ଶ୍ରୀନଗର ୨୩/୦୨ : ଭାରତରେ ପ୍ରତିଷ୍ଠିତ ପ୍ରତ୍ୟେକ ମନ୍ଦିର ପଛରେ ଏକ ଧାର୍ମିକ ବିଶ୍ୱାସ ରହିଥାଏ । ଠିକ୍ ସେହିପରି କାଶ୍ମୀରରେ ଏକ ଏମିତି ମନ୍ଦିର ରହିଛି ଯାହା କୁଣ୍ଡର ପାଣି କୌଣସି ସଙ୍କଟ ଆସିବା ପୂର୍ବରୁ ନିଜର ରଙ୍ଗ ବଦଳାଇ ଦେଇଥାଏ । ଫଳରେ ଲୋକମାନେ ସତର୍କ ହୋଇ ଯାଇଥାନ୍ତି । ଦେବୀଙ୍କ ଏହି ମନ୍ଦିରର ନାମ ହେଉଛି ‘ଖୀର ଭବାନୀ’ ।ଏହା ଶ୍ରୀନଗରଠାରୁ ପ୍ରାୟ ୨୭ କିଲୋମିଟର ଦୂରରେ ଥିବା ତୁଲ୍ଲା ମୁଲ୍ଲା ଗ୍ରାମରେ ଅବସ୍ଥିତ । ବିଶ୍ୱାସ କରାଯାଏ, ଏଠାରେ କୁଣ୍ଡର ପାଣି ରଙ୍ଗ ବଦଳାଇବା ଭବିଷ୍ୟତର ସଙ୍କଟକୁ ସୂଚାଇଥାଏ ।
ପୁରାଣ ଅନୁଯାୟୀ, ଦେବୀ ଖୀର ଭବାନୀ ପ୍ରଥମେ ଲଙ୍କାରେ ରହୁଥିଲେ । ଶୁଣାଯାଏ ଲଙ୍କାର ରାଜା ରାବଣ ମାତାଙ୍କର ଭକ୍ତ ଥିଲେ । କିନ୍ତୁ ମାତା ସୀତାଙ୍କୁ ହରଣ କରିଥିବାରୁ ରାବଣ ଉପରେ ରାଗିଯାଇ ଦେବୀ ଲଙ୍କା ଛାଡିଦେଇଥିଲେ ।ବିଶ୍ୱାସ କରାଯାଏ, ରାବଣ ଦେବୀ ସୀତାଙ୍କୁ ଅପହରଣ କଲାବେଳେ ଦେବୀ ‘ଖୀର ଭବାନୀ’, ରାବଣ ଉପରେ ରାଗିଯାଇ ହନୁମାନଙ୍କୁ ଲଙ୍କାରୁ ତାଙ୍କ ମୂର୍ତ୍ତି ହଟାଇ ଅନ୍ୟ ସ୍ଥାନରେ ସ୍ଥାପନ କରିବାକୁ କହିଥିଲେ । ତା’ପରେ ହନୁମାନ କାଶ୍ମୀରରେ ତାଙ୍କର ପ୍ରତିମା ସ୍ଥାପନ କରିଥିଲେ ।
ଏଠାରେ ଏକ ଚମତ୍କାର କୁଣ୍ଡ ରହିଛି । ଏହାର ବିଶେଷତ୍ୱ ହେଉଛି, କୌଣସି ସଙ୍କଟ କିମ୍ବା ଶୁଭ ସଙ୍କେତ ଆସିବା ପୂର୍ବରୁ କୁଣ୍ଡରେ ଥିବା ପାଣିର ରଙ୍ଗ ବଦଳିଯାଇଥାଏ । ପାଣି ଲାଲ କିମ୍ବା କଳା ରଙ୍ଗ ହେଲେ ସଙ୍କଟର ସୂଚନା ଏବଂ ସବୁଜ ରଙ୍ଗ ହେଲେ ଶୁଭ ସୂଚନା ଦେଇଥାଏ । ଲୋକମାନେ ଦୂରଦୂରାନ୍ତରୁ ମାଙ୍କ ଦର୍ଶନ ଏବଂ ଏହି କୁଣ୍ଡକୁ ଦେଖିବାକୁ ଆସିଥାନ୍ତି । କାର୍ଗିଲ ଯୁଦ୍ଧ ସମୟରେ କୁଣ୍ଡର ପାଣି ଲାଲ ହୋଇଯାଇଥିବା ଶୁଣିବାକୁ ମିଳିଥିଲା । କାଶ୍ମୀରରେ ଧାରା ୩୭୦ ହଟାଯିବା ପରେ ଏହାର ଜଳ ସବୁଜ ହୋଇଯାଇଥିଲା । ଦେବୀଙ୍କୁ ପ୍ରସନ୍ନ କରି ତାଙ୍କ କୃପା ପାଇବା ପାଇଁ ତାଙ୍କୁ ଖିରୀ ଭୋଗ ଲଗାଯାଇଥାଏ ।
