ଆଗ୍ରା ୦୯/୦୧ : ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଅନେକ ହିନ୍ଦୁ ସଂଗଠନ ଲୋକଙ୍କୁ ଯୋଗାଯୋଗ କରି ଅର୍ଥ ସଂଗ୍ରହ କରୁଛନ୍ତି। ରାମ ମନ୍ଦିର ପାଇଁ ଆରଏସଏସ, ବିଶ୍ୱ ହିନ୍ଦୁ ପରିଷଦ ମଧ୍ୟ ଜନସମ୍ପର୍କ କରୁଛି। ଏଥିପାଇଁ ବିଜେପି ମଧ୍ୟ ଜନସମ୍ପର୍କ ଅଭିଯାନ ଆରମ୍ଭ କରିଛି। ନିଜେପି ଘର ଘର ଯାଇ ଲୋକଙ୍କୁ ଯୋଗାଯୋଗ କରୁଛି। ଆର୍ଥିକ ସହଯୋଗ ପାଇଁ ବିଜେପି ଶନିବାର ଦିନ ୱାର୍ଡ ସ୍ଥରରେ ଶ୍ରୀରାମ ରଥଯାତ୍ରା ବାହାର କରିଛି। ଯାତ୍ରା ମାଧ୍ୟମରେ ଅଯୋଧ୍ୟା ରାମ ମନ୍ଦିର ପାଇଁ ନିଧି ସମର୍ପଣ ପାଇଁ ଲୋକଙ୍କୁ ପ୍ରେରିତ କରାଯାଉଛି।
ଜାନୁଆରୀ ୧୫ ରୁ ୨୧ ତାରିଖ ଯାଏଁ ଆଗ୍ରାରେ ନିଧି ସମର୍ପଣ ଅଭିଯାନ ଚାଲିବ। ଏହି ଅଭିଯାନ ଅନୁସାରେ ପ୍ରତ୍ୟେକ ହିନ୍ଦୁ ପରିବାରରୁ ମନ୍ଦିର ନିର୍ମାଣ ପାଇଁ ସହଯୋଗ ଜୁଟାଇବା ସଂଗଠନର ଉଦ୍ଦେଶ୍ୟ। ୧୦ ଟଙ୍କା, ୧୦୦ ଟଙ୍କା ଓ ହଜାରେ ଟଙ୍କା କୁପନ ମାଧ୍ୟମରେ ସହଯୋଗ ରାଶି ଗ୍ରହଣ କରାଯିବ। ବଡ ରାଶି ଚେକ ଦ୍ୱାରା ଗ୍ରହଣ କରାଯିବ। ମନ୍ଦିର ନିର୍ମାଣ ପାଇଁ ହିନ୍ଦୁ ପରିବାରକୁ ପ୍ରେରିତ କରିବାକୁ ଏହି ଅଭିଯାନ ଆରମ୍ଭ ହୋଇଛି।
ମହାନଗର ଅଧ୍ୟକ୍ଷ ଭାନୁ ମହାଜନ କହିଛନ୍ତି ଯେ ସମସ୍ତ ୧୦୯ ୱାର୍ଡରେ ଜନସମ୍ପର୍କ ଯାତ୍ରା ବାହାର କରାଯାଉଛି। ଯାତ୍ରାରେ ପ୍ରତ୍ୟେକ ୱାର୍ଡର କାଉନସିଲର୍, କାର୍ଯ୍ୟକର୍ତ୍ତା, ଜନପ୍ରତିନିଧି ସାମିଲ ହୋଇଛନ୍ତି। ତାଛଡା ନେହରୁ ନଗର ମନ୍ଦିରରୁ ବଡ ସଂଖ୍ୟାରେ ଲୋକେ ଏହି ଜନସମ୍ପର୍କ ଯାତ୍ରାରେ ସାମିଲ ହୋଇଛନ୍ତି।
