ନୂଆଦିଲ୍ଲୀ,୧୩/୧୨: ନ୍ୟୁଜିଲାଣ୍ଡ ବିପକ୍ଷରେ ଟେଷ୍ଟ୍ ସିରିଜ ଜିତିବା ପରେ ଭାରତୀୟ ଟିମ୍ ଏବେ ଦକ୍ଷିଣ ଆଫ୍ରିକା ଗସ୍ତ କରିବ । ଭାରତ ଦକ୍ଷିଣ ଆଫ୍ରିକା ବିପକ୍ଷରେ ତିନୋଟି ଟେଷ୍ଟ୍ ଓ ସମାନ ସଂଖ୍ୟକ ଦିନିକିଆ ମ୍ୟାଚ୍ ଖେଳିବ । ଟି୨୦ ସିରିଜ ପରେ ଖେଳାଯିବ । ଟେଷ୍ଟ ସିରିଜର ପ୍ରଥମ ମ୍ୟାଚ୍ ଡିସେମ୍ବର ୨୬ରୁ ସେଞ୍ଚୁରିଆନରେ ଖେଳାଯିବ । ଏହି ମ୍ୟାଚ୍ ଜିତିଲେ ବିରାଟ କୋହଲି ଏକ ଐତିହାସିଲ ରେକର୍ଡ ପ୍ରତିଷ୍ଠା କରିବେ ।
ଏହି ଟେଷ୍ଟ୍ ଜିତିଲେ ବିରାଟ ଏକ ମାତ୍ର ଭାରତୀୟ ଅଧିନାୟକ ହେବେ ଯାହାଙ୍କ ନେତୃତ୍ୱରେ ଦଳ ଦ୍ୱିତୀୟ ଥର ବକ୍ସିଂ ଡେ ଟେଷ୍ଟ୍ ଜିତିବ । ୩ ବର୍ଷ ପୂର୍ବରୁ ବିରାଟ ପ୍ରଥମ ଥର ପାଇଁ ବକ୍ସିଂ ଡେ ଟେଷ୍ଟ୍ ଜିତିଥିଲେ । ଯେଉଁଥିରେ ଭାରତ ଅଷ୍ଟ୍ରେଲିଆକୁ ୧୩୭ ରନରେ ମାତ୍ ଦେଇଥିଲା । ଦଳର ବିଜୟରେ ଜସପ୍ରିତ ବୁମରାହଙ୍କ ବଡ ଭୂମିକା ରହିଥିଲା । ଭାରତ ପ୍ରଥମ ଥର ପାଇଁ ଅଷ୍ଟ୍ରେଲିଆ ମାଟିରେ ସିରିଜ୍ ଜିତିଥିଲା ।
ଦକ୍ଷିଣ ଆଫ୍ରିକା ମାଟିରେ କୌଣସି ଦଳ ଟେଷ୍ଟ୍ ଖେଳିବା ଓ ଜିତିବା ସହଜ କଥା ନୁହେଁ । ଭାରତ ଏବେସୁଦ୍ଧା ଦକ୍ଷିଣ ଆଫ୍ରିକାରେ ଟେଷ୍ଟ୍ ସିରିଜ ଜିତିପାରି ନାହିଁ । ନୂଆ କୋଚ୍ ରାହୁଲ ଦ୍ରାବିଡଙ୍କ ପାଇଁ ମଧ୍ୟ ଏହି ଗସ୍ତ ଚ୍ୟାଲେଞ୍ଜିଂ ହେବ । ସୂଚନାଯୋଗ୍ୟ, ଗତ ଥର ଭାରତ ଦକ୍ଷିଣ ଆଫ୍ରିକା ବିପକ୍ଷରେ ୧-୨ରେ ଟେଷ୍ଟ୍ ସିରିଜ ହାରିଥିଲା ।
