ଅଦନ ୩୦।୧୨: ୟେମେନର ଅଦନ ବିମାନ ବନ୍ଦରରେ ବୁଧବାର ଭୀଷଣ ବିସ୍ଫୋରଣ ହୋଇଛି। ଏକ ଯାତ୍ରୀବାହୀ ବିମାନ ଅବତରଣ କରିବାମାତ୍ରେ ରନୱେରେ ବିସ୍ଫୋରଣ ହୋଇଥିଲା। ତେବେ ଏଥିରେ ବିମାନର କିଛି କ୍ଷତି ହୋଇ ନଥିଲେ ବି ପରେ ହୋଇଥିବା ଗୁଳିବିନିମୟରେ ୨୨ ଜଣ ପ୍ରାଣ ହରାଇଥିବା ଆକଳନ କରାଯାଇଛି। ଏହି ବିମାନରେ ୟେମେନ ପ୍ରଧାନମନ୍ତ୍ରୀ ମିନ୍ ଅବଦୁଲ ମଲ୍ଲିକ ସଇଦଙ୍କ ସମେତ ତାଙ୍କ ମନ୍ତ୍ରିମଣ୍ଡଳ ଥିଲେ ବୋଲି କୁହାଯାଉଛି।
ସାଉଦୀ ଆରବ ସୂତ୍ରରୁ ମିଳୁଥିବା ସୂଚନାରେ ୟେମେନ ପ୍ରଧାନମନ୍ତ୍ରୀ ଓ ତାଙ୍କ ମନ୍ତ୍ରୀମଣ୍ଡଳ ସକୁଶଳେ ରାଷ୍ଟ୍ରପତି ଭବନ ପହଞ୍ଚି ଯାଇଛନ୍ତି। ତେବେ ବିମାନ ବନ୍ଦର ରନୱେ ବିସ୍ଫୋରଣ ଓ ଗୁଳିକାଣ୍ଡରେ ପ୍ରାଣ ହରାଇଥିବା ଲୋକଙ୍କନେଇ ସମ୍ପୂର୍ଣ୍ଣ ତଥ୍ୟକୁ ଅପେକ୍ଷା କରାଯାଇଛି। ୟେମେନରେ ଦୀର୍ଘ ବର୍ଷ ହେଲା ଗୃହଯୁଦ୍ଧ ଲାଗି ରହିଛି। ଏକ ଏମଓୟୁ ଆଧାରରେ ପ୍ରଧାନମନ୍ତ୍ରୀ ସଇଦଙ୍କ ସହ ତାଙ୍କ ମନ୍ତ୍ରୀମଣ୍ଡଳର କେତେକ ମନ୍ତ୍ରୀ ଅଦନ ପ୍ରତ୍ୟାବର୍ତ୍ତନ କରିଥିଲେ। ସରକାରଙ୍କ ଏହି ବୁଝାମଣା ଗତ ସପ୍ତାହରେ ବିଛିନ୍ନତାବାଦୀ ଗୋଷ୍ଠୀଙ୍କ ସହ ହୋଇଥିଲା।
ମଲିକଙ୍କ ସରକାରକୁ ଅନ୍ତର୍ଜାତୀୟ ମାନ୍ୟତା ରହିଛି। ଦେଶରେ ଗୃହଯୁଦ୍ଧ ଯୋଗୁ ସେ ମଧ୍ୟ ଦୀର୍ଘ ବର୍ଷ ହେଲା ନିର୍ବାସୀତ ରହି ଆସୁଛନ୍ତି। ତାଙ୍କ ସରକାର ସାଉଦୀ ଆରବ ରାଜଧାନୀ ରିଆଦରୁ କାର୍ଯ୍ୟ କରୁଥିଲେ। ନିକଟରେ ୟେମେନ ରାଷ୍ଟ୍ରପତି ମନସୁର ହାଦୀ ମନ୍ତ୍ରୀମଣ୍ଡଳରେ ପରିବର୍ତ୍ତନ କରିଛନ୍ତି। ଏଥିରେ ବିଛିନ୍ନତାବାଦୀଙ୍କ ସହ ବୁଝାମଣାକୁ ଦେଶରେ ବଡ ପଦକ୍ଷେପ ବୋଲି ବୁଝା ଯାଉଛି।
