ନୂଆଦିଲ୍ଲୀ: ବିମାନରେ ଯାତ୍ରା କଲେ ଶୀଘ୍ର ଗନ୍ତବ୍ୟ ସ୍ଥଳରେ ପହଞ୍ଚିହେବ ବୋଲି ଲୋକମାନଙ୍କ ଧାରଣା ରହିଛି। ମାତ୍ର ଘରୋଇ ଏୟାରଲାଇନ୍ସ ସ୍ପାଇସ୍ଜେଟ୍ରେ ଯେଉଁ ଯାତ୍ରୀମାନେ ଟିକଟ କାଟିଥିଲେ ସେମାନଙ୍କ ଲାଗି ଏହି ଅନୁଭୂତି ଭିନ୍ନ ପ୍ରକାର ଥିଲା। ଗତ ମେ’ରେ କଂପାନିର ଅଧିକାଂଶ ବିମାନ ବିଳମ୍ବରେ ଉଡ଼ିଥିଲା। ମାତ୍ର ୬୧ ପ୍ରତିଶତ ବିମାନର ଉଡ଼ାଣ ଠିକ୍ ସମୟରେ ହୋଇଥିଲା।
ଗ୍ରୀଷ୍ଣ ଋତୁରେ ଲୋକମାନେ ବିଭିନ୍ନ ସ୍ଥାନକୁ ଯାତ୍ରା କରିବା ଲାଗି ବିମାନ ଉପରେ ନିର୍ଭରଶୀଳ ଥିଲେ। ସେହି ସମୟରେ ସ୍ପାଇସ୍ଜେଟ୍ ଏହାର ଯାତ୍ରୀମାନଙ୍କୁ ବିଳମ୍ବ ଯନ୍ତ୍ରଣା ଦେଇଥିଲା। ବେସାମରିକ ବିମାନ ଚଳାଚଳ ମନ୍ତ୍ରାଳୟ ତଥ୍ୟ ଅନୁସାରେ ଗତ ମେ’ରେ ଉଡ଼ାଣରେ ସମୟାନୁବର୍ତ୍ତିତା ବଜାୟ ରଖିବାରେ ସ୍ପାଇସ୍ଜେଟ୍ ବିଫଳ ହୋଇଥିଲା। ସମୟାନୁବର୍ତ୍ତିତା ରୢାଙ୍କ୍ରେ ଏୟାର ଇଣ୍ଡିଆ ମଧ୍ୟ ଭଲ ସ୍ଥିତିରେ ନାହିଁ। ସ୍ପାଇସ୍ଜେଟ୍ ଉପରକୁ ଏହା ପଞ୍ଚମ ସ୍ଥାନରେ ରହିଛି। ସମୟାନୁବର୍ତ୍ତିତାରେ ସର୍ବକନିଷ୍ଠ ଏୟାରଲାଇନ୍ ଆକାଶ ଏୟାର ଆଗରେ ରହିଛି। ତା’ ପଛକୁ ରହିଛନ୍ତି ଇଣ୍ଡିଗୋ, ଭିସ୍ତାରା, ଏୟାର ଏସିଆ ଓ ଏୟାର ଇଣ୍ଡିଆ। ଶେଷ ସ୍ଥାନରେ ରହିଛି ସ୍ପାଇସ୍ଜେଟ୍।
