ନୂଆଦିଲ୍ଲୀ, ୦୩/୦୫: ଦିଲ୍ଲୀ କ୍ୟାପିଟାଲ୍ସ ଆଇପିଏଲର ୨୯ତମ ମୁକାବିଲାରେ ପଞ୍ଜାବ କିଙ୍ଗସକୁ ୭ ଓ୍ୱିକେଟରେ ପରାସ୍ତ କରିଛି । ଦିଲ୍ଲୀ ଟସ୍ ଜିତି ପଞ୍ଜାବକୁ ପ୍ରଥମେ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା । ଅଧିନାୟକ ମୟଙ୍କ ଅଗ୍ରଓ୍ୱାଲଙ୍କ ୯୯ ରନ୍ ବଳରେ ଦଳ ୨ ୦ଓଭରରେ ୬ ଓ୍ୱିକେଟ୍ ହରାଇ ୧୬୬ ରନ୍ କରିଥିଲା । ଜବାବରେ ଦିଲ୍ଲୀ ୧୭.୪ ଓଭରରେ ୩ ଓ୍ୱିକେଟ୍ ହରାଇ ୧୬୭ ରନ୍ କରି ବିଜୟ ଲକ୍ଷ୍ୟ ହାସଲ କରି ନେଇଥିଲା ।
ପଞ୍ଜାବ ବ୍ୟାଟିଂ କରୁଥିବା ବେଳେ ଏକ ଅଜବ ଘଟଣା ଘଟିଥିଲା । ଇନିଂସର ୧୪ ତମ ଓଭରରେ କ୍ରିଜରେ ଥିଲେ ମୟଙ୍କ ଅଗ୍ରଓ୍ୱାଲ ଓ ଦୀପକ ହୁଡ୍ଡା । ଅକ୍ଷର ପଟେଲ ବୋଲିଂ କରୁଥିଲେ । ଅକ୍ଷରଙ୍କ ତୃତୀୟ ବଲରେ ମୟଙ୍କ ଏକ୍ସଟ୍ରାକଭର୍ ରେ ଏକ ସଟ୍ ମାରିଥିଲେ ଓ ରନ୍ ନେବାକୁ ଚାହୁଁଥିଲେ । ନନ୍ ଷ୍ଟ୍ରାଇକର୍ ଏଣ୍ଡରେ ଥିବା ଦୀପକ ହୁଡ୍ଡା ମଧ୍ୟ କ୍ରିଜ୍ ବାହାରକୁ ଚାଲିଯାଇଥିଲେ ।
ଦୀପକଙ୍କୁ ରନ୍ ପୂରଣ ହେବ ବୋଲି ଲାଗିନଥିଲା । ଏହାପରେ ସେ ନିଜ କ୍ରିଜକୁ ଫେରିଯାଇଥିଲେ । କିନ୍ତୁ ମୟଙ୍କ ରହି ନଥିଲେ । ଉଭୟ ବ୍ୟାଟସମ୍ୟାନ୍ ଗୋଟିଏ ଦିଗକୁ ଧାଇଁଥିଲେ । ଫିଲଡର୍ ସିମରନ୍ ହେଟମାୟର ବଲ୍ ଥ୍ରୋ କରିଥିଲେ । ଅକ୍ଷର ସମୟ ନଷ୍ଟ ନକରି ପନ୍ତଙ୍କୁ ବଲ୍ ଦେଇଥିଲେ । ପନ୍ତ ମଧ୍ୟ ଓ୍ୱିକେଟରେ ବଲ୍ ଲଗାଇଥିଲେ ।
ଫିଲ୍ଡ ଅମ୍ପାୟାର ରନ୍ ଆଉଟକୁ ନେଇ ତୃତୀୟ ଅମ୍ପାୟାରଙ୍କ ସହାୟତା ଲୋଡିଥିଲେ । ଏଥିରେ ଦୀପକ ହୁଡ୍ଡା ଅଧା ପିଚ୍ ଅତିକ୍ରମ କରିପାରିନଥିଲେ ଓ ଅକ୍ଷର ତାଙ୍କୁ ରନ୍ ଆଉଟ୍ କରିଥିବା ଦେଖିବାକୁ ମିଳିଥିଲା । ଏହାପରେ ଦୀପକ ମାତ୍ର ୧ ରନ୍ କରି ପ୍ୟାଭିଲିୟନ ଫେରିଥିଲେ ।
ମୟଙ୍କ ୫୮ ବଲ୍ରୁ ୯୯ ରନ୍ କରିଥିଲେ । ଏହି ପାଳିରେ ସେ ୮ ଚୌକା ଓ ୪ ଛକ୍କା ଥିଲା । ସେ ୯୯ ରନରେ ଅପରାଜିତ ରହିଥିବା ହେଉଛନ୍ତି ତୃତୀୟ ବ୍ୟାଟସମ୍ୟାନ୍ । ଏହାପୂର୍ବରୁ କ୍ରିସ ଗେଲ୍ ଓ ସୁରେଶ ରାଇନା ୯୯ ରନରେ ପ୍ୟାଭିଲିୟନ ଫେରିଥିଲେ ।
