ନୂଆଦିଲ୍ଲୀ: କୋଭିଡ୍-୧୯ ସଙ୍କଟ ମୁକାବିଲା ଏବଂ ‘କଣ୍ଟେନ୍ମେଣ୍ଟ୍’ ପଦକ୍ଷେପ ଗ୍ରହଣ କରିବା ନିମନ୍ତେ କେନ୍ଦ୍ର ସରକାର ‘ରାଜ୍ୟ ବିପର୍ଯ୍ୟୟ ମୁକାବିଲା ପାଣ୍ଠି’ ପାଇଁ ଅଗ୍ରୀମ ଭାବେ ପ୍ରଥମ କିସ୍ତିରେ ୮,୮୭୩.୬ କୋଟି ଟଙ୍କା ରିଲିଜ୍ କରିଛି।
କୋଭିଡ୍-୧୯ ‘କଣ୍ଟେନ୍ମେଣ୍ଟ୍’ ପଦକ୍ଷେପ ନିମନ୍ତେ ରାଜ୍ୟ ସରକାର ‘ରାଜ୍ୟ ବିପର୍ଯ୍ୟୟ ମୁକାବିଲା ପାଣ୍ଠି’ର ୫୦% ବ୍ୟବହାର କରିପାରିବେ। ଗତ ୨୪ ଘଣ୍ଟା ମଧ୍ୟରେ ପ୍ରଥମ କରି ଦେଶରେ କୋଭିଡ୍-୧୯ ଆକ୍ରାନ୍ତଙ୍କ ସଂଖ୍ୟା ୪ ଲକ୍ଷ ଟପିବା ସମୟରେ ସରକାର ଏହି ପାଣ୍ଠି ରିଲିଜ୍ କରିଛନ୍ତି।
ଏ ସଂକ୍ରାନ୍ତରେ ଗୃହ ବ୍ୟାପାର ମନ୍ତ୍ରାଳୟ କହିଛି, ଜୁନ୍ ମାସରେ ମିଳୁଥିବା ପ୍ରଥମ କିସ୍ତିକୁ କେନ୍ଦ୍ର ସରକାର ଆଗୁଆ କରି ରାଜ୍ୟମାନଙ୍କ ‘ରାଜ୍ୟ ବିପର୍ଯ୍ୟୟ ମୁକାବିଲା ପାଣ୍ଠି’ ପାଇଁ ରିଲିଜ୍ କରିଛନ୍ତି। ୮,୮୭୩ କୋଟି ଟଙ୍କାର ଅଧା ୪,୪୩୬ କୋଟି ଟଙ୍କା କୋଭିଡ୍-୧୯ ‘କଣ୍ଟେନ୍ମେଣ୍ଟ୍’ ପଦକ୍ଷେପରେ ବ୍ୟବହାର କରାଯାଇ ପାରିବ ବୋଲି ଗୃହ ବ୍ୟାପାର ମନ୍ତ୍ରାଳୟ କହିଛି।
ଗୃହ ବ୍ୟାପାର ମନ୍ତ୍ରାଳୟର ସୁପାରିସକ୍ରମେ ଅର୍ଥ ମନ୍ତ୍ରାଳୟର ବ୍ୟୟ ବିଭାଗ ସ୍ବତନ୍ତ୍ର ବ୍ୟବସ୍ଥା ଭାବେ ଆର୍ଥିକ ବର୍ଷ ୨୦୨୧-୨୨ ନିମନ୍ତେ ସମସ୍ତ ରାଜ୍ୟ ପାଇଁ ଆଗୁଆ କରି ଏହି ପାଣ୍ଠି ରିଲିଜ୍ କରିଛି।
ଅର୍ଥ କମିସନ୍ଙ୍କ ସୁପାରିସ ଆଧାରରେ ‘ରାଜ୍ୟ ବିପର୍ଯ୍ୟୟ ମୁକାବିଲା ପାଣ୍ଠି’ର ପ୍ରଥମ କିସ୍ତି ସାଧାରତଃ ଜୁନ୍ ମାସରେ ରିଲିଜ୍ କରାଯାଇଥାଏ। କିନ୍ତୁ, ରାଜ୍ୟମାନେ କୋଭିଡି-୧୯ ବିସ୍ତାର ଭଳି ଭୀଷଣ ସଙ୍କଟର ମୁକାବିଲା କରୁଥିବାରୁ ବିଧିଗତ ବ୍ୟବହାରିକ ପ୍ରମାଣପତ୍ରକୁ ଅପେକ୍ଷା ନ କରାଯାଇ ଏହି ଅର୍ଥରାଶି ରିଲିଜ୍ କରାଯାଇଛି।
ଡାକ୍ତରଖାନାରେ ଅକ୍ସିଜେନ୍ ପ୍ରସ୍ତୁତି ଓ ସଂରକ୍ଷଣ ପ୍ଲାଣ୍ଟ୍, ଭେଣ୍ଟିଲେଟର୍, ଏୟାର୍ ପ୍ୟୁରିଫାୟର୍, ଆମ୍ବୁଲାନ୍ସ୍ ସେବା ସୁଦୃଢ଼ିକରଣ, ପି.ପି.ଇ., ଟେଷ୍ଟିଙ୍ଗ୍ ଲାବ୍ରୋଟରି, ଟେଷ୍ଟିଙ୍ଗ୍ କିଟ୍, କଣ୍ଟେନ୍ମେଣ୍ଟ୍ ଜୋନ୍ ଭଳି କୋଭିଡ୍-୧୯ ‘କଣ୍ଟେନ୍ମେଣ୍ଟ୍’ ସମ୍ବନ୍ଧୀୟ ବିଭିନ୍ନ ପଦକ୍ଷେପ ନିମନ୍ତେ ରାଜ୍ୟମାନେ ଏହି ପାଣ୍ଠି ଉପଯୋଗ କରିପାରିବେ।
