ନୂଆଦିଲ୍ଲୀ : ଦେଶକୁ ନିକଟରେ ଏକ ନୂଆ ସଂସଦ ଭବନ ମିଳିଛି। ଏଥିରେ ଉତ୍ସାହିତ ହୋଇ ଅନେକ ରାଜ୍ୟ ନୂଆ ବିଧାନସଭା ଭବନ ନିର୍ମାଣ ପାଇଁ ଯୋଜନା କରିଛନ୍ତି। ଏଭଳି ସ୍ଥଳେ ରାଜ୍ୟ ବିଧାନସଭାଗୁଡ଼ିକ କାର୍ଯ୍ୟ କିଭଳି ଚାଲିଛି ବ୍ୟବସ୍ଥାପିକା ସଂପର୍କରେ ଅନୁଶୀଳନ କରୁଥିବା ସଂସ୍ଥା ପିଆରଏସ୍ ଲେଜିସଲେଟିଭ ରିସର୍ଚ୍ଚର ‘ଆନୁଆଲ ରିଭ୍ୟୁ ଅଫ୍ ଷ୍ଟେଟ୍ ଲଜ୍ ୨୦୨୨’ ରିପୋର୍ଟରେ ତାହା ପଦାକୁ ଆସିଛି। ରିପୋର୍ଟ ଅନୁଯାୟୀ ୨୦୨୨ରେ ୨୮ଟି ରାଜ୍ୟ ବିଧାନସଭା ହାରାହାରି ୨୧ ଦିନ ବସିଛି।
୨୦୧୬ରୁ ୨୦୨୨ ମଧ୍ୟରେ ୨୪ ରାଜ୍ୟ ବିଧାନସଭା ହାରାହାରି ୨୫ ଦିନ ବସିଛି। କେରଳ ବିଧାନସଭା ବର୍ଷକୁ ସର୍ବାଧିକ ୪୮ ଦିନ ବସିଛି। କେରଳ ପଛକୁ ଓଡ଼ିଶା ବିଧାନସଭା ହାରାହାରି ୪୧ ଏବଂ କର୍ଣ୍ଣାଟକ ବିଧାନସଭା ହାରାହାରି ୩୫ ଦିନ ବସିଛି। ୨୦୧୬ ପରଠାରୁ ରାଜ୍ୟ ବିଧାନସଭା କାର୍ଯ୍ୟ ଦିବସ କମିଯାଇଛି। ମହାମାରୀ ପରେ ୨୦୨୦ରେ ବିଧାନସଭା ସବୁଠୁ କମ୍ ଦିନ ବସିଛି।
ତେଲେଙ୍ଗାନା , ମଧ୍ୟପ୍ରଦେଶ ଏବଂ ଗୋଆ ବିଧାନସଭା କାର୍ଯ୍ୟ ଦିବସ ମଧ୍ୟ ବହୁତ କମିଯାଇଛି। ହରିୟାଣା, ପଂଜାବ ଏବଂ ତ୍ରିପୁରା ୨୦୧୬ ପରଠାରୁ କୌଣସି ବର୍ଷ ୨୦ ରୁ ଅଧିକ ଦିନ ବସିନାହିଁ।
