ନୂଆଦିଲ୍ଲୀ ୦୨/୦୮: ଓ୍ୱେଷ୍ଟ ଇଣ୍ଡିଜ ନିଜ ମାଟିରେ ଭାରତକୁ ଦ୍ୱିତୀୟ ଟି୨୦ରେ ପରାସ୍ତ କରିଛି । କାରବିୟାନ ଟିମ୍ ୫ ମ୍ୟାଚ୍ ବିଶିଷ୍ଟ ସିରିଜକୁ ୧-୧ ସ୍ତରକୁ ଆଣିଛି । ସିରିଜର ଦ୍ୱିତୀୟ ମ୍ୟାଚର ହିରୋ ଥିଲେ ଦ୍ରୁତ ବୋଲର ଓବେଡ୍ ମେକୟ ।
୬.୩ ଉଚ୍ଚତାର ଏହି ବୋଲର ବୋଲିଂରେ ଭାରତୀୟ ବ୍ୟାଟିଂର ମେରୁଦଣ୍ଡ ଭାଙ୍ଗି ଦେଇଥିଲେ । ସେ ୪ ଓଭର ବୋଲିଂ କରି ୧୭ ରନ୍ ଦେଇ ୬ ଓ୍ୱିକେଟ୍ ନେଇଥିଲେ । ଏହାସହ ସେ ଗୋଟିଏ ମେଡେନ୍ ଓଭର ମଧ୍ୟ ନେଇଥିଲେ । ଏପରି ଭାବେ ମେକୟ ଅନ୍ତର୍ଜାତୀୟ ଟି୨୦ରେ ସବୁଠୁ କମ୍ ରନ୍ ଦେଇ ଅଧିକ ଓ୍ୱିକେଟ୍ ନେଇଥିବା ପ୍ରଥମ ବୋଲର ହୋଇପାରିଛନ୍ତି ।
ଏପରି ଭାବେ ନେଲେ ଓ୍ୱିକେଟ୍
ମେକୟ ମ୍ୟାଚର ପ୍ରଥମ ଓଭର ପକାଇଥିଲେ । ପ୍ରଥମ ବଲରେ ସେ ଅଧିନାୟକ ରୋହିତ ଶର୍ମାଙ୍କୁ ପ୍ୟାଭିଲିୟନର ରାସ୍ତା ଦେଖାଇଥିଲେ । ଏହାପରେ ତୁରନ୍ତ ସୂର୍ଯ୍ୟକୁମାର ଯାଦବ ତାଙ୍କ ଶିକାର ହୋଇଥିଲେ । ସୂର୍ଯ୍ୟ ୧୧ ରନ୍ କରି ଆଉଟ୍ ହୋଇଥିଲେ । ଦୁଇ ଓପନର ଆଉଟ୍ ହେଲା ପରେ ମିଡିଲ୍ ଅର୍ଡର ଓ ନିମ୍ନ ଅର୍ଡର ବି ଭୁଷୁଡି ପଡିଥିଲା ।
ମେକୟ ଲଗାତର ରବୀନ୍ଦ୍ର ଜାଡେଜା, ଦିନେଶ କାର୍ତ୍ତିକ, ରବୀନ୍ଦ୍ରଚନ୍ଦ୍ର ଅଶ୍ୱିନ ଓ ଭୁବନେଶ୍ୱର କୁମାରଙ୍କୁ ନିଜର ଶିକାର କରିଥିଲେ ।
ଚାଲିନଥିଲା କୌଣସି ଭାରତୀୟ ବ୍ୟାଟରଙ୍କ ବ୍ୟାଟ୍
ମ୍ୟାଚରେ ଭାରତ ଟସ୍ ହାରି ୧୯.୪ ଓଭରରେ ୧୩୮ ରନରେ ଅଟକି ଥିଲା । ହାର୍ଦ୍ଦିକ ପାଣ୍ଡ୍ୟା ସର୍ବାଧିକ ୩୧ ଓ ରବୀନ୍ଦ୍ର ଜାଡେଜା ୨୭ ରନ୍ କରିଥିଲେ । ଇଣ୍ଡିଜ ବୋଲର ମେକୟ ୪ ଓଭରରେ ୧୭ ରନ୍ ଦେଇ ୬ ଶିକାର କରିଥିଲେ । ଏହାର ଜବାବରେ ଇଣ୍ଡିଜ ୫ ଓ୍ୱିକେଟ୍ ବାକି ଥାଇ ମ୍ୟାଚ୍ ଜିତି ନେଇଥିଲା । ଓପନର ବ୍ରେଣ୍ଡନ୍ କିଙ୍ଗ ସର୍ବାଧିକ ୬୮ ରନ୍ କରିଥିଲେ ।
