ଲଣ୍ଡନ,୧୯/୦୬: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବାକୁ ଥିବା ବିଶ୍ୱ ଟେଷ୍ଟ ଚାମ୍ପିଅନସିପର ଫାଇନାଲ ବର୍ଷା ପାଇଁ ବାଧାପ୍ରାପ୍ତ ହୋଇଛି । ବର୍ଷା କାରଣରୁ ପ୍ରଥମ ଦିନ ଖେଳ ଆରମ୍ଭ ହୋଇପାରି ନାହିଁ । ସାଉଥମ୍ପଟନରେ ଲଗାତର ବର୍ଷା ପାଇଁ ପ୍ରଥମ ଦିନର ଖେଳକୁ ରବ୍ଦ କରିଦିଆଯାଇଛି ।
ଷ୍ଟାଡିୟମରେ ଗୁରୁବାର ରାତିସାରା ବର୍ଷା ହେଉଥିଲା । ପୂର୍ବରୁ ମଧ୍ୟ ବର୍ଷା ହେବା ନେଇ ଆଶଙ୍କା କରାଯାଉଥିଲା । ଆକ୍ୟୁଓ୍ୱେଦର୍ ମଧ୍ୟ ୧୮ରୁ ୨୨ ଯାଏଁ ସାଉଥମ୍ପଟନରେ ବର୍ଷା ହେବା ନେଇ ଅନୁମାନ ଲଗାଇଥିଲା । ପ୍ରଥମ ଦିନର ଖେଳ ରବ୍ଦ ହେବା ପରେ ବି ମ୍ୟାଚ୍ ଆହୁରି ୫ ଦିନ ବାକି ରହିଛି । କାରଣ ଇଂଲଣ୍ଡର ଜଳବାୟୁକୁ ଦେଖି ପୂର୍ବରୁ ଆଇସିସି ପ୍ଲେଇଂ କଣ୍ଡିସନ୍ ବାବଦରେ ଘୋଷଣା କରିଥିଲା । ଆଇସିସି ଏହି ଟେଷ୍ଟ ପାଇଁ ଗୋଟିଏ ଦିନ ରିଜର୍ଭ ରଖିଥିଲା ।
ଆଇସିସି ଅନୁସାରେ, ରିଜର୍ଭ ଡେ ସେତେବେଳେ ବ୍ୟବହାର କରାଯିବ ଯେତେବେଳେ ୫ ଦିନିଆ ମ୍ୟାଚରେ ୩୦ ଘଣ୍ଟା ଖେଳ ହୋଇପାରିବ ନାହିଁ । ଏହି ଗୁରୁତ୍ୱପୂର୍ଣ୍ଣ ମୁକାବିଲାର ପ୍ରଥମ ଦିନ ଖେଳ ନହୋଇଥିବାରୁ ବାକି ୫ ଦିନରେ ୯୮ ଓଭର ଲେଖାଏଁ ଖେଳ ହେବ । ଦୈନିକ ଅତିରିକ୍ତ ୮ ଓଭର ଖେଳାଯିବ ।
ଏହାପରେ ବି ଯଦି ମ୍ୟାଚ୍ ଡ୍ର ରୁହେ ତେବେ ଉଭୟ ଟିମ୍କୁ ଯୁଗ୍ମ ଭାବେ ବିଜେତା ଘୋଷଣା କରାଯିବ । ମ୍ୟାଚ୍ ଟାଇ ହେଲେ ବି ଉଭୟ ଦଳ ମିଳିତ ଭାବେ ବିଜେତା ହେବେ । ଏହି ନିଷ୍ପତ୍ତି ୨୦୧୮ ମସିହା ଜୁନ ଆଇସିସି ବିଶ୍ୱ ଟେଷ୍ଟ ଚାମ୍ପିଅନସିପ୍ ଆରମ୍ଭ ହେବା ପୂର୍ବରୁ ନିଆଯାଇଥିଲା ।
