ନୂଆଦିଲ୍ଲୀ : ଯେଉଁ ଭାରତୀୟମାନେ ବିଦେଶରେ ଆଇନ ଡିଗ୍ରି ହାସଲ କରିଛନ୍ତି, ଭାରତରେ ସେମାନଙ୍କ ଗ୍ରହଣୀୟତା ପାଇଁ ସେମାନେ ଅଷ୍ଟାଦଶ ବାର୍ କାଉନ୍ସିଲ ଅଫ୍ ଇଣ୍ଡିଆ ଯୋଗ୍ୟତା ପରୀକ୍ଷା ଦେଇଛନ୍ତି। ୨୦୨୨ ଡିସେମ୍ବର ୧୯ରୁ ୨୪ ମଧ୍ୟରେ ସେମାନେ ପରୀକ୍ଷା ଦେଇଥିବା ବେଳେ ଏ ଯାଏ ଫଳ ପ୍ରକାଶ ପାଇନାହିଁ। ଏଣୁ ତୁରନ୍ତ ଫଳ ପ୍ରକାଶ ନିମନ୍ତେ ସୁପ୍ରିମ୍କୋର୍ଟରେ ଏକ ଆବେଦନ ଦାୟର କରାଯାଇଛି। ସୁପ୍ରିମ୍କୋର୍ଟ ଅବକାଶ ବେଞ୍ଚର ଜଷ୍ଟିସ୍ ଅନିରୁଦ୍ଧ ବୋଷ ଓ ଜଷ୍ଟିସ୍ ରାକେଶ ବିନ୍ଦଲ ଶୁକ୍ରବାର ଏହି ଆବେଦନର ଶୁଣାଣି କରିବା ପାଇଁ ତାରିଖ ଧାର୍ଯ୍ୟ କରିଛନ୍ତି।
ଆବେଦନରେ ପିଟିସନରଙ୍କ ଓକିଲ ଯଜୁର ଭାଲ୍ଲା ଦର୍ଶାଇଛନ୍ତି ଯେ ପ୍ରାର୍ଥୀମାନେ ଅକ୍ଟୋବରରେ ହେବାକୁ ଥିବା ଅଲ ଇଣ୍ଡିଆ ବାର୍ ପରୀକ୍ଷାରେ ଭାଗ ନେଇ ପାରିବେ ନାହିଁ। ଅନ୍ୟତମ ଆବେଦନକାରୀ ଅଞ୍ଚିତା ନାୟାର, ଯେକି ନିଜେ ଅଷ୍ଟାଦଶ ଯୋଗ୍ୟତା ପରୀକ୍ଷା ଦେଇଥିଲେ, ସେ କହିଛନ୍ତି ଯେ ପାଞ୍ଚମାସ ହେଲା ପରୀକ୍ଷା ସରିଥିଲେ ମଧ୍ୟ ୭୫ ଜଣ ପ୍ରାର୍ଥୀଙ୍କ ଫଳ ଘୋଷଣା କରାଯାଉ ନାହିଁ। ଫଳରେ ସେ ଜଣେ ଆଇନଜୀବୀ ଭାବେ ଜୀବିକା ନିର୍ବାହ କରିବାରୁ ବଞ୍ଚିତ ହେଉଛନ୍ତି।
