ଢେଙ୍କାନାଳ ୨।୬: ଜଣେ କ୍ରସର ମାଲିକଙ୍କୁ ନାନା କେସ୍ ଭୟ ଦେଖାଇ ୩୦ ହଜାର ଟଙ୍କା ଚାନ୍ଦା ଆଦାୟ କରୁଥିବା ବେଳେ ଭିଜିଲାନ୍ସ ହାବୁଡରେ ପଡିଥିଲେ ଢେଙ୍କାନାଳ ଜିଲ୍ଲା ହିନ୍ଦୋଳ ଏସଡିପିଓ ମଳୟ କିଶୋର ନାୟକ । ବେଆଇନ ଭାବେ ଠୁଳ କରିଥିବା ସମ୍ପତ୍ତିର ପେଡି ଖୋଲିବାରେ ଲାଗିଛି ଭିଜିଲାନ୍ସ । ମଳୟଙ୍କୁ ଲାଞ୍ଚ ଟଙ୍କା ସହ ଭିଜିଲାନ୍ସ କାବୁ କରିବା ପରେ ଏକ ମାମଲା ରୁଜୁ କରି ଗିରଫ କରିଛି ।
ତେବେ ଗିରଫ ଏହି ଲାଞ୍ଚୁଆ ପୋଲିସ ଅଧିକାରୀ ବିଭିନ୍ନ ସ୍ଥାନରେ ବେଆଇନ ଭାବେ ଠୁଳ କରିଥିବା ଜଣାପଡିଛି । ଏପରିକି ଭୁବନେଶ୍ବର, ପୁରୀ, ସମ୍ବଲପୁର ଓ ଅନୁଗୁଳ ଆଦି ସ୍ଥାନରେ ସ୍ଥାବର ଓ ଅସ୍ଥାବର ସମ୍ପତ୍ତି ଉପରେ ଚଢ଼ାଉ କରିଛି ଭିଜିଲାନ୍ସ । ତେବେ ହିନ୍ଦୋଳ ସ୍ଥିତ ସରକାରୀ କ୍ବାର୍ଟରରେ ଚଢ଼ାଉ ପୂର୍ବରୁ ଖବର ପାଇ ତାଙ୍କ ପତ୍ନୀ ଘରେ ଥିବା ଟଙ୍କା ଓ ସୁନା ଗହଣା ଏକ ଅଟାଚରେ ନେଇ ଛୁ ମାରିଛନ୍ତି ।
ସେପଟେ ମଳୟଙ୍କର ଘର ଅନୁଗୁଳ ଅଁଳାପଡାରେ ଏକ ଦୁଇ ମହଲା ବିଶାଳ କୋଠା, ଭୁବନେଶ୍ବର ଶଙ୍କରପୁର ସ୍ଥିତ ଟାଟା ଏରିନାରେ ଏକ ଫ୍ଲାଟ, ପୁରୀରେ ଏକ ଫ୍ଲାଟ, ସମ୍ବଲପୁର ଧନୁପାଲିରେ ଏକ ଦୁଇ ମହଲା ବିଶାଳ କୋଠା ସାଙ୍ଗକୁ ଅନ୍ୟ ଏକ ପ୍ଲଟ ଥିବା ଭିଜିଲାନ୍ସ ହାତରେ ପ୍ରମାଣ ଲାଗିଛି ।
ଅପରପକ୍ଷରେ ମଳୟ ନାୟକଙ୍କର ବିଭିନ୍ନ ବ୍ୟାଙ୍କରେ ନିଜ ଓ ନିଜ ସମ୍ପର୍କୀୟଙ୍କ ନାମରେ ଥିବା ବ୍ୟାଙ୍କ ଆକାଉଣ୍ଟ, ବୀମା ବଣ୍ଡ, ଫିକ୍ସି ଡିପୋଜିଟ୍ ଆଦି ଥିବା ସୂଚନା ପାଇ ଭିଜିଲାନ୍ସ ପକ୍ଷରୁ ଛାନଭିନ ଆରମ୍ଭ କରିଛି । ତେବେ କଟକ ଭିଜିଲାନ୍ସ ପକ୍ଷରୁ ଯାଞ୍ଚ ଚାଲିଥିବା ବେଳେ ଅନ୍ୟୁନ ୨ କୋଟି ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠୁଳ କରିଥିବା ସୂଚନା ଭିଜିଲାନ୍ସ ପାଇ ସାରିଥିବା ବେଳେ ଆଗକୁ ଏହାର ପରିମାଣ ବଢିବାର ସମ୍ଭାବନା ରହିଛି ।
