ପୁରୀ ୩୧/୧୨: ରାତି ପାହିଲେ ବିଦାୟ ନେବ ବର୍ଷ ୨୦୨୧। କୋଭିଡ଼ ୧୯ ଓ ଲକ୍ଷାଧିକ ଭକ୍ତଙ୍କ ଭିଡ଼କୁ ଦୃଷ୍ଟିରେ ରଖି ଆଜି ଠାରୁ ତିନିଦିନ ଧରି ଶ୍ରୀମନ୍ଦିର ଭକ୍ତଙ୍କ ପାଇଁ ବନ୍ଦ ରଖାଯାଇଛି। ଯାହା ଫଳରେ ଆସନ୍ତାକାଲି ସକାଳେ ମହାପ୍ରଭୁଙ୍କ ଦର୍ଶନ ମିଳିବ ନାହିଁ। ସଂସ୍କୃତି ଓ ପର୍ଯ୍ୟଟନ ସହର ଶ୍ରୀକ୍ଷେତ୍ରରେ ସଂପୁର୍ଣ୍ଣ ଫିକା ପଡ଼ିଛି ନୂଆ ବର୍ଷ ପାଳନ । ଆଜିଠାରୁ ତିନିଦିନ ଧରି ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ଥିବା ବେଳେ ହୋଟେଲ ମାନଙ୍କରେ ଜିରୋ ନାଇଟ ସେଲିବ୍ରେସନ ଉପରେ ମଧ୍ୟ ଲାଗିଛି କଟକଣା ।
ଭକ୍ତ ମାନେ ଶ୍ରୀମନ୍ଦିର ବାହାରୁ ପତିତପାବନଙ୍କ ଦର୍ଶନ ଲାଭ କରି ବର୍ଷକୁ ବିଦାୟ ଦେଇଥିବା ବେଳେ ପର୍ଯ୍ୟଟକଙ୍କ ପାଇଁ ମୁଖ୍ୟ ଆକର୍ଷଣ ପାଲଟିଛି ବେଳାଭୂମି । କରୋନା ମହାମାରୀ ପାଇଁ ସବୁକିଛି ଫିକା ପଡ଼ିଥିବା ବେଳେ ପର୍ଯ୍ୟଟକଙ୍କ ସୁରକ୍ଷା ଦୃଷ୍ଟିରୁ ପ୍ରଶାସନ ପକ୍ଷରୁ କରାଯାଇଛି ବ୍ୟାପକ ବ୍ୟବସ୍ଥା । ସେହପରି ହୋଟେଲିୟର୍ସ ମାନେ ମଧ୍ୟ ପର୍ଯ୍ୟଟକଙ୍କ ପାଇଁ ବିଭିନ୍ନ ପ୍ରକାର ସ୍ୱାଦିଷ୍ଟ ଡ଼ିସ୍ ବନେଇବା ସହ କେକ୍ କାଟି ନୂଆବର୍ଷ ୨୦୨୨ କୁ ସ୍ୱାଗତ କରିବେ ବୋଲି କହିଛନ୍ତି ।
