ଭୁବନେଶ୍ବର ୨୭।୦୬: ରାଜଧାନୀ ଉପକଣ୍ଠରେ ବଡ ଧରଣର ଡକାୟତି । ବରିଷ୍ଠ ନାଗରିକଙ୍କ ଘରେ କଳାକନା ବୁଲାଇଲା ଲୁଟେରା । ଦମ୍ପତିଙ୍କୁ ତାଲା ପକାଇ ଅଧା କିଲୋ ସୁନା , ୧୨ ଲକ୍ଷ ଟଙ୍କା ଲୁଟିଥିବା ନେଇ ଅଭିଯୋଗ । ଚନ୍ଦକା ଥାନା ଅନ୍ତର୍ଗତ ହରିପୁର ଗାଁରେ ଏଭଳି ଘଟଣା ଘଟିଛି । ଘର ମାଲିକ ସତ୍ୟନାରାୟଣ ମିଶ୍ରଙ୍କ ଅଭିଯୋଗ ପରେ ଚନ୍ଦକା ପୋଲିସ ଛାନ୍ଭିନ୍ ଆରମ୍ଭ ।
ଖବର ଅନୁଯାୟୀ, ରବିବାର ବିଳମ୍ବିତ ରାତିରେ ଲୁଟେରାମାନେ ପାଚେରୀ ଡେଇଁ ଘର ଭିତରେ ପ୍ରବେଶ କରିଥିଲେ । ଗ୍ୟାସ୍ କଟର ସହାୟତାରେ ଝରକାକୁ ପ୍ରଥମେ କାଟିଥିଲେ । ଏହାପରେ ସେହି ରାସ୍ତା ଦେଇ ଘର ଭିତରକୁ ପଶିଥିଲେ । ସତ୍ୟନାରାୟଣ ଓ ତାଙ୍କ ପତ୍ନୀ ଘରେ ଶୋଇଥିବା ଅବସ୍ଥାରେ ବାହାର ପଟୁ ତାଲା ପକାଇଥିଲେ । ଏହାପରେ ଘରେ ଥିବା ୨ଟି ଆଲ୍ମିରା ଭାଙ୍ଗି ସେଥିରେ ଥିବା ୧୨ଟି ସୁନା ହାର, ମୁଦି, ସୁନା ଚୁଡି, କାନଫୁଲ ଆଦି ଲୁଟି ନେଇଥିଲେ । ଏହାବ୍ୟତୀତ ଜମି କିଣିବା ପାଇଁ ଆଲମିରାରେ ଥିବା ନଗଦ ୧୨ ଲକ୍ଷ ଟଙ୍କା ମଧ୍ୟ ଲୁଟି ନେଇଛନ୍ତି ଲୁଟେରା । ଏସବୁ ଘଟଣା ଜାଣିବା ପରେ ଚନ୍ଦକା ଥାନାରେ ଲିଖିତ ଭାବେ ଅଭିଯୋଗ କରିଛନ୍ତି ଅବସରପ୍ରାପ୍ତ କିରାଣୀ ସତ୍ୟନାରାୟଣ ମିଶ୍ର । ଅଭିଯୋଗ ପରେ ଚନ୍ଦକା ଥାନା ତଦନ୍ତ ଆରମ୍ଭ କରିଛି ।
