ବ୍ରିସବେନ ୧୪।୦୧: ଅଷ୍ଟ୍ରେଲିଆ ବିପକ୍ଷ ବ୍ରିସବେନ ଟେଷ୍ଟ ପୂର୍ବରୁ ଟିମ୍ ଇଣ୍ଡିଆ ପାଇଁ ବଡ ଆଶ୍ଵସ୍ତିକର ଖବର ଆସିଛି। ଦଳର ବ୍ୟାଟିଂ କୋଚ୍ ବିକ୍ରମ ରାଠୋର କହିଛନ୍ତି ଦ୍ରୁତ ବୋଲର ଯଶପ୍ରୀତ ବୁମରା ଡାକ୍ତରୀ ଦଳ ସହ ନିଜର ଫିଟନେସ୍ ଉପରେ କାମ କରୁଛନ୍ତି। ତାଙ୍କ ଖେଳିବା ଉପରେ ଚୂଡାନ୍ତ ନିଷ୍ପତ୍ତି ଶୁକ୍ରବାର ସକାଳେ ନିଆଯିବ।
ରାଠୋର ଭର୍ଚୁଆଲ କନଫରେନ୍ସରେ କହିଛନ୍ତି, ଡାକ୍ତରୀ ଦଳ ବୁମରାଙ୍କ ସହ ମିଶି କାମ କରୁଛନ୍ତି। ଆମେ କାଲି ସକାଳେ ଦେଖିବୁ ଯେ, ବୁମରା ଚତୁର୍ଥ ଟେଷ୍ଟ ପୂର୍ବରୁ ଫିଟ୍ ଅଛନ୍ତି କି ନାହିଁ। ଯଦି ସେ ଖେଳିବା ପାଇଁ ଫିଟ୍ ହେବେ ତେବେ ଖେଳିବେ। ଯଦି ଫିଟ୍ ନଥିବେ ତେବେ ଖେଳିବେ ନାହିଁ।
ରାଠୋର ଗୁରୁବାର କହିଛନ୍ତି ବୁମରାଙ୍କ ଆଘାତ ଉପରେ ନଜର ରଖା ଯାଇଛି। ଡାକ୍ତରୀ ଦଳ ତାଙ୍କ ଉପରେ ବିଶେଷ ନଜର ରଖିଛନ୍ତି। ମୋତେ ଏହା ଉପରେ ଟିପ୍ପଣୀ ଦେବା ଉଚିତ୍ ହେବନି। ଆମେ ତାଙ୍କୁ ଠିକ୍ ହେବା ପାଇଁ ଯେତେ ସମ୍ଭବ ସେତେ ସମୟ ଦେବୁ। ଆପଣଙ୍କୁ ଆସନ୍ତାକାଲି ସକାଳେ ଜଣା ପଡିବ ଯେ, ପଡିଆକୁ କେଉଁ କେଉଁ ୧୧ ଜଣ ଖେଳାଳି ଓହ୍ଲାଉଛନ୍ତି।
ରାଠୋର କହିଛନ୍ତି, ପ୍ରସ୍ତୁତିକୁ ନେଇ ଆପଣ ମଜବୁତ ହୋଇଥାନ୍ତି। ଆମକୁ ଆମର ଖେଳାଳିଙ୍କ ଉପରେ ପୂର୍ଣ୍ଣ ଭରସା ରହିଛି। ପ୍ରତି ଖେଳାଳିଙ୍କ ଉପରେ ଆମର ଭରସା ରହିଛି। ଦଳ ଏହା କରି ଦେଖାଇଛନ୍ତି ଯେ, ଗୋଟିଏ ଖରାପ ଇନିଂସରେ ସେମାନଙ୍କ କ୍ଷମତା ଉପରେ ସନ୍ଦେହ କରାଯାଇ ପାରିବ ନାହିଁ।
