ସରୋଜ କୁମାର ପ୍ରଧାନ ହେଲେ ସରକାରୀ ମୁଖ୍ୟ ସଚେତକ: ଗୋବିନ୍ଦ ଚନ୍ଦ୍ର ଦାସ ହେଲେ ଉପ ମୁଖ୍ୟ ସଚେତକ

ଭୁବନେଶ୍ବର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ବୌଦ୍ଧ ବିଧାୟକ ସରୋଜ କୁମାର ପ୍ରଧାନଙ୍କୁ ସପ୍ତଦଶ ବିଧାନସଭା ପାଇଁ ସରକାରୀ ମୁଖ୍ୟ ସଚେତକ ଭାବେ ନିଯୁକ୍ତି ଦେଇଛନ୍ତି। ସେହିପରି ରେମୁଣା ବିଧାୟକ ଗୋବିନ୍ଦ ଚନ୍ଦ୍ର ଦାସଙ୍କୁ ସରକାରୀ ଉପ ମୁଖ୍ୟ ସଚେତକ ଭାବେ ମୁଖ୍ୟମନ୍ତ୍ରୀ ନିଯୁକ୍ତି ଦେଇଛନ୍ତି। ଏନେଇ ସଂସଦୀୟ ବ୍ୟାପାର ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଏହି ନିଯୁକ୍ତି ତୁରନ୍ତ ଲାଗୁ କରିବାକୁ କୁହାଯାଇଛି। ଫଳରେ ଏହି ଦୁଇ ଜଣ ଆସନ୍ତାକାଲି ଠାରୁ ବିଧାନସଭାରେ ତାଙ୍କ ନୂଆ ପଦବିରେ କାର୍ଯ୍ୟ ଆରମ୍ଭ କରିବେ।
ମୁଖ୍ୟସଚେତକଙ୍କୁ କ୍ୟାବିନେଟ୍ ପାହ୍ୟା ମିଳୁଥିବାରୁ ସରୋଜ କୁମାର ପ୍ରଧାନଙ୍କୁ କ୍ୟାବିନେଟ୍ ମନ୍ତ୍ରୀଙ୍କୁ ମିଳୁଥିବା ସମସ୍ତ ସୁବିଧା ସୁଯୋଗ ମିଳିବ। ସେହିପରି ଉପ ମୁଖ୍ୟ ସଚେତକ ଗୋବିନ୍ଦ ଚନ୍ଦ୍ର ଦାସଙ୍କୁ ରାଷ୍ଟ୍ର ମନ୍ତ୍ରୀ ପାହ୍ୟା ମିଳିବ। ରାଷ୍ଟ୍ରମନ୍ତ୍ରୀଙ୍କୁ ମିଳୁଥିବା ସମସ୍ତ ସୁବିଧା ସୁଯୋଗ ତାଙ୍କୁ ମିଳିବ। ବିଧାନସଭା ଗୃହ ପରିଚାଳନାରେ ସରକାରୀ ମୁଖ୍ୟ ସଚେତକ ପ୍ରମୁଖ ଭୂମିକା ନିର୍ବାହ କରୁଥିବା ବେଳେ ପ୍ରଥମ ଥର ବିଧା‌ୟକ ହୋଇଥିବା ସରୋଜ କିପରି କାର୍ଯ୍ୟ କରୁଛନ୍ତି ତାହା ଉପରେ ସମସ୍ତଙ୍କ ନଜର ରହିବ।