ବୌଦ୍ଧ ୪।୭: ବୌଦ୍ଧ ଜିଲ୍ଲାରେ ଦିନକୁ ଦିନ ଜଙ୍ଗଲୀ ଜନ୍ତୁ ଶିକାର ବଢ଼ିବାରେ ଲାଗିଲାଣି । ଶିକାରୀଙ୍କ ହାତରେ କେତେବେଳେ ହାତୀ ମରୁଛି ତ ଆଉ କେତେବେଳେ ବାରହା । ସୋମବାର ଶିକାରୀଙ୍କ ହାତରେ ପୁଣି ଗୋଟିଏ ଜଙ୍ଗଲୀ ଭାଲୁର ଜୀବନ ଯାଇଛି ।
ସୂଚନାଯୋଗ୍ୟ ଯେ, ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ୍ ମନମୁଣ୍ଡା ରେଞ୍ଜ ଅନ୍ତର୍ଗତ ରତାଖଣ୍ଡି ସଂରକ୍ଷିତ ଜଙ୍ଗଲରେ ବାରହା ମାରିବାକୁ ଦୁର୍ବୃତ୍ତମାନେ ବିଛାଇଥିବା ବିଦ୍ୟୁତ ତାର ସଂସ୍ପର୍ଶରେ ଆସି ଭାଲୁଟିର ମୃତ୍ୟୁ ହୋଇଥିବା ସୂଚନା ମିଳିଛି । ଖବର ପାଇ ବିଦ୍ୟୁତ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚିଥିବା ବେଳେ ଏଯାଏଁ କିନ୍ତୁ ବନ ବିଭାଗର ବାବୁମାନେ ପହଞ୍ଚିନାହାନ୍ତି । କେବଳ ଏହି ଘଟଣା ନୁହେଁ ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ ନିୟମିତ ଭାବରେ ବାରହା ଏବଂ ଅନ୍ୟାନ୍ୟ ଜଙ୍ଗଲୀ ଜନ୍ତୁଙ୍କ ସହ ହାତୀ ଦାନ୍ତ ପାଇଁ ହାତୀକୁ ହତ୍ୟା ଏକ ସାଧାରଣ ଘଟଣା ହୋଇଗଲାଣି ।
ଗତ ମାସରେ ଏକ ସପ୍ତାହ ମଧ୍ୟରେ ବୌଦ୍ଧ ରେଞ୍ଜରେ ଦୁଇ ଦୁଇଟି ହାତୀ ଶିକାର ହେବା ନଜର ଆସିଥିଲା । ସେହି ଘଟଣାରେ କାର୍ଯ୍ୟରେ ଅବହେଳା ଦର୍ଶାଇ ରେଞ୍ଜର, ଫରେଷ୍ଟର ଓ ଗାର୍ଡକୁ ବିଭାଗ ପକ୍ଷରୁ ନିଲମ୍ବିତ କରାଯାଇଛି । ହେଲେ ଜିଲ୍ଲାରେ ଏଯାଏଁ ଜନ୍ତୁ ଶିକାର କମିନାହିଁ । ଜଙ୍ଗଲ ଏବଂ ଜଙ୍ଗଲୀ ଜନ୍ତୁଙ୍କ ସୁରକ୍ଷା ପାଇଁ ନିଯୁକ୍ତି ପାଇଥିବା ବନ ବିଭାଗ କର୍ମଚାରୀଙ୍କ ଖାମଖିଆଲି ନୀତି ଏବଂ ଦୁର୍ନୀତିଖୋର ମନୋବୃତ୍ତି ଯୋଗୁଁ ଗୋଟିଏ ପରେ ଗୋଟିଏ ଜଙ୍ଗଲୀ ଜନ୍ତୁ ଅକାରଣେ ପ୍ରାଣ ହରାଉଛନ୍ତି ।
