କାନପୁର: ଉତ୍ତର ପ୍ରଦେଶର କାନପୁର ଦେହାତ ଜିଲ୍ଲାର ଆକବରପୁର ଅନ୍ତର୍ଗତ ରାଜପଥରେ ଶୋଇଥିବା ଜଣେ ମଦ୍ୟପଙ୍କୁ ଉଠାଇବାକୁ ଚେଷ୍ଟା କରୁଥିବା ବେଳେ ଦ୍ରୁତଗାମୀ ଟେମ୍ପୋଗାଡ଼ି ଧକ୍କା ଦେବାରୁ ଜଣେ କନେଷ୍ଟବଳଙ୍କର ମୃତ୍ୟୁ ଘଟିଛି ଓ ଆଉ ୩ଜଣ ପୁଲିସ କର୍ମଚାରୀ ଆହତ ହୋଇଛନ୍ତି ବୋଲି ଜଣେ ବରିଷ୍ଠ ପୁଲିସ ଅଧିକାରୀ କହିଛନ୍ତି।
ବୁଧବାର ପ୍ରତ୍ୟୁଷରେ ଘଟିଥିବା ଏହି ଦୁର୍ଘଟଣାରେ ସେ ମଦ୍ୟପଙ୍କର ବି ମୃତ୍ୟୁ ଘଟିଛି। କିନ୍ତୁ, ତାଙ୍କର ପରିଚୟ ମିଳିନାହିଁ।
ଆହତ ହୋଇଥିବା ୩ଜଣ ପୁଲିସ କର୍ମଚାରୀଙ୍କ ମଧ୍ୟରେ ଜଣେ ସବ୍-ଇନ୍ପେକ୍ଟର୍ ଥିବା କଥା ଜଣେ ପଦସ୍ଥ ପୁଲିସ ଅଧିକାରୀ କହିଛନ୍ତି।
କାନପୁର ଦେହାତ୍ର ଅତିରିକ୍ତ ଏସ୍. ପି. ରାଜେଶ କୁମାର ପାଣ୍ଡେ କହିଛନ୍ତି, ହେଡ୍ କନେଷ୍ଟବଳ ଅରବିନ୍ଦ କୁମାର ଏବଂ କନେଷ୍ଟବଳ ସୌରଭ କୁମାର ଓ ବିବେକ କୁମାରଙ୍କୁ ସାଥିରେ ଧରି ସବ୍-ଇନ୍ସ୍ପେକ୍ଟର୍ ମଥୁରା ପ୍ରସାଦ ପାଟ୍ରୋଲିଙ୍ଗ୍ କରୁଥିବା ବେଳେ ରାଜପଥର ମାଧପୁର ସେତୁ ନିକଟରେ ଜଣେ ମଦ୍ୟପ ରାସ୍ତାରେ ଶୋଇଥିବା ଦେଖିଥିଲେ।
ପାଣ୍ଡେ ଆହୁରି ମଧ୍ୟ କହିଛନ୍ତି, ତୁରନ୍ତ ସେମାନେ ଗାଡ଼ିରୁ ଡେଇଁପଡ଼ିଲେ। କନେଷ୍ଟବଳ ବିବେକ କୁମାର ଉକ୍ତ ମଦ୍ୟପଙ୍କୁ ଟାଣି ରାସ୍ତାରୁ ଉଠାଉଥିବା ବେଳେ ଗୋଟାଏ ଦ୍ରୁତଗାମୀ ଟେମ୍ପୋ ଧକ୍କା ଦେବାରୁ ସେ ପୋଲ ଉପରୁ ତଳକୁ ଖସିପଡ଼ିଲେ ଓ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଲା।
ହାତ, ଗୋଡ଼ ଓ ଅଣ୍ଟାରେ ଆଘାତ ପାଇଥିବା ବାକି ୩ଜଣ ପୁଲିସ କର୍ମଚାରୀଙ୍କୁ ଜିଲ୍ଲା ହସ୍ପିଟାଲ୍କୁ ନିଆଯାଇଥିଲା। ସେଠାରୁ କନେଷ୍ଟବଳ ସୌରଭଙ୍କୁ ରିଜେନ୍ସି ହସ୍ପିଟାଲ୍କୁ ସ୍ଥାନାନ୍ତର କରାଯାଇଛି ବୋଲି ମଧ୍ୟ ପାଣ୍ଡେ କହିଛନ୍ତି।
ପୁଲିସ ଉକ୍ତ ଟେମ୍ପୋକୁ ଜବତ କରିବା ସହିତ ତା’ର ଡ୍ରାଇଭର୍ ଦିଲ୍ଲୀନିବାସୀ ୪୦ ବର୍ଷିୟ ସୁରେନ୍ଦ୍ର କୁମାର ଗୁପ୍ତାଙ୍କୁ ଗିରଫ କରିଥିବା କଥା ଆଉ ଜଣେ ପୁଲିସ ଅଧିକାରୀ କହିଛନ୍ତି।
