ନୂଆଦିଲ୍ଲୀ,୦୭/୦୨: ଏସିଆନ ଡେଭଲପମେଣ୍ଟ ବ୍ୟାଙ୍କ (ଏଡିବି) ୨୦୨୧ରେ ଭାରତକୁ ୪.୬ ବିଲିୟନ ଡଲାରର ଋଣ ପ୍ରଦାନ କରିଛି । କରୋନା ଭାଇରସ ଲଢ଼େଇ ଲାଗି ଏହା ମଧ୍ୟରେ ୧.୮ ବିଲିୟନ ଡଲାରର ଋଣ ସାମିଲ ରହିଛି ।
ବ୍ୟାଙ୍କ ପକ୍ଷରୁ କୁହାଯାଇଛି ଯେ, ଟିକା କ୍ରୟ ଲାଗି ୧.୫ ବିଲିୟନ ଡଲାର, ସହାରାଞ୍ଚଳ ପ୍ରାଥମିକ ସ୍ୱାସ୍ଥ୍ୟ ବ୍ୟବସ୍ଥା ଲାଗି ୩୦୦ ନିୟୁତ ଡଲାରର ଋଣ ଭାରତକୁ ପ୍ରଦାନ କରାଯାଇଛି । ଏହା ଭବିଷ୍ୟତର ମହାମାରୀକୁ ସାମ୍ନା କରିବା ଦିଗରେ ସହାୟକ ହେବ ବୋଲି ବ୍ୟାଙ୍କ ଆଶା ପ୍ରକଟ କରିଛି । ଦେଶର ପରିବହନ କ୍ଷେତ୍ର ବିକାଶ, ସହରାଞ୍ଚଳ ବିକାଶ, ଅର୍ଥ, କୃଷି ଏବଂ ଦକ୍ଷତା ବିକାଶ ଲାଗି ବ୍ୟାଙ୍କ ନିରନ୍ତର ଭିତ୍ତିରେ ସହାୟତା ଯୋଗାଇ ଦେଉଛି ।
ଏଡିବିର କଣ୍ଟ୍ରି ଡାଇରେକ୍ଟର ଟାକେଓ କୋନିସି କହିଛନ୍ତି ଯେ, କୋଭିଡ-୧୯ ମୁକାବିଲା ସହ ଭାରତ ସରକାର ଗ୍ରହଣ କରୁଥିବା ଅନ୍ୟ ବିଭିନ୍ନ କାର୍ଯ୍ୟକ୍ରମ ଲାଗି ସହାୟତା ଯୋଗାଣ ଧାରା ଜାରି ରହିଛି । ବିଶେଷ କରି ସହରାଞ୍ଚଳ ପରିଚାଳନା, ଶିଳ୍ପ କ୍ଷେତ୍ରକୁ ପ୍ରତିଦ୍ୱନ୍ଦୀ କରି ଗଢ଼ି ତୋଳିବା, ନିଯୁକ୍ତି ସୃଷ୍ଟି, ସଂଯୋଗୀକରଣ ବ୍ୟବସ୍ଥାରେ ଉନ୍ନତି ଏବଂ ଦକ୍ଷତା ବିକାଶ ଭଳି ବିଭିନ୍ନ ଫୋକସ କ୍ଷେତ୍ରକୁ ଋଣ ଯୋଗାଣ ତ୍ୱରାନ୍ୱିତ କରାଯାଉଛି ।
