ହାଇଦ୍ରାବାଦ : ହାଜତରେ ୨ ଜଣ ମହିଳାଙ୍କୁ ଯୌନ ନିର୍ଯାତନା ଦେଇଥିବା ଅଭିଯୋଗରେ ଆନ୍ଧ୍ରପ୍ରଦେଶରେ ଜଣେ ଏସ୍ଆଇଙ୍କ ସମେତ ୬ ଜଣଙ୍କ ବିରୋଧରେ ମାମଲା ରୁଜୁ ହୋଇଛି। ଚିତ୍ତୁର ଟାଉନ ପୁଲିସ ଅନୁଯାୟୀ ଗତ କିଛି ଦିନ ତଳେ ଏହି ଘଟଣା ଘଟିଛି। ଚୋରି ମାମଲାରେ ସମ୍ପୃକ୍ତି ଥିବା ନେଇ ପୁଥଲପଟ୍ଟୁ ପୁଲିସ ଗୋଟିଏ ଗ୍ୟାଙ୍ଗର ୭ ଜଣ ସଦସ୍ୟଙ୍କୁ ଅଟକ ରଖିଥିଲା। ଏହି ଗ୍ୟାଙ୍ଗରେ ଉକ୍ତ ୨ ଜଣ ମହିଳା ଥିଲେ। ମହିଳା ୨ ଜଣ ମାମଲାରେ ସେମାନଙ୍କ ଦୋଷ ସ୍ବୀକାର କରିଛନ୍ତି। ସେମାନଙ୍କୁ ରିମାଣ୍ଡରେ ପଠାଯାଇଛି।
ସେହିପରି ଅନ୍ୟ ସନ୍ଦିଗ୍ଧମାନଙ୍କୁ ତାମିଲନାଡ଼ୁର କ୍ରୀଷ୍ଣାଗିରି ପଠାଯାଇଛି। ୨ ଜଣ ମହିଳା କ୍ରୀଷ୍ଣାଗିରି ଫେରିବାପରେ ଥାନାରେ ଅଭିଯୋଗ ଦାଏର କରିଛନ୍ତି। ସେମାନଙ୍କ ଅଭିଯୋଗ ଆଧାରରେ ଚିତ୍ତୁର ଟାଉନ ଥାନାରେ ମାମଲା ରୁଜୁ ହୋଇଛି। ଉକ୍ତ ଘଟଣାରେ ଅଧିକ ତଦନ୍ତ ଜାରି ରହିଛି।
