ବ୍ରହ୍ମଗିରି ୨୫/୦୬: ୧୧ ଦିନରେ ମହାପ୍ରଭୁ ଶ୍ରୀ ଅଲାରନାଥ ଙ୍କ ଅନବସର ଦର୍ଶନ । ଅଲାରନାଥଙ୍କ ଅନବସର ଦର୍ଶନକୁ ରହିଲା ଆଉ ୩ ଦିନ । ଆଜି ଅନବସର ଦ୍ୱାଦଶୀ ତିଥିରେ ଦର୍ଶନ କରିବା ପାଇଁ ଦ୍ୱାର ଖୋଲା ହେବାଠାରୁ ଗହଳି ଆରମ୍ଭ ହେବା ସହ ବ୍ୟାରିକେଡ ଲମ୍ବା ଲାଇନରେ ଭକ୍ତ ଙ୍କ ଭିଡ଼ ଦେଖିବାକୁ ମିଳିଛି ।
ସ୍ନାନ ବେଦୀରେ ଅତ୍ୟଧିକ ସ୍ନାନ ପରେ ଶ୍ରୀଜୀଉଙ୍କୁ ଜ୍ୱର ହେବା ପରେ ଏବେ ସେବାୟତଙ୍କ ଓଷ ଲାଗିହେବା ଦ୍ୱାରା ଶ୍ରୀଜୀଉମାନେ ଧୀରେ ଧୀରେ ସୁସ୍ଥ ହେଉଛନ୍ତି । ସୁସ୍ଥ ହେଲା ପରେ ନବଯୌବନ ଦର୍ଶନ ଦେବା ସହ ଶ୍ରୀ ଜୀଉ ଙ୍କର ହେବ ଗୁଣ୍ଡିଚା ଯାତ୍ରା । କିନ୍ତୁ ଏହି ୧୪ ଦିନ ପାଇଁ ଭକ୍ତଙ୍କୁ ନିରାଶ କରିନାହାନ୍ତି ଭକ୍ତର ଭଗବାନ ।
ବ୍ରହ୍ମଗିରିରେ ଅଲାରନାଥ ପୀଠରେ ଚତୁର୍ଭୁଜ ନାରାୟଣ ରୂପରେ ଦେଉଛନ୍ତି ଦର୍ଶନ । ନାରାୟଣଙ୍କ ରୂପରେ ଜଗନ୍ନାଥଙ୍କୁ ଦର୍ଶନ କରୁଛନ୍ତି ଜଗନ୍ନାଥ ପ୍ରେମୀ ଭକ୍ତ। ବ୍ରହ୍ମଗିରିର ଅଲାରନାଥ ପୀଠରେ ଶଙ୍ଖ ଚକ୍ର ଗଦା ପଦ୍ମ ଧାରୀ ଚତୁର୍ଭୁଜ ନାରାୟଣଙ୍କୁ ଦର୍ଶନ କରି ନିଜ ଜୀବନକୁ ଭାଗ୍ୟ ମଣିଛନ୍ତି ଶ୍ରଦ୍ଧାଳୁ । ଖିରିଖିଆ ଠାକୁର ଅଲାରନାଥଙ୍କୁ ଦର୍ଶନ କରି ସମଫଳ ପାଇବାର ବିଶ୍ୱାସ ନେଇ ଭକ୍ତ ଛୁଟି ଆସୁଛନ୍ତି ବ୍ରହ୍ମଗିରିକୁ ।
ଆଜି ଭୋର ୩.୩୦ ରେ ମହାପ୍ରଭୁଙ୍କ ଦ୍ୱାର ଫିଟା ଯାଇ ମଙ୍ଗଳ ଆଳତୀ ହୋଇଥିଲା । ତାପରେ ତଡପଲାଗି, ଅବକାଶ, ଅନବସର ବେଶ, ତୁଳସୀ ଲାଗି ଏବଂ ଗୋପାଳବଲ୍ଲଭ ୫.୩୦ ସରିବା ପରେ ସର୍ବସାଧାରଣ ଦର୍ଶନ ଆରମ୍ଭ ହୋଇଛି । ଏବେ ଶ୍ରଦ୍ଧାଳୁମାନେ ଧାଡିରେ ଆସି ଦର୍ଶନ କରୁଛନ୍ତି ।
