ମୁନିଗୁଡ଼ା ୨୭।୦୬: ଦାମୀ କାର ଓ ଟ୍ରକରୁ ୬୦ ଲକ୍ଷରୁ ଅଧିକ ଟଙ୍କାର ଗଞ୍ଜେଇ ଜବତ ହୋଇଛି । ପୋଲିସକୁ ଚକ୍ମା ଦେଇ ଦ୍ରୁତଗତିରେ ଚାଲିଯିବାକୁ ଚେଷ୍ଟା କରୁଥିବା କାର ଓ ଟ୍ରକକୁ ଧରିବା ସହ ୬ କ୍ବିଣ୍ଟାଲ ୪୦ କେଜି ଗଞ୍ଜେଇ ଜବତ କରିଛି ପୋଲିସ୍ । ୪ ଜଣ ମାଫିଆଙ୍କୁ ଗିରଫ କରିବାରେ ସଫଳ ହୋଇଛି ରାୟଗଡ଼ା ଜିଲ୍ଲା ମୁନିଗୁଡା ପୋଲିସ।
ଖବର ଅନୁଯାୟୀ, ରବିବାର ରାତିରେ ବିଶେଷ ସୁତ୍ରରୁ ଖବର ପାଇ ଏସଡିପିଓ ଆକାଶ ଚନ୍ଦ୍ର ସାହୁଙ୍କ ସମେତ ମୁନିଗୁଡା ପୋଲିସର ଏକ ଟିମ ମୁନିଗୁଡାର ସମସ୍ତ ପ୍ରବେଶ ପଥକୁ ସିଲ କରି ତନଖି ଆରମ୍ଭ କରିଥିଲେ। ତଥାପି ଦ୍ରୁତ ଗତିରେ ଚାଲିଯିବାକୁ ଚେଷ୍ଟା କରୁଥିବା ବେଳେ ପିଛାକରି ଜାମରାଗୁଡା ନିକଟରୁ ଏକ କାର୍ ସହ ଏକ ଟ୍ରକକୁ ଜବତ କରି ସେଥିରେ ଥିବା ୬ କ୍ବିଣ୍ଟାଲ ୪୦ କେଜି ଗଞ୍ଜେଇ ଜବତ କରିବା ସହ ୪ ଜଣ ମାଫିଆଙ୍କୁ ଧରିବାରେ ସଫଳ ହୋଇଛି ଏହି ଟିମ ।
ତେବେ ଜବତ ଗଞ୍ଜେଇର ଆନୁମାନିକ ମୂଲ୍ୟ ୬୦ ଲକ୍ଷରୁ ଅଧିକ ହେବ ବୋଲି ଜଣାପଡିଛି । ଏହି ଗଞ୍ଜେଇ କୋରାପୁଟରୁ ଦିଲ୍ଲୀ ଯାଉଥିବା ପ୍ରାଥମିକ ତଦନ୍ତରୁ ଜଣାପଡିଛି। ଏହି ଗଞ୍ଜେଇ ମାଫିଆମାନଙ୍କ ପରିଚୟ ଓ ପ୍ରକୃତରେ ଏହା କେଉଁ ଠାରୁ ଯାଉଥିଲା ଓ ଏଥିରେ ଆଉ କିଏ ସମୃକ୍ତ ଅଛି ଏହାର ତଦନ୍ତ ଜାରି ରଖିଛି ପୋଲିସ।
