ନୂଆଦିଲ୍ଳୀ ୨୯।୦୮: ଶରୀରରେ କୋଲେଷ୍ଟ୍ରଲକୁ ନିୟନ୍ତ୍ରଣ କରିବା ଅତ୍ୟନ୍ତ ଜରୁରୀ । ଯଦି ଆପଣଙ୍କ ଶରୀରରେ ଖରାପ ଏବଂ ଭଲ କୋଲେଷ୍ଟ୍ରଲ ସ୍ତର ନିୟନ୍ତ୍ରଣରେ ନରୁହେ ତେବେ ବଢିପାରେ ସମସ୍ୟା। ସମସ୍ତେ ଜାଣଛନ୍ତି ଯେ କୋଲେଷ୍ଟ୍ରଲ ନିୟନ୍ତ୍ରଣରେ ନରହିଲେ ହୃଦଘାତର ସମ୍ଭାବନା ଅଧିକ ବଢିଯାଏ । ଏଭଳି ସ୍ଥିତିରେ ଆପଣଙ୍କୁ ଆପଣଙ୍କର ଖାଦ୍ୟପେୟ ପ୍ରତି ବିଶେଷ ଧ୍ୟାନ ଦେବାକୁ ହେବ । ନଚେତ ହୃଦଘାତ ହେବାର ଆଶଙ୍କା ଦେଖାଦେଇପାରେ । ଏମିତି କିଛି ଖାଦ୍ୟ ଅଛି ଯାହା କୋଲେଷ୍ଟ୍ରଲକୁ ବଢାଇଥାଏ । ତେବେ ଆସନ୍ତୁ ଜାଣିବା କେଉଁ ପ୍ରକାରର ଖାଦ୍ୟଠାରୁ ଦୂରେଇ ରହିଲେ କୋଲେଷ୍ଟ୍ରଲ ନିୟନ୍ତ୍ରଣରେ ରହିବ ।
ଯେଉଁମାନେ ଅଧିକ ପରିମାଣରେ ଚିକେନ ଖାଉଛନ୍ତି ସେମାନେ ଏହା ଠାରୁ ଦୂରେଇ ରହିବା ଉଚିତ । କାରଣ ଚିକେନରେ କ୍ୟାଲୋରୀ, ଚର୍ବି ଏବଂ କୋଲେଷ୍ଟ୍ରଲ ପରିମାଣ ଅଧିକ ରହିଥାଏ । ଏହାକୁ ଖାଇବା ଦ୍ବାରା କୋଲେଷ୍ଟ୍ରଲର ସ୍ତର ମଧ୍ୟ ବଢିବାର ସମ୍ଭାବନା ଅଧିକ ରହିଥାଏ ।
ଏହାସହ ଯେଉଁମାନେ ସମ୍ପୂର୍ଣ୍ଣ ଚର୍ବିଯୁକ୍ତ ଏବଂ ଦୁଗ୍ଧଜାତ ଦ୍ରବ୍ୟ ବ୍ୟବହାର କରୁଥିଲେ ଦୂରେଇ ରହିବାକୁ ପଡିବ । ଏଥିରେ କ୍ରିମ୍ , କ୍ଷୀର, ଲହୁଣୀ, ଦହି ଏବଂ ପନିର ସାମିଲ ଅଟେ । ଏହା ଦ୍ବାରା କୋଲେଷ୍ଟ୍ରଲର ସ୍ତର ଶୀଘ୍ର ବଢିଥାଏ । ଆପଣ ଦୁଗ୍ଧଜାତ ଦ୍ରବ୍ୟରେ କମ୍ ଚର୍ବିଯୁକ୍ତ ଦହି ଖାଇପାରିବେ । ଯାହାଦ୍ବାରା କୋଲେଷ୍ଟ୍ରଲ ସ୍ତର ନିୟନ୍ତ୍ରଣରେ ରହିବ । ଲହୁଣୀ ବଦଳରେ ଆପଣ ଅଲିଭ୍ ଏବଂ ଆଭୋକେଡୋ ଅଏଲ୍ ଖାଇପାରିବେ ।
ପରିବର୍ତ୍ତିତ ଜୀବନଶୈଳୀରେ ଅଧିକାଂଶ ଲୋକ ଫ୍ରାଏଡ୍ ଫୁଡ୍ ବା ଫାଷ୍ଟଫୁଡ୍ ପ୍ରତି ଆକର୍ଷିତ ହେଉଛନ୍ତି । ତେବେ ଫ୍ରେଞ୍ଚ୍ ଫ୍ରାଇଜ୍, ଫ୍ରାଏ ଚିକେନ୍ ବା ଫ୍ରାଏ ହୋଇଥିବା ଅନ୍ୟ ଖାଦ୍ୟରେ ଚର୍ବି ବହୁତ ମାତ୍ରାରେ ରହିଥାଏ । ଏହାଦ୍ବାରା ମଧ୍ୟ କୋଲେଷ୍ଟ୍ରଲ ସହ ଅନ୍ୟାନ୍ୟ ରୋଗ ହୋଇପାରେ ।
