ଭୁବନେଶ୍ୱର : ଦକ୍ଷିଣ-ପୂର୍ବ ବଙ୍ଗୋପସାଗର ଓ ପାର୍ଶ୍ବବର୍ତ୍ତୀ ଆଣ୍ଡାମାନସାଗର ଅଞ୍ଚଳରେ ଗତକାଲିଠାରୁ ଏକ ଲଘୁଚାପ ସୃଷ୍ଟି ହୋଇଛି। ଏହା ପ୍ରଭାବରେ ଉତ୍ତର ତାମିଲନାଡ଼ୁ, ଦକ୍ଷିଣ ଆନ୍ଧ୍ର, ପୁଡ଼ୁଚେରି ଅଞ୍ଚଳରେ ଆସନ୍ତା ୨୦ ତାରିଖରୁ ପ୍ରବଳ ବର୍ଷା ହେବ। କିନ୍ତୁ ଓଡ଼ିଶାରେ ଏହାର ବିଶେଷ ପ୍ରଭାବ ପଡ଼ିବ ନାହିଁ ବୋଲି କହିଛି ଭାରତୀୟ ପାଣିପାଗ ବିଭାଗ (ଆଇଏମ୍ଡି)। ଲଘୁଚାପର ବାହ୍ୟବଳୟରେ ଯେଉଁ ମେଘସମୂହ ରହିବ, ତା’ ପ୍ରଭାବରେ ଦକ୍ଷିଣ ଓଡ଼ିଶାର ଅଳ୍ପ କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ ବୋଲି ଆଇଏମ୍ଡି କହିଛି।
ସୂଚନାନୁସାରେ, ଦକ୍ଷିଣ ଓଡ଼ିଶାରେ ୨୧ ଓ ୨୨ ତାରିଖରେ କେତେକ ଜିଲ୍ଲାରେ ମଧ୍ୟମ ଧରଣର ବର୍ଷା ହେବ। ଏହାବ୍ୟତୀତ ବାକି ଓଡ଼ିଶାର ପାଗ ଶୁଖିଲା ରହିବ। ଗତକାଲି କୋରାପୁଟ ଜିଲ୍ଲାର ସେମିଳିଗୁଡ଼ାରେ ୭.୯ଡିଗ୍ରି, କନ୍ଧମାଳ ଜିଲ୍ଲା ଜି. ଉଦୟଗିରିରେ ୮.୬ ଡିଗ୍ରି, କେରାପୁଟ ଓ ଫୁଲବାଣୀରେ ୧୦.୫ ଡିଗ୍ରି, ଦାରିଙ୍ଗବାଡ଼ିରେ ୧୧.୫ ଡିଗ୍ରି ସର୍ବନିମ୍ନ ତାପମାତ୍ରା ରେକର୍ଡ ହୋଇଥିଲା। ତେବେ ଲଘୁଚାପ ପ୍ରଭାବରେ ୨୦ ତାରିଖଠାରୁ ତାପମାତ୍ରା ଧୀରେଧୀରେ ବଢ଼ିବ। ୨ଡିଗ୍ରି ପର୍ଯ୍ୟନ୍ତ ତାପମାତ୍ରା ବଢ଼ିବା ସହ ଶୀତ କମିବ ବୋଲି ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି।
