ନୂଆଦିଲ୍ଲୀ, ୨୯/୦୩: ଆଇପିଏଲରେ ସୋମବାର ମୁହାଁମୁହିଁ ହୋଇଥିଲେ ଲକ୍ଷ୍ନୌ ସୁପର ଜିଆଣ୍ଟସ ଓ ଗୁଜୁରାଟ ଟାଇଟନ୍ସ । ମୁକାବିଲାରେ ପ୍ରଥମେ ବ୍ୟାଟିଂ କରି ଲକ୍ଷ୍ନୌ ୧୫୮ ରନ୍ କରିଥିଲା । ଜବାବରେ ଗୁଜୁରାଟ ୫ ଓ୍ୱିକେଟ ହରାଇ ମ୍ୟାଚ୍ ଜିତି ନେଇଥିଲା । ତେବେ ମ୍ୟାଚରେ ଏକ ଘଟଣା ଲକ୍ଷ୍ନୌର ଫିଲ୍ଡିଂ ବେଳେ ଘଟିଥିଲା ।
ଗୁଜୁରାଟର ବ୍ୟାଟିଂ ବେଳେ ପ୍ରଥମ ଓଭରରେ ହିଁ ଦଳକୁ ଝଟକା ଲାଗିଥିଲା । ଷ୍ଟାର୍ ବ୍ୟାଟର ଶୁଭମନ ଗିଲ୍ ଖାତା ନଖୋଲି ଆଉଟ୍ ହୋଇଥିଲେ । ଦୁଷ୍ମନ୍ଥା ଚମିରାଙ୍କ ବଲରେ ସେ ଦୀପକ ହୁଡ୍ଡାଙ୍କ ହାତରେ ଧରା ପଡି ପ୍ୟାଭିଲିୟନ ଫେରିଥିଲେ । ତେବେ ଯେତେବେଳେ ଦୀପକ କ୍ୟାଚ୍ ଧରିଥିଲେ ସେତେବେଳେ ତାଙ୍କ ପାଖରେ ଠିଆ ହୋଇଥିବା କୃଣାଲ ପାଣ୍ଡ୍ୟା ତାଙ୍କୁ ଆଲିଙ୍ଗନ କରିଥିଲେ ।
ଏହି ସେଲିବ୍ରେସନ ଖାସ୍ କାରଣ ଦୀପକ ହୁଡ୍ଡା ଓ କୃଣାଲଙ୍କର ଏକ ଇତିହାସ ରହିଛି । ଉଭୟଙ୍କ ମଧ୍ୟରେ ଅଧିକାଂଶ ସମୟରେ କ୍ରିକେଟ୍ ଗ୍ରାଉଣ୍ଡରେ ତିକ୍ତତା ଦେଖିବାକୁ ମିଳେ । ତେବେ ଉଭୟଙ୍କର ଆଳିଙ୍ଗନର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ବରୋଦା ଟିମରେ ମୁହାଁମୁହିଁ ହୋଇଥିଲେ ଉଭୟ
ଉଭୟ ଖେଳାଳି ବରୋଦା ଟିମ୍ରୁ ଖେଳିଥାନ୍ତି । ଏକଦା କୃଣାଲ ଅଧିନାୟକ ଥିବା ବେଳେ ଦୀପକ ଉପ ଅଧିନାୟକ ଥିଲେ । ତେବେ ଉଭୟଙ୍କ ମଧ୍ୟରେ ଏପରି ସ୍ଥିତି ହୋଇଥିଲା ଯେ ଦୀପକ ଦଳ ଛାଡିଦେଇଥିଲେ । ଦୀପକ କୃଣାଳଙ୍କ ବିରୋଧରେ ଅସଦାଚରଣ ଅଭିଯୋଗ ଆଣିଥିଲେ । ଏପରିକି କୃଣାଳ ତାଙ୍କ କ୍ୟାରିଅର ଶେଷ କରିବା ନେଇ ଧମକ ଦେଇଥିଲେ ।
