ନୂଆଦିଲ୍ଲୀ,୨୮/୦୭: ରାଜସ୍ଥାନର ହନୁମାନଗଡରେ ଗୋହତ୍ୟା ଓ ଗୋମାଂସ ଭୋଜି ନେଇ ସାମ୍ପ୍ରଦିୟାକ ଦଙ୍ଗା ସୃଷ୍ଟି ହୋଇଛି । ଏହାପରେ ପ୍ରଶାସନ ପକ୍ଷରୁ ଗାଁରେ କର୍ଫ୍ୟୁ ଲଗାଇ ଦିଆଯାଇଛି । ଏହାସହ ଇଣ୍ଟରନେଟ୍ ସେବା ମଧ୍ୟ ବନ୍ଦ କରାଯାଇଛି ।
ସୂଚନାନୁସାରେ, ହନୁମାନଗଡର ଚିଡିଆ ଗାନ୍ଧୀରେ ଇଦକୁ ନେଇ ଗୋମାଂସ ଭୋଜି ମାମଲା ସାମ୍ନାକୁ ଆସିଥିଲା । ପ୍ରଥମେ ପ୍ରଶାସନ ଗାଁରେ ଗୋହତ୍ୟା ହୋଇନଥିବା କହିଥିଲା । ଏହାପରେ ପୋଲିସ ଘଟଣାସ୍ଥଳରୁ ମିଳିଥିବା ମାଂସ ନମୂନାକୁ ପରୀକ୍ଷଣ ପାଇଁ ପଠାଇଥିଲା । ଯେଉଁଥିରେ ଏହା ଗୋମାଂସ ବୋଲି ଜଣାପଡିଥିଲା ।
ନମୂନାର ରିପୋର୍ଟ ଆସିଲା ପରେ ଲୋକେ ଗିରଫଦାରୀ ଦାବି କରି ବିରୋଧ ପ୍ରଦର୍ଶନ କରିଥିଲେ । ଏହି ପରିପ୍ରେକ୍ଷୀରେ ପ୍ରଦର୍ଶକାରୀ ଓ ପୋଲିସ ମୁହାଁମୁହିଁ ହୋଇଥିଲେ । ଯାହା ପରେ ସାମ୍ପ୍ରଦାୟିକ ଉତ୍ତେଜନା ବଢିଥିଲା । ଫଳରେ ପୋଲିସ ତୁରନ୍ତ କର୍ଫ୍ୟୁ ଲାଗୁ କରିଥିଲା । ଏହାସହ ଇଣ୍ଟରନେଟ ମଧ୍ୟ ବନ୍ଦ କରାଯାଇଛି । ଆଗାମୀ ନିର୍ଦ୍ଦେଶ ଯାଏଁ ଗାଁରେକର୍ଫ୍ୟୁ ବଳବତ୍ତର ରହିବ ।
ପୋଲିସର କହିବାନୁସାରେ, ମାମଲାରେ ଚାରି ଅଭିଯୁକ୍ତ ଫାରୁଖ, ଅନଓ୍ୱର, ଅମୀନ ଖାନ ଓ ସିକନ୍ଦର ଖାନଙ୍କୁ ଗିରଫ କରାଯାଇଛି । ସେମାନଙ୍କ ବିରୋଧରେ ଗୋହତ୍ୟା ନେଇ ଅଭିଯୋଗ ଲାଗିଛି ।
ସୂଚନଯୋଗ୍ୟ, ରାଜସ୍ଥାନରେ ଲଗାତର ଭାବେ ସାମ୍ପ୍ରଦାୟିକ ଦଙ୍ଗା ବଢିବାରେ ଲାଗିଛି । ଏହାପୂର୍ବରୁ ଭୀଲଓ୍ୱାଡାରେ ଯୁବକଙ୍କ ହତ୍ୟା ପରେ ଦଙ୍ଗା ହୋଇଥିଲା । ନିକଟରେ ହନୁମାନଗଡରେ ବିଶ୍ୱହିନ୍ଦୁ ପରିଷଦ ନେତାଙ୍କୁ ଆକ୍ରମଣ ପରେ ଉତ୍ତେଜନା ଆହୁରି ବୃଦ୍ଧି ପାଇଥିଲା ।
