ନୂଆଦିଲ୍ଲୀ: ରବିବାର ଦିନ ‘ଏକ୍ସ୍’ରେ ନୋଇଡ଼ାର ଚିକୁ ଯାଦବ ନାମରେ ଜଣେ ବାଳକର ଭିଡିଓ ସେୟାର୍ କରି ଶିଳ୍ପପତି ଆନନ୍ଦ ମହିନ୍ଦ୍ରା ମଜାରେ କହିଛନ୍ତି, ଖୁବ୍ ଶୀଘ୍ର ଆମେ ଦେବାଳିଆ ହୋଇଯିବୁ।
ଉଲ୍ଲେଖଯୋଗ୍ୟ, ମହିନ୍ଦ୍ରା ସେୟାର୍ କରିଥିବା ଭିଡିଓ କ୍ଲିପ୍ରେ ଚିକୁ ନାମରେ ସେ ବାଳକ ତା’ର ବାପାଙ୍କୁ କହୁଛି, ୭୦୦ ଟଙ୍କା ଦେଇ ଆମେ ଗୋଟାଏ ‘ଥର୍’ କାର୍ କିଣିବା। ପିଲାଟି ଭାବିଛି ଯେ, ମହିନ୍ଦ୍ରା କମ୍ପାନିର ‘ଥର୍’ କାର୍ ଓ ‘ଏକ୍ସ୍ୟୁଭି ୭୦୦’ ଏକା ଗାଡ଼ି ଓ ୭୦୦ ଟଙ୍କା ଦେଇ ତାକୁ କିଣାଯାଇ ପାରିବ। ବାପପୁଅ ମଧ୍ୟରେ ଆଳାପ ଚାଲିଥିବା ଏ ଭିଡିଓଟି ଆନନ୍ଦ ମହିନ୍ଦ୍ରାଙ୍କ ଦୃଷ୍ଟିରେ ପଡ଼ିବାରୁ ସେ ଏହାକୁ ଗୋଟାଏ ମଉଜିଆ ‘କ୍ୟାପ୍ସନ୍’ ବା ‘ପରିଚୟୋକ୍ତି’ ଦେଇ ‘ଏକ୍ସ’ରେ ପୋଷ୍ଟ୍ କରିଛନ୍ତି।
ମହିନ୍ଦ୍ରା ଲେଖିଛନ୍ତି: ‘ମୁଁ ଚିକୁକୁ ଶ୍ରଦ୍ଧା’ କରେ କହି ମୋର ସାଙ୍ଗ ସୁନି ତାରାପୋରେୱାଲା ଏହି ଭିଡିଓଟି ମୋ ପାଖକୁ ସେୟାର୍ କରିଛନ୍ତି। ତେଣୁ, ‘ଇନ୍ଷ୍ଟାଗ୍ରାମ୍’ରେ ଚିକୁର କିଛି ଫଟୋ ଦେଖିବା ପରେ ମୋ ମନରେ ବି ତା’ଲାଗି ଶ୍ରଦ୍ଧା ଜାତ ହେଲା। କିନ୍ତୁ, ମୋର ସମସ୍ୟା ହେଲା ତା’ କଥା ରଖିବାକୁ ଯଦି ୭୦୦ ଟଙ୍କାରେ ‘ଥର୍’ କାର୍ ବିକ୍ରି କରେ ତେବେ, ଆମେ ଦେବାଳିଆ ହୋଇଯିବୁ।
ଚିକୁର ବାପା ଚଳାଉଥିବା ଚିକୁର ‘ଇନ୍ଷ୍ଟାଗ୍ରାମ୍’ ପେଜ୍ରେ ଚଳିତ ବର୍ଷ ଜୁଲାଇ ମାସରେ ଉକ୍ତ ଭିଡିଓ ସେୟାର୍ କରାଯାଇଥିଲା। ଏପର୍ଯ୍ୟନ୍ତ ଏହି କ୍ଲିପ୍ର ୭ ଲକ୍ଷ ‘ଭିୟୁ’ ହେଲାଣି।
