ନୂଆଦିଲ୍ଲୀ,୨୫/୧: କରୋନା ସଙ୍କଟ ବିଶ୍ୱର ଆୟ ଅସମାନତାକୁ ବଢାଇ ଦେଇଛି । ମାର୍ଚ୍ଚ ୨୦୨୦ରୁ ଡିସେମ୍ବର ୨୦୨୦ ମଧ୍ୟରେ ଲକଡାଉନ୍ ଓ ଅନ୍ୟ ପରିସ୍ଥିତି ପାଇଁ କୋଟି କୋଟି ଲୋକ ସେମାନଙ୍କ ରୋଜଗାର ହରାଇଛନ୍ତି । ଏହା ମଧ୍ୟରେ କିନ୍ତୁ ବିଶ୍ୱର ଧନିକମାନଙ୍କର ସମ୍ପତ୍ତି ୩.୯ ଟ୍ରିଲିୟନ ଡଲାର ବା ପ୍ରାୟ ୨୮୫ ଲକ୍ଷ କୋଟି ଟଙ୍କାର ଲାଭ ହୋଇଛି ।
ଅକ୍ସଫାର୍ମ ନାମକ ଏକ ଏନସିଓ ସୋମବାର ନିଜର ଏକ ରିପୋର୍ଟ ପ୍ରକାଶ କରିଛି । ଏହି ରିପୋର୍ଟକୁ ସ୍ୱିଜରଲାଣ୍ଡରେ ହେବାକୁ ଥିବା ଦାବୋସ ସମିଟରେ ପ୍ରଦାନ କରାଯାଇଛି । ରିପୋର୍ଟ ଅନୁସାରେ,ଦଶ ମାସରେ ଭାରତର ଟପ୍ ୧୦୦ କୋଟିପଟିଙ୍କ ସମ୍ପତ୍ତି ପ୍ରାୟ ୧୩ ଲକ୍ଷ ଟଙ୍କା ବୃଦ୍ଧି ପାଇଛି । ଏହି ଟଙ୍କା ଏତେ ଅଧିକ ଯେ ଯଦି ଗରିବଙ୍କୁ ପ୍ରଦାନ କରାଯାଏ ପ୍ରତ୍ୟେକଙ୍କ ଭାଗରେ ୯୪ ହଜାର ଟଙ୍କା ପଡିବ ।
ଭାରତର ୧୦୦ କୋଟିପତିଙ୍କ ସମ୍ପତ୍ତି ପ୍ରାୟ ୧୨.୯୮ ଲକ୍ଷ କୋଟି ଟଙ୍କା ବୃଦ୍ଧି ପାଇଛି । ତେବେ ଲକଡାଉନର ପ୍ରଥମ ଦୁଇ ମାସରେ ପ୍ରାୟ ୯.୨ କୋଟି ଲୋକଙ୍କ ଚାକିରୀ ଚାଲିଯାଇଥିଲା ।
କେବଳ ଏତିକି ନୁହେଁ, ବିଶ୍ୱର ଟପ୍ ୧୦ ଧନିଙ୍କ ସମ୍ପତ୍ତିରେ ମଧ୍ୟ ବୃଦ୍ଧି ଘଟିଛି । ଏହା ଏତେ ମାତ୍ରାରେ ଅଧିକ ଯେ, ସାରା ବିଶ୍ୱରେ କରୋନା ପାଇଁ କ୍ଷତିଗ୍ରସ୍ତ ହୋଇଥିବା ଲୋକଙ୍କ ଆର୍ଥିକ ଅବସ୍ଥା ସ୍ୱଚ୍ଛଳ କରାଯାଇପାରିବ ।
ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ, କରୋନା ଭାଇରସ ସାରା ବିଶ୍ୱର ଆୟର ଅସମାନତାକୁ ଭୟଙ୍କର ଭାବେ ବୃଦ୍ଧି କରିଛି । ଏହାର ପ୍ରଭାବ ଶିକ୍ଷା, ସ୍ୱାସ୍ଥ୍ୟ ଓ ସ୍ୱାଚ୍ଛନ୍ଦ୍ୟ ଚଳଣି ଉପରେ ପଡିଛି । ଧନି ଓ ଗରିବ ହୋଇ ଜନ୍ମ ହୋଇଥିବା ଏବଂ ମରୁଥିବା ଲୋକଙ୍କ ମଧ୍ୟରେ ତାରତମ୍ୟ ବଢିଯାଇଛି ।
ସେହିପରି ରିପୋର୍ଟରେ ଆହୁରି କୁହାଯାଇଛି ଯେ, ବିଶ୍ୱର ଟପ୍ ୧୦୦ କୋଟିପତି ୯ ମାସରେ ହିଁ କ୍ଷତି ଭରଣା କରିନେଇଥିଲେ । କିନ୍ତୁ ଗରିବ ଲୋକଙ୍କୁ ଏଥିରୁ ମୁକୁଳିବାକୁ ବର୍ଷ ବର୍ଷ ସମୟ ଲାଗିଯିବ ।
