ଭୋପାଳ: ଚିନ୍ତା ବଢ଼ାଇଲାଣି କରୋନା ଭୂତାଣୁ। ଟିକା ବାହାରିବା ପରେ ସଂକ୍ରମଣ ହାର ଟିକେ କମ ହୋଇଥିବା ବେଳେ ଏବେ ବିଭିନ୍ନ ରାଜ୍ୟରେ ହଠାତ ବୃଦ୍ଧି ପାଇଛି ସଂକ୍ରମିତଙ୍କ ସଂଖ୍ୟା। ଏହାକୁ ନିୟନ୍ତ୍ରଣକୁ ଆଣିବା ପାଇଁ ସରକାର ଏବେ ପୁଣି ଥରେ ଅଧିକ କରୋନା ସଂକ୍ରମିତ ଥିବା ଅଞ୍ଚଳରେ କଟକଣା ଲଗାଉଥିବା ଦେଖାଯାଉଛି। ଗୁଜୁରାଟର ୪ଟି ସହରରେ ନାଇଟ କର୍ଫ୍ୟୁ ବଢ଼ାଯିବା ସହ ଏବେ ମଧ୍ୟପ୍ରଦେଶରେ ପୁଣି ଥରେ ନାଇଟ କର୍ଫ୍ୟୁ ଲାଗୁ କରାଯାଇଛି। ଭୋପାଳ ଏବଂ ଇନ୍ଦୋରରେ ଆସନ୍ତାକାଲିଠାରୁ ନାଇଟ କର୍ଫ୍ୟୁ ଲାଗୁ କରାଯିବ ବୋଲି ମଧ୍ୟପ୍ରଦେଶ ସରକାର ଘୋଷଣା କରିଛନ୍ତି।
ଭୋପାଳ ଏବଂ ଇନ୍ଦୋର ସମେତ ୮ଟି ସହର- ଗ୍ୱାଲିୟର, ଜବଲପୁର, ଉଜୈନ, ରତ୍ଲାମ, ଛିନ୍ଦୱାରା, ବୁରହାନପୁର, ବେତୁଲ ଏବଂ ଖରଗୋନେରେ ମଧ୍ୟ ନାଇଟ କର୍ଫ୍ୟୁ ଲାଗୁ ହେବ। ରାତି ୧୦ଟା ପରେ ଜରୁରୀ ସେବାକୁ ଛାଡ଼ି ସମସ୍ତ ପ୍ରକାରର ଯାତାୟତ ଉପରେ କଟକଣା ରହିବ।
ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଆଜି ରାଜ୍ୟ କ୍ୟାବିନେଟ ବୈଠକର ଅଧ୍ୟକ୍ଷତା କରି ରାଜ୍ୟରେ କୋଭିଡ-୧୯ ସ୍ଥିତିର ଅନୁଧ୍ୟାନ କରିବା ପରେ ଏହି ନିଷ୍ପତ୍ତି ନେଇଛନ୍ତି। ଏହା ସହ କରୋନା ଭୂତାଣକୁ ଗମ୍ଭୀରତାର ସହ ନେଇ ମାସ୍କ ପିନ୍ଧିବା ସହ ସାମାଜିକ ଦୂରତା ଅବଲମ୍ବନ କରିବାକୁ କହିଛନ୍ତି ମୁଖ୍ୟମନ୍ତ୍ରୀ।
