ଭଦ୍ରକ, ୨୨/୦୫: ୨୦ ଗ୍ରାମ ବ୍ରାଉନ ସୁଗାର ଜବତ । ୨ ଜଣଙ୍କୁ ଗିରଫ କଲା ପୋଲିସ । ବିନା ହେଲମେଟରେ ବାଇକରେ ଆସୁଥିବା ବେଳେ ଧରା ପଡିଗଲେ ଉଭୟ ନିଶା ମାଫିଆ । ଏପରି ଘଟଣା ସାମ୍ନାକୁ ଆସିଛି ଭଦ୍ରକ ଟାଉନ ଥାନା ଅଞ୍ଚଳରେ ।
ସୂଚନା ଅନୁଯାୟୀ, ଭଦ୍ରକ ଟାଉନ ପୋଲିସ ଶନିବାର ଡାହାଣୀଗଢିଆ ଛକ ଠାରେ ଚେକିଂ କରୁଥିଲା । ଏତିକି ବେଳେ ଦୁଇ ଜଣ ବ୍ୟକ୍ତି ବିନା ହେଲମେଟରେ ସହର ଭିତରକୁ ପ୍ରବେଶ କରୁଥିଲେ । ପୋଲିସ ଏହି ଦୁଇ ଜଣଙ୍କୁ ଅଟକାଇ ଯାଞ୍ଚ କରିଥିଲା । ତେବେ ସେମାନଙ୍କ ନିକଟରୁ ୫୦ଟି ବ୍ରାଉନ ସୁଗାର ପୁଡିଆ ମିଳିଥିଲା । ଯାହାର ଓଜନ ପ୍ରାୟ ୨୦ ଗ୍ରାମ ହେବ ବୋଲି ପୋଲିସ କହିଛି ।
ଆହୁରି ମଧ୍ୟ ସେମାନଙ୍କ ପାଖରେ ଥିବା ଦୁଇଟି ମୋବାଇଲ ଫୋନ, ଗୋଟିଏ ମୋଟରସାଇକେଲ ଓ ବିଭିନ୍ନ ସାମଗ୍ରୀକୁ ଜବତ କରିଛି ଟାଉନ ପୋଲିସ । ଜବତ ବ୍ରାଉନ ସୁଗାରର ଆନୁମାନିକ ମୂଲ୍ୟ ପ୍ରାୟ ୨ ଲକ୍ଷ ଟଙ୍କା ହେବ ବୋଲି ଜଣାପଡିଛି । ଏହି ଦୁଇ ବ୍ୟକ୍ତିଙ୍କ ମଧ୍ୟରୁ ଜଣେ ଭଦ୍ରକରେ ହୋଇଥିବା ବେଳେ ଅନ୍ୟ ଜଣେ ଯାଜପୁର ଅଞ୍ଚଳର। ରାକେଟରେ ଅନ୍ୟ କେଉଁମାନେ ସଂପୃକ୍ତ ଅଛନ୍ତି ସେନେଇ ତଦନ୍ତ ଜାରି ରହିଥିବା ପୋଲିସ କହିଛି ।
