ନୂଆଦିଲ୍ଲୀ ୦୬।୦୪: ରାଜସ୍ଥାନ ରୟାଲ୍ସକୁ ଲାଗିଲା ବଡ ଝଟକା। ଦ୍ରୁତ ବୋଲର ନାଥନ କୁଲଟର ନାଇଲ ଆଇପିଏଲର ୧୫ତମ ସିଜିନରୁ ବାଦ୍ ପଡିଛନ୍ତି। ଆହତ କାରଣରୁ ନାଇଲ ବାକି ମ୍ୟାଚ୍ଗୁଡିକରେ ଖେଳି ପାରିବେ ନାହିଁ ବୋଲି ଦଳ ପକ୍ଷରୁ କୁହାଯାଇଛି। ରାଜସ୍ଥାନ ଏ ପର୍ଯ୍ୟନ୍ତ ତିନୋଟି ମ୍ୟାଚ୍ରୁ ଦୁଇଟି ମ୍ୟାଚ୍ ଜିତିଥିବା ବେଳେ ଗୋଟିଏ ହାରିଛି। ଦଳ କୁଲଟର ନାଇଲଙ୍କ ବଦଳ ଖେଳାଳି ଏ ଯାଏଁ ଘୋଷଣା କରି ନାହିଁ।
ରାଜସ୍ଥାନ ଆଇପିଏଲ ମେଗା ନିଲାମ ୨୦୨୨ରେ କୁଲଟର ନାଇଲଙ୍କୁ ଦୁଇ କୋଟିରେ କିଣିଥିଲା। ସନରାଇଜର୍ସ ହାଇଦ୍ରାବାଦ ବିପକ୍ଷ ମ୍ୟାଚ୍ରେ ନାଇଲଙ୍କୁ ଆଘାତ ଲାଗିଥିଲା। ଏହି ମ୍ୟାଚ୍ରେ ରାଜସ୍ଥାନ ହାଇଦ୍ରାବାଦକୁ ୬୧ ରନରେ ପରାସ୍ତ କରିଥିଲା। ମୁକାବିଲା ସମୟରେ କୁଲଟର ନାଇଲ ବହୁତ ମହଙ୍ଗା ସାବ୍ୟସ୍ତ ହୋଇଥିଲେ ଏବଂ ୩ ଓଭରରେ ୪୮ ରନ ଦେଇଥିଲେ।
ନାଥନ କୁଲଟର ନାଇଲ ହାର୍ମଷ୍ଟ୍ରିଙ୍ଗ ଆଘାତ କାରଣରୁ ପୂରା ସିଜିନରୁ ବାଦ ପଡିବାରୁ ଅଧିନାୟକ ସଞ୍ଜୁ ସାମସନଙ୍କୁ ଝଟକା ଲାଗିଛି। ଏବେ ଏହା ଦେଖିବା ବାକି ରହିଲା ଯେ, ଟିମ୍ ନାଇଲଙ୍କ ସ୍ଥାନରେ କାହାକୁ ଦଳରେ ସାମିଲ୍ କରୁଛି।
