ସାଲେପୁର ୬।୬: କଟକ ଜିଲ୍ଲା ସାଲେପୁର ବ୍ଲକ୍ ପ୍ରଧାନପଡା ଗ୍ରାମରେ ଅଘଟଣ । ବିଦ୍ୟୁତ ବିଭାଗରେ କାର୍ଯ୍ୟରତ ଥିବା କର୍ମଚାରୀଙ୍କର ବିଦ୍ୟୁତ ସଂସ୍ପର୍ଶରେ ଆସି ମୃତ୍ୟୁ ହୋଇଛି । ସେ ପ୍ରଧାନପଡାଠାରେ ବିଦ୍ୟୁତ ବିଭାଗରେ କାମ କରୁଥିଲେ । ତାଙ୍କୁ ବିଦ୍ୟୁତ ବିଭାଗ ପକ୍ଷରୁ କୌଣସି ସେଫ୍ଟି ସରଞ୍ଜାମ ଦିଆଯାଇନଥିବା ଅଭିଯୋଗ ଆଣିଛନ୍ତି ପରିବାର ଲୋକେ ।
ମୃତ ବିଦ୍ୟୁତ କର୍ମଚାରୀ ଜଣଙ୍କ ହେଲେ ସାଲେପୁର ସତ୍ୟଭାମାପୁର ଗ୍ରାମର ବଳରାମ ଦାସଙ୍କ ପୁଅ ଜୟନ୍ତ ଦାସ । ଜୟନ୍ତ ଟିପିସିଓଡିଏଲ ବହୁଗ୍ରାମ ସେକ୍ସନରେ କାର୍ଯ୍ୟରତ ଥିଲେ । ଶବ ବ୍ୟବଚ୍ଛେଦ ପରେ ପରିବାର ଓ ସ୍ଥାନୀୟ ଲୋକେ ପରିବାରର ଜଣଙ୍କୁ ଚାକିରୀ ଦେବା ସହ ୫୦ଲକ୍ଷ ଟଙ୍କା କ୍ଷତିପୂରଣ ଦାବିରେ ବହୁଗ୍ରାମ ଟିପିସିଓଡିଏଲ କାର୍ଯ୍ୟାଳୟ ସମ୍ମୁଖରେ ମୃତଦେହ ରଖି ଧାରଣା ଦେଇଛନ୍ତି ।
