ଯାଜପୁର ୩୧।୦୫: ଯାଜପୁର ଜିଲ୍ଲା କୁଆଖିଆ ଥାନା ରାଜେନ୍ଦ୍ରପୁର ଗାଁରେ ନରବଳୀ ମାମଲାରେ ଆସିଲା ରାୟ । ଅଭିଯୁକ୍ତକୁ ଆଜୀବନ କାରାଦଣ୍ଡାଦେଶ ଶୁଣାଇଲେ କୋର୍ଟ । ନରବଳୀ ଘଟଣାରେ ଅଭିଯୁକ୍ତ ଦୀପକ ବାରିକକୁ ଆଜୀବନ କାରାଦଣ୍ଡାଦେଶ ଦେଇଛନ୍ତି କୋର୍ଟ। ଏତଦ୍ ବ୍ୟତୀତ ୩୫ ହଜାର ଟଙ୍କା ଜରିମାନା ସହ ଅନାଦେୟ ଅତିରିକ୍ତ ୬ ମାସ ଜେଲ ଦଣ୍ଡ ଶୁଣାଇଛନ୍ତି ଯାଜପୁର ଅତିରିକ୍ତ ଜିଲ୍ଲା ଦୌରାଜଜ୍।
ଖବର ଅନୁଯାୟୀ, ୨୦୧୫ ମସିହା ଫେବ୍ରୁଆରୀ ମାସ ୨୬ ତାରିଖରେ ଯାଜପୁର ଜିଲ୍ଲା କୁଆଖିଆ ଥାନା ଅନ୍ତର୍ଗତ ରାଜେନ୍ଦ୍ରପୁର ଗାଁର ଅଭିଷେକ ନାୟକକୁ ବଳି ଦେବାପାଇଁ ଦୀପକ ବାରିକ ଡାକି ନେଇଥିଲା। ଏହାପର ଅଭିଷେକଙ୍କ ମୃତଦେହ ଗାଁର ମଙ୍ଗଳା ମନ୍ଦିର ପାଖରୁ ମିଳିଥିଲା। ଦୀପକ ବାରିକକୁ ଗୁଣିଗାରେଡ଼ି ସନ୍ଦେହରେ ଗିରଫ କରାଯାଇଥିଲା। କୁଆଖିଆ ଥାନାରେ ୨୯/୨୦୧୫ ରେ ଏନେଇ ଏକ ମାମଲା ରୁଜୁ ହୋଇ ବିଚାରଧୀନ ଥିଲା। ଏବେ ଏହି ଘଟଣାକୁ ନେଇ ଯାଜପୁର ଅତିରିକ୍ତ ଜିଲ୍ଲା ଦୌରାଜଜ୍ ୨୪ ଜଣ ସାକ୍ଷୀଙ୍କ ଆଧାରରେ ଆସାମୀ ଦୀପକ ବାରିକକୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି। ଏହା ସହ ଦୋଷୀଙ୍କୁ ୩୫ ହଜାର ଟଙ୍କା ଜରିମାନା ସହ ଅନାଦେୟ ଅତିରିକ୍ତ ୬ ମାସ ଜେଲ ଦଣ୍ଡ ଶୁଣାଇଛନ୍ତି କୋର୍ଟ।
