ନୂଆଦିଲ୍ଲୀ : ଗ୍ରୀଷ୍ମାବକାଶ ପରେ ନୂତନ କାଗଜ-ବିହୀନ ସୁବିଧା ସହ ସୁପ୍ରିମ୍କୋର୍ଟର କାର୍ଯ୍ୟ ପୁନଶ୍ଚ ଆରମ୍ଭ ହୋଇଛି। ଆଇନଜୀବୀ, ମାମଲାକାରୀ ଓ ଅନ୍ୟମାନଙ୍କ ପାଇଁ ମାଗଣା ୱାଇଫାଇ ସୁବିଧା ପ୍ରଦାନ କରାଯାଇଛି।
ପ୍ରଧାନବିଚାରପତି ଡିୱାଇ ଚନ୍ଦ୍ରଚୂଡ଼ କହିଛନ୍ତି, କୋର୍ଟ ନଂ ୧ରୁ ୫ ପର୍ଯ୍ୟନ୍ତ ମାଗଣା ୱାଇଫାଇ ସେବା ଉପଲବ୍ଧ କରାଯାଇଛି ଏବଂ ଖୁବ୍ଶୀଘ୍ର ବାର୍ ରୁମ୍ଗୁଡ଼ିକରେ ବି ଏହି ସୁବିଧା ପ୍ରଦାନ କରାଯିବ। ଏଣିକି ଆଉ ବହି ଓ କାଗଜର ଆବଶ୍ୟକତା ପଡ଼ିବ ନାହିଁ। କିନ୍ତୁ ତା’ ମାନେ ନୁହେଁ ଯେ, କୋର୍ଟ ବହି ଓ କାଗଜରେ ବିଶ୍ବାସ କରେ ନାହିଁ। ଅନେକ ବୈଷୟିକ ସୁବିଧା, ଅଧିକ ସ୍କ୍ରିନ୍ ଏବଂ ଉନ୍ନତତର ଭିଡ଼ିଓ କନ୍ଫରେନ୍ସିଂ ସୁବିଧା ଆଦି ସହ ଆଧୁନିକ ଡିଜାଇନରେ ଛୁଟି ପରେ କୋର୍ଟରୁମ୍ଗୁଡ଼ିକର ଚେହେରା ବଦଳିଯାଇଛି। ସୁପ୍ରିମ୍କୋର୍ଟରେ ଇ-ପଦକ୍ଷେପର ଅଂଶ ସ୍ବରୂପ ଆଇନଜୀବୀ, ମାମଲାକାରୀ, ସାମ୍ବାଦିକ ଓ ଅନ୍ୟ ସମ୍ପୃକ୍ତ ବ୍ୟକ୍ତିଙ୍କୁ ମାଗଣା ୱାଇଫାଇ ସୁବିଧା ପ୍ରଦାନ ବ୍ୟବସ୍ଥା ଆରମ୍ଭ ହୋଇଛି।
