ନୂଆଦିଲ୍ଲୀ : ଦିଲ୍ଲୀ ଓ ଏନ୍ସିଆର୍ ଅଞ୍ଚଳ (ନୋଏଡ଼ା, ଗ୍ରେଟର ନୋଏଡ଼ା, ଗାଜିଆବାଦ, ସାହିବାବାଦ, ଫରିଦାବାଦ ଓ ଗୁରୁଗ୍ରାମ)ର ବିଭିନ୍ନ ଜଗନ୍ନାଥ ମନ୍ଦିରରେ ବାହୁଡ଼ାଯାତ୍ରା ଭକ୍ତିପୂତ ପରିବେଶ ମଧ୍ୟରେ ଅନୁଷ୍ଠିତ ହୋଇଯାଇଛି। ଭୋର୍ରୁ ଦିଲ୍ଲୀର ହଜଖାସ ଜଗନ୍ନାଥ ମନ୍ଦିର, ତ୍ୟାଗରାଜ ନଗର ଜଗନ୍ନାଥ ମନ୍ଦିର ସମେତ ଏନ୍ସିଆର ଅଞ୍ଚଳରେ ଥିବା ୧୦ରୁ ଅଧିକ ଜଗନ୍ନାଥ ମନ୍ଦିରରେ ଶ୍ରୀଗୁଣ୍ଡିଚା ମନ୍ଦିର ଆଡ଼ପ ମଣ୍ଡପରେ ବିରାଜମାନ ମୂର୍ତ୍ତିଙ୍କ ପୂଜାର୍ଚ୍ଚନା ଓ ନୀତି ଅନୁଷ୍ଠିତ ହୋଇଥିଲା।
ଅପରାହ୍ଣରେ ପାରମ୍ପରିକ ଛେରାପହଁରା ପରେ ଭକ୍ତ ଓ ଶ୍ରଦ୍ଧାଳୁମାନଙ୍କ ଦ୍ବାରା ରଥଟଣା ଆରମ୍ଭ ହୋଇଥିଲା। ଘଣ୍ଟ, କରତାଳି ଓ ମୃଦଙ୍ଗ ଆଦି ବାଦ୍ୟର ତାଳେତାଳେ ଭକ୍ତମାନେ ରଥ ଟାଣିବାର ସୁଯୋଗ ପାଇଥିଲେ। ମନ୍ଦିରମାନଙ୍କ ପକ୍ଷରୁ ନିର୍ଧାରିତ ସ୍ଥାନ ପର୍ଯ୍ୟନ୍ତ ରଥଗୁଡ଼ିକୁ ଟଣାଯାଇ ସଂଧ୍ୟା ସୁଦ୍ଧା ମନ୍ଦିର ବେଢ଼ା ନିକଟକୁ ଫେରାଇ ଅଣାଯାଇଥିଲା। ବାହୁଡ଼ାଯାତ୍ରା ଅବସରରେ ଭକ୍ତମାନଙ୍କର ପ୍ରବଳ ଭିଡ଼ ହୋଇଥିଲା। ପୋଲିସ ପକ୍ଷରୁ ସୁରକ୍ଷାର ବ୍ୟାପକ ବନ୍ଦୋବସ୍ତ କରାଯାଇଥିଲା। ବାହୁଡ଼ା ଯାତ୍ରା ଶୃଙ୍ଖଳିତ ଓ ନିର୍ଦ୍ଧାରିତ ସମୟରେ ଶେଷ ହୋଇଥିବାରୁ ମନ୍ଦିରମାନଙ୍କ ପକ୍ଷରୁ ପୋଲିସ ଓ ଶ୍ରଦ୍ଧାଳୁମାନଙ୍କୁ ଧନ୍ୟବାଦ ଜ୍ଞାପନ କରାଯାଇଛି।
