ନୂଆଦିଲ୍ଲୀ ୧୫/୦୨: ବୁଧବାରଠୁ ଭାରତ ଓ ଓ୍ୱେଷ୍ଟ ଇଣ୍ଡିଜ ମଧ୍ୟରେ ଆରମ୍ଭ ହେବ ଟି୨୦ ମୁକାବିଲା । ଦିନିକିଆ ସିରିଜ୍ ଜିତିବା ପରେ ଟିମ୍ ଇଣ୍ଡିଆ ଆତ୍ମବିଶ୍ୱାସ ଆକାଶଛୁଆଁ ରହିଛି । ଦଳ ଟି୨୦ ସିରିଜ୍ ମଧ୍ୟ ମୂଳପୋଛ ଲକ୍ଷ୍ୟରେ ରହିବ । ତେବେ ମ୍ୟାଚ୍ ପୂର୍ବରୁ ଷ୍ଟାଡିୟମରେ ଖୁବ୍ ପ୍ରାକ୍ଟିସ୍ କରୁଛନ୍ତି ଭାରତୀୟ ଖେଳାଳି । ଏପରିକି ପୂର୍ବତନ ଅଧିନାୟକ ବିରାଟ କୋହଲି ନେଟସରେ ଦମଦାର ସଟ୍ ଖେଳୁଥିବା ଦେଖିବାକୁ ମିଳିଛି ।
ଲଗାତର ବାବେ ବିରାଟଙ୍କ ବ୍ୟାଟ୍ ନିରବ ରହିଛି । ବଡ ସ୍କୋର କରିପାରୁ ନାହାଁନ୍ତି ବିରାଟ । ଶୀଘ୍ର ଆଉଟ ହୋଇଯାଉଛନ୍ତି । ତେବେ ଇଣ୍ଡିଜ ବିପକ୍ଷ ଟି୨୦ ସିରିଜ୍ ପୂର୍ବରୁ ସେ ଦମଦାର ଅଭ୍ୟାସ କରିଛନ୍ତି । ପ୍ରାୟ ୪୫ ମିନିଟ୍ ଧରି ସେ ଅଭ୍ୟାସ କରିଥିବା ଦେଖିବାକୁ ମିଳିଛି । ନିଜ ପସନ୍ଦର ସଟ୍ ମଧ୍ୟ ସେ ଖେଳିଛନ୍ତି ।
କୋହଲି ଲିମିଟେଡ୍ ଓଭର ଫର୍ମାଟରେ ୨୦୧୯ରେ ଶେଷ ଶତକ ଲଗାଇଥିଲେ । ଏହାପରଠୁ ସେ ୧୦ ଅର୍ଦ୍ଧଶତକ ଲଗାଇଥିଲେ ମଧ୍ୟ ଶତକ କରିପାରି ନାହାଁନ୍ତି ।
ସମସ୍ତ ଫର୍ମାଟକୁ ଦେଖିଲେ କୋହଲି ୨ ବର୍ଷ ହେଲା କୌଣସି ଅନ୍ତରାଷ୍ଟ୍ରୀୟ ଶତକ ଲଗାଇ ନାହାଁନ୍ତି । ସେ ବାଂଲାଦେଶ ବିପକ୍ଷ ଟେଷ୍ଟ ମୁକାବିଲାରେ ୨୦୧୯ ନଭେମ୍ବରରେ ଶେଷ ଥର ପାଇଁ ଅନ୍ତର୍ଜାତୀୟ ଶତକ ଲଗାଇଥିଲେ ।
