ନୂଆଦିଲ୍ଲୀ ୨୦ ।୦୫: କରୋନାର ଦ୍ୱିତୀୟ ଲହରର ପ୍ରକୋପ ମଧ୍ୟରେ ଅଧିକ ଟିକାକରଣକୁ ଅଧିକ ବ୍ୟାପକ କରିବା ପାଇଁ ସରକାରଙ୍କ ପକ୍ଷରୁ ପ୍ରୟାସ ଜାରି ରହିଛି । ଲୋକଙ୍କ ପର୍ଯ୍ୟନ୍ତ ସହଜରେ କେମିତି ଭ୍ୟାକ୍ସିନ ପହଞ୍ଚାଯାଇ ପାରିବ ଏନେଇ ସରକାର ବିଭିନ୍ନ ଉପାୟ କରୁଛଛନ୍ତି। ଏହି କ୍ରମରେ ଭାରତ ସରକାରଙ୍କ ସ୍ୱାସ୍ଥ୍ୟ ମନ୍ତ୍ରଣାଳୟ ଏହି ଦିଗରେ ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି । ସ୍ୱାସ୍ଥ୍ୟ ମନ୍ତ୍ରଣାଳୟ ଏକ ହ୍ୱାଟ୍ସଆପ୍ ନମ୍ବର ଜାରି କରିଛନ୍ତି। ଏହି ନମ୍ବର ଜରିଆରେ ଆପଣ ନିଜ ଅଞ୍ଚଳରେ ଭ୍ୟାକ୍ସିନ ଉପଲବ୍ଧ ଅଛି କି ନାହିଁ ଜାଣି ପାରିବେ।
ସ୍ୱାସ୍ଥ୍ୟ ମନ୍ତ୍ରଣାଳୟ ଗୁରୁବାର ୯୦୧୩୧୫୧୫୧୫ ନମ୍ବର ଜାରି କରିଛନ୍ତି। ଘରେ ବସି ଆପଣ ଏହି ନମ୍ବର ମାଧ୍ୟମରେ ନିଜ ଅଞ୍ଚଳରେ ଭ୍ୟାକ୍ସିନ ଉପଲବ୍ଧ ଅଛି କି ନାହିଁ ଜାଣି ପାରିବେ। ଏଥିପାଇଁ ଆପଣଙ୍କୁ କେବଳ ଏକ ମେସେଜ କରିବାକୁ ପଡିବ। ହ୍ୱାଟ୍ସଆପ ନମ୍ବରକୁ ଯାଇ ନିଜ ଏରିଆର ପିନ କୋଡ୍ ଟାଇପ୍ କରି ପଠାଇ ଦେବେ। ସେପଟୁ ଆପଣଙ୍କ ଏରିଆରେ ଭ୍ୟାକ୍ସିନ ଉପଲବ୍ଧ ଅଛି କି ନାହିଁ ଆପଣଙ୍କୁ ସବିଶେଷ ତଥ୍ୟ ମିଳିଯିବ।
ଅଧିକାରୀଙ୍କ ଅନୁଯାୟୀ, ଏହି ବ୍ୟବସ୍ଥାରେ ଲୋକଙ୍କୁ ଟିକାକରଣ ପାଇଁ ହଇରାଣ ହେବାକୁ ପଡିବ ନାହିଁ ଏବଂ ବିନା ସୂଚନାରେ ଅଯଥାରେ ଟିକା କେନ୍ଦ୍ର ଯିବାକୁ ପଡିବ ନାହିଁ। ଯେବେ ଆପଣଙ୍କ ପାଳି ପଡିବ କେନ୍ଦ୍ରକୁ ଯାଇ ଆପଣ ଟିକା ଲଗାଇ ପାରିବେ। ଅନ୍ୟପଟେ କରୋନା ଯାଞ୍ଚ ପାଇଁ ଦେଶର ଅଗ୍ରଣୀ ମେଡିକାଲ ରିସର୍ଚ୍ଚ ସଂସ୍ଥା ଆଇସିଏମଆର ନୂତନ ଗାଇଡ୍ଲାଇନ୍ ଜାରି କରିଛି। ରାପିଡ ଆଣ୍ଟିଜେନ୍ ଟେଷ୍ଟ ପାଇଁ ଏକ କିଟ୍କୁ ଆଇସିଏମଆର ପକ୍ଷରୁ ମଞ୍ଜୁରୀ ମିଳି ଯାଇଛି। ଏହି କିଟ୍ ସାହାଯ୍ୟରେ ଆପଣ ଘରେ ରହି ନାକରୁ ନମୂନା ସଂଗ୍ରହ କରି ପାରିବେ।
