଆର ଜଳ ମହାନଦୀ, ଏହାର ଉପନଦୀ ଓ ଶାଖାନଦୀକୁ ଯାଇ ନ ଥାଏ। ଏହା ନିଷ୍କାସିତ ହୋଇ ସିଧା ଚିଲିକାକୁ ଚାଲି ଯାଇଥାଏ। ତାହା ନିରପେକ୍ଷ କ୍ୟାଚ୍ମେଣ୍ଟ ଅଂଚଳ ଏବଂ ଏହା ମହାନଦୀ ଅବବାହିକାରେ ଆସୁନାହିଁ।
ଏ ସମ୍ପର୍କରେ ଆଇନଜୀବୀ ଶ୍ରୀ କାଟାର୍କି ପୁଣିଥରେ ଆସେସରଙ୍କ ସହିତ ଆଲୋଚନା ପାଇଁ ସୁଯୋଗ ଦିଆଯାଉ ବୋଲି ଟ୍ରିବ୍ୟୁନାଲଙ୍କୁ ଅନୁରୋଧ କରିଥିଲେ। ସେ ୬ ସପ୍ତାହ ସମୟ ମାଗିଥିଲେ ଏବଂ ଆଲୋଚନାରେ ଯାହା ବି ନିଷ୍ପତ୍ତି ହେବ ତାହା ପାଳନ କରାଯିବ ବୋଲି କହିଥିଲେ। ଟ୍ରିବ୍ୟୁନାଲ ଉଭୟ ଓଡ଼ିଶା ଓ ଛତିଶଗଡ଼କୁ ଚାରି ସପ୍ତାହ ସମୟ ପ୍ରଦାନ କରିବା ସହିତ ଧାର୍ଯ୍ୟ ସମୟ ଭିତରେ ସୀମା ନିର୍ଦ୍ଧାରଣ ପ୍ରକ୍ରିୟା ଶେଷ କରିବା ପାଇଁ କହିଛନ୍ତି। ଅଗଷ୍ଟ ୧୨ରେ ମାମଲାର ପରବର୍ତ୍ତୀ ଶୁଣାଣି ହେବ।
